Ruti 1 - Gourmanchéma Bible

Yaa yebiadima n baa Elimeleki leni o niba

¹ Bi bujiaba n den gobidi Isalele yaaba yaa yogunu, mi koma den tieni Isalele diema nni. Laa diema tinbuoyenli yaali n yi Juda yaa ja den fii leni o pua leni o bijaliediba ki ñani Betelema dogu nni ki gedi Moabi. Bi den ban kali lanpo yogunuba po.

² Laa ja den yi Elimeleki, o pua mo den yi Naomi, o bijaliediba mo Makiloni leni Kilijoni. Bi den tie Yufilata buolu yaaba ki ye Betelema, Juda tinbuoli nni. Bi den pundi ki kali Moabi diema nni.

³ Naomi calo den kpe ki ŋaa o leni o bijaliediba.

⁴ O bijaba yeni den taa bi puoba Moabi yaaba siiga. O poyendo den yi Olipa, o lielo mo Luta. Bi den ye likani ke li bua ki pundi bina piiga.

⁵ Makiloni leni Kilijoni den ti kpe. Lanwani Naomi di den ye waa pia bila waa pia ja.

Naomi goa ki kuni Betelema leni o biyuaga Luta

^6-7 Naomi den gbadi Moabi diema nni ke Li Miali Diedo noanli ki laa o niba po ki puni ba mi jiema. O den bogini ki baa ña Moabi diema nni leni o biyuamu, ki guani Juda tinbuoli nni. Bi den fii ki ñani ban den ye naani ki taa u sanu.

⁸ Naomi den yedi ba: «Yikuli n goa ki kuni yi naanba denpo. Li Miali Diedo n ŋanbi yipo nani yin den ŋanbi n niba yaaba n kpe leni mini nba yaa po maama.

⁹ Li Miali Diedo n teni ke yikuli n baa bi jaba, ki go pa yi mi yemanma yi calinkpendiedi nni!» O den gobini ba ki cabi ba. O biyuamu den buudi boncianla,

¹⁰ ki yedi o: «Kalam, ti baa yegi leni a ki gedi a buolu yaaba po.»

¹¹ Naomi den yedi ba: «N bisiaba, lebidi mani. Be yaa po ke yi baa yaa ŋua nni? N kan go maa bonjala yaaba n baa ti fidi ki tua yi ciaba.

¹² Lebidi mani. Yin kuni, kelima n podi ki pendi yua baa kuni ja. Baa n yaa yedi ke n pia mi suginma, baa dinla ñiagu n yaa taani leni ja ki mali bonjala,

¹³ naani li baa tuo yin guudi hali ban fandi bi? Naani li baa teni yin yie ke yi kan kuni jatoaba bi? A-a, n bisiaba. Kelima Li Miali Diedo faligi mine. N fala yaba ki pendi yi po.»

¹⁴ Mu biyualiedimu yeni go den buudi ki pugini. Olipa den gobini o yaanaa Naomi ki cabi o leni mi buama, ama Luta wani den yie ke o kan paadi leni o.

¹⁵ Naomi den yedi Luta: «Diidi, a polielo lebidi ki guani o buolu yaaba leni o *buli po. Am n lebidi ki guani nani a polielo n tieni maama.»

¹⁶ Ama Luta den goa ki yedi: «Da tigini nni ke min lebidi ki ŋaa ŋa ki kuni n denpo. Ŋan baa gedi naani, n moko baa gedi lankani. Ŋan baa yaa ye naani n moko baa yaa ye lankani. A buolu baa tua n buolu, a Tienu baa tua n moko yaa Tienu.

¹⁷ Ŋan baa kpe naani n moko baa kpe lankani, bi baa piini nni lankane. N yaa paadi leni a ke laa tie mi kuuma yaaka paadi ti, Li Miali Diedo n cuo nni o cuonbiadu.»

¹⁸ Naomi n den laa ke Luta sedi ke se o ciani o, o den cedi kaa go tigini o.

¹⁹ Bikuli den yegi ki gedi Betelema. Ban den kua u dogu nni, li den lidi u dogu nni yaaba kuli, ke bi puoba tua: «Li ko li tie Naomi yo?»

²⁰ O den yedi ba: «Yin da go yini nni Naomi, yin di yaa yi nni Mada, kelima U Paaciamu Kuli Daano boandi n pali hali boncianla.

²¹ N den ñani ne leni u nukubidu, ke Li Miali Diedo guani nni leni u nukuomu. U Paaciamu Kuli Daano buli nni o nunga ki teni ke mi yebiadima ŋmaa nni, lanwani yi baa gaa lede ki nan go yaa yi nni Naomi?»

²² Naomi n den ñani Moabi diema ki kpeni maama n yeni, wani leni o biyuaga Luta Moabi diema yua, den pundi Betelema yaa yogunu ke bi cili ki ce *olije.