Nehemi 9 - Gourmanchéma Bible

¹ Cilele yeni piilie n danaali daali, Isalele yaaba den taani ki baa loli bu ñoabu. Bi den yie li paboanli yaa tiadi ki wuli biba po mi tama.

² Bi den paadi leni bi nilanba ki cua ki sedi ki tuo bani leni bi yaajanba n tieni yaa *tuonbiadi.

³ Ban den fii ki sedi, bi den cogi bipo Li Miali Diedo bi Tienu *bali maama tili nni hali kudi taa. Bi go den laabi ki tuodi bi tuonbiadi ki miadi U Tienu sugili hali kudi taa.

⁴ Josue, Bani, Kadimieli, Sebania, Buni, Selebia, Bani leni Kenani den doni ki sedi Lefi buolu yaaba sedikaanu po ki kpaani ki mia Li Miali Diedo bi Tienu mi todima.

⁵ Lane Lefi buolu yaaba Josue, Kadimieli, Bani, Hasabinia, Selebia, Hodija, Sebania leni Petaya den yedi: «Fii mani, Pagi mani Li Miali Diedo yi Tienu yaa yogu n tu yaa yogu.» Ti Diedo, nilo kuli n pagi a yeli yaali n pia ti kpiagidi, Yaali n cie seli leni pagidi kuli.

I jaandi

⁶ Fini bebe n tie Li Miali Diedo yua n tagi tanpoli Leni tanpoli yaa tanpoli leni tanpoli toagola, Leni ki tinga leni yaala n ye ki niinni kuli, Mi ñincianma leni yaala n ye mi niinni kuli. A puuni laa bonla kuli li miali. Tanpoli toagola mo labindi a nintuali.

⁷ Fini Li Miali Diedo U Tienu n gandi Abalama. Fini n ñani o Uli, Kalide diema nni, Ki yini o Abalahama.

⁸ A den sua ke o pali tiegi apo, A den danli leni o ki niani o Ke a baa pa o puoliŋuani Kanana yaaba diema, Heta buolu yaaba diema, Amola buolu yaaba diema, Felesa buolu yaaba diema, Jebusa yaaba diema Leni Giligasa buolu yaaba yaa diema kuli. A kuani a ñoanianu mo kelima a tiegi.

⁹ A den laa ti yaajanba fala Ejipiti nni, Ki go gbadi bi bubula mo mi ñincianmoanma kani.

¹⁰ A den tieni mi bancianma leni li bonlidikaala Ki tuogi leni *Falono leni o koanbala Leni o diema yaaba kuli Kelima a den bani ban tieni ti yaajanba yaa tugutongu. Lanwani a den doagidi a kpiagidi Nani ŋan doagidi ti maama dinla.

¹¹ A den boagidi mi ñincianma Isalele yaaba nintuali, Ke bi duodi ma taakuoma. A den luni yaaba n ŋua ki deli ba ku buoñuangu nni Nani ban luni li tanli mi ñima nni maama yeni.

¹² A den gobidi ba u yensiinu leni ku tawaligu, Ku ñiagu mo leni yaa tawaligu n tie fantama ki yendi bipo bi sanu.

¹³ A den ñani tanpoli ki maadi leni ba Sinayi juali po. A den teni yaa ñoabona n tiegi, Yaa balimaama n tie moamoani, Yaa tundi leni yaa mabilikaama n ŋani boncianla.

¹⁴ A den teni ke bi bandi a fuodima dagagidikaali Ki teni ke a naacemo Musa waani ba mi mabilikaama Leni i tundi leni li bali maama.

¹⁵ Mi koma n den cuo ba, A den ñani mi jiema tanpoli po ki puni ba. U ñunñuunu n den gbadi ba, A den ñani mi ñima ku tangu nni ki puni ba. A den teni ke bi gedi ki ban diedi ŋan den poli ke a baa pa ba yaa diema.

¹⁶ Ama ti yaajanba den tieni ti japaadi, Ki juagi bi tuli, baa den cengi a bali maama,

¹⁷ Bi den yie baa tuo ma ki sundi ŋan den ŋanbi bipo yaa *ŋanbili. Bi den juagi bi tuli. Bi yiema nni, bi den gandi o yudaano Ki baa guani ban den ye ti yonbidi nni naanpo. Ama fini, a tie yaa Tienu n puuni sugili Ki juogidi ki gba mi niñima, Ki pia li juunli leni li ŋanbili. Lani yaa po ŋaa den ŋa ba.

¹⁸ Bi den duadi ki naabiga ki yedi: «Diidi ti Tienu yua n ñani ti Ejipiti diema nni!» Bi den tudi apo tudicianma.

¹⁹ Ama baa leni lani kuli, a niñingbadicianma po, Ŋaa den ŋa ba mi fanpienma nni, Yaa tawaligu n den wangi ba u sanu u yensiinu Ki den fuadi ki ŋa ba, Yaa tawaligu n den tie fantama Ki yendi bipo bi sanu ku ñiagu mo ki den fuadi ki ŋa ba.

²⁰ A den puni ba a yantiaŋanli ke ban baa mi yanfuoma. Ŋaa den tuo ke *mana poadi ba, A den puuni ba mi ñima ke bi ñu.

²¹ A den ye leni ba ki kubi ba mi fanpienma nni hali bina piinaa, Baa den luo liba kuli. Bi tiayiekaadi ki den cadi, Bi taana mo ki den moali.

²² A den teni ke bi paadi mi diema leni i nibuoli. A den boagidi ki teni ba yaa tinmu n kukuu ba. Bi den diedi Hesiboni bado Sihoni diema leni Basana yaa bado Ogi yaa diema.

²³ A teni ke bi puoliŋuani yabidi nani tanpoli ŋmabila yeni. A den kuani ba ŋan den yedi ke bi yaajanba baa diedi yaa diema niinni.

²⁴ Bi kua ki diedi ma, A den teni ke bi paadi Kanana yaaba, A den taa Kanana yaaba ki teni ba bi nuu nni, Bani leni bi badiba leni likani nilanbuoli Ke ban soani ba ban bua maama.

²⁵ Bi den diedi i bilini n lindi ki cebini yaa dogi Leni mu tinŋanmu Leni yaa diedi n gbie leni mi piama Leni ban gbiidi yaa caana Leni i duven tiidi leni *olifie Leni i tilondi boncianla. Bi den dini ki guo, Bi den gbengidi Ki ye mi yemancianma nni Kelima a ŋanbicianli po.

²⁶ Ama baa yeni bi den fii ki fiini mi yiema apo. Bi den luni a bali maama, Bi den ku a sawalipuaba yaaba n den tigini ba Ke ban guani a kani. Bi den tudi apo tudicianma.

²⁷ Lanwani a den teni ke bi yibalinba paadi ba ki waani ba fala. Bi fala yogunu bi den mua ki mia ŋa Ke amo den gbadi bi nialu hali tanpoli po. A niñingbadicianma po, a den puni ba bi faabikaaba Ke bi faabi ba bi yibalinba nuu nni.

²⁸ Ban den baa mi *faabima, Bi den goa ki cili ki tiendi yaala n bia a nintuali. Lanwani a go den teni ke bi yibalinba paadi ba. Ama bi didi go den mua ki mia ŋa Ke amo go den gbadi bi nialu hali tanpoli po. A niñingbadicianma po, a den faabi ba ke maa wa.

²⁹ A den tigini ba ban guani ki kubi a bali maama, Ama bi den suagi liiga leni ti japaadi, Baa cengi a mabilikaama, Bi miidi a ñoabona ya n teni ke yua n tuo ki kubi la baa yaa ye. Bi den fiini mi yiema ki juagi bi tuli kaa tuo a maama.

³⁰ A den juuni leni ba hali yaa bina n yaba. A sawalipuaba yaaba n den gbie leni a Fuoma den tundi ba. Ama baa den cengi. Lanwani a den taa ba ki teni bi nilanba nuu nni.

³¹ Ama a niñingbadicianma po, ŋaa den bolini ba, Ŋaa den ŋa ba. Kelima a tie yaa Tienu n juogidi, ki gba mi niñima.

³² U Tienu, ti Tienu, fini yua n yaba ki pia u paaciamu leni i jeje, Fini yua n kubi ŋan den kuani yaa *ŋantaado Leni ti ki gba mi niñima, Ŋan da fali tin laa yaa fala kuli, Tinba leni ti batieba leni ti yudanba leni ti kopadicianba Leni ti sawalipuaba leni ti yaajanba leni a niba kuli, Ki cili Asili batieba yogunu Ki taa ki pundi hali dinla.

³³ Yaala n den tieni ti kuli yaa siiga a den tiegi Kelima a den doagidi ke a tie tin baa fidi ki dugi yua yaa po, Ke timo nan tieni yaala n bia.

³⁴ Ti badiba, ti yudanba, ti kopadicianba leni ti yaajanba Naa den kubi a bali maama. Bi den fali a mabilikaama leni a tundi.

³⁵ Ban den ye ŋan puni ba yaa diecianŋanma nni, Leni ŋan den puni ba yaa bonŋanla kuli siiga, Baa den ŋa bi tuonjoagima ki soani apo.

³⁶ Dinla tinba n nan kaa ti yonbidi nne! Ti tie yonbi ŋan den puni ti yaajanba yaa tinga nni Ke ban yaa di ki bonluonkaala leni ki piama.

³⁷ Ki tinga yeni luoni boncianla ŋan teni ke yaa badiba n die ti Kelima tin tieni yaa tuonbiadi po yeni yaa po. Bi die tinba leni ti yandi kuli nani ban bua maama. Ti ye leni paboancianli!