Nehemi 1 - Gourmanchéma Bible

Nehemi baa Jelusalema laabaali

¹ Hakalia bijua Nehemi maama togida: Pelisa bado Alitakiselisesi bali binpiiliedi binli, yaa ŋmaalo n yi Kisile yaa niinni, mini Nehemi den ye u dociamu Suse nni.

² N kpiiba siiga yendo, Hanani, leni nitoaba den ñani Juda diema ki cua. N den buali ba yaa Jufinba n faabi leni ti yonbidi ki goa ki kpeni Jelusalema leni Jelusalema laabaali kuli.

³ Bi den goa ki yedi nni ke yaa niba n sieni leni yaaba n ñani ti yonbidi ki goa ki kpeni Juda diema nni ye likani leni o falaciamo leni yaa fe n kandi, ke Jelusalema bilinciami mumudi, ke mi fantama mo buoni u buliñoana.

Nehemi jaandi ki mia Isalele yaaba po

⁴ Min den gbadi laa bonla kuli, n den kali ki buudi. N den ye leni li paboanli ki luo bu ñoabu dana boncianla, ki jaandi ki miadi U Tienu yua n ye tanpoli,

⁵ ki yedi o: «Li Miali Diedo U Tienu yua n ye tanpoli, fini yua n yaba ki pia i jeje, fini yua n tiendi ŋan den bili yaa*ŋantaado yaaba n bua ŋa ki kubi a *balimaama po, ki gba bipo mi niñima,

⁶ cengi, a nuni mo n diidi nni. Cengi moala mini a naacemo n miadi a yaala. Ku ñiagu leni u yensiinu kuli n miadi a tinba a naacenba Isalele yaaba po, ki doagidi ti*tuonbiadi, tin den tieni apo yaadi, kelima mini leni n baadiegu yaaba, ti tieni ti tuonbiadi.

⁷ Ti tudi apo, tii kubi ŋan den teni a naacemo Musa yaa balimaama, yaa ñoabonbilikaana leni yaa mabilikaama.

⁸ Tiadi ŋan den puogi a naacemo Musa wan yedi ti yaala ne: ‹Yi yaa tieni ti tuonbiadi, n baa yadi yi i nilanbuoli siiga.

⁹ Ama yi yaa lebidi ki guani n kani ki go kubi n balimaama ki tiendi man yedi yaala mo, lanwani baa bi yaa gedini yi ti yonbidi hali ŋanduna bianu, n baa ñani yi lipo ki taani yi ki guani yi min den gandi yaa kaanu nni, ki bili ke bi baa yaa kpiagidi nni likani.›

¹⁰ Tinba Isalele yaaba tie a naacenba leni a nibuolu, ŋan den da ki faabi yaa nibuolu leni a fidu leni a paaciamu.

¹¹ N Diedo, ŋan cengi mini a naacemo n miadi a yaala leni a naacenba yaaba n bua ki fangi a yeli n miadi a yaala. Teni ke mini a naacemo sanu n pendi dinla, ki go teni min baa ki nunmanga o bado kani.» Laa yogunu n den tie yua n tendi wani o bado o bonñokaala.