Mise 1 - Gourmanchéma Bible

¹ Li Miali Diedo n doagidi yaa maama Mise po, Moleseti dogu yua, Juda batieba Yotami, Akasi leni Esekiasi bala yogunu. O den doagidi yaala n baa ti tieni Samali leni Jelusalema dogi.

U Tienu baa bu o niba bi tuonbiadi po

² Yinba i nilanbuoli kuli, cengi mani! Ki tinga, fini leni yaala n ye a niini kuli, Cengi mani bonŋanla. O Diedo Li Miali Diedo baa tua siedi Yinba Samali yaaba leni Jelusalema yaaba *tuonbiadi po, Wani O Diedo yua n ye hali o *kaangagidiŋamu nni.

³ Diidi mani, Li Miali Diedo ñani tanpoli Ki jiidi ki cuoni a juana yula po.

⁴ O baa ŋmaadi a juana ŋan yaa nandi Nani ti sindi n yen nandi mi fantama kani maama yeni, Ti joaloandi mo baa yagidi Nani yaa ñima n tiini li juali jiidima yeni.

⁵ Lankuli baa tieni kelima Jakobo puoliŋuani biadima po. Lankuli baa tieni kelima Isalele yaaba tuonbiadi po. Jakobo puoliŋuani yiema ŋoadi ŋmenba? Laa tie Samali ka yo? Juda yaaba buŋoadima ŋoadi ŋmenba? Laa tie Jelusalema ka yo?

⁶ Lani yaa po U Tienu yedi: «N baa teni Samali dogu n tua tangbanjuali N baa teni wun tua ban baa ŋu duven tiidi naankani. N baa pieni ki lu Samali tana kuli Ki ban lu ku joaloangu nni, Ki ŋa u dogu tanpuuna mubili.

⁷ N baa teni ban mudi ban den kpie i *buli nannana yaa kuli, Ki buoni bi niba n den puni i buli yeni yaa paabu kuli. N baa bolini bi buli kuli. Samali yaaba den baa laa buli leni a budiena poconcona panpaani. Bi yibalinba baa tugi laa nannana Ki ban yaa kpiagidi bi budiena nni.»

Fala baa Jelusalema

⁸ Mise go den yedi: «Lani n teni ke n baa mua ki figindi, N baa cuoni taafana leni benbili, ki doagidi n paboanli. N baa yaa mua ki tangi nani i tanboe yeni. N baa duni ki kpaani nani ti tataadi yeni.

⁹ Kelima Samali poagilima bia hali maama Ke bi kan fidi ki buu ma. Mi tandi ki pundi hali Juda diema po, Ki kua Jelusalema, n niba n ye yaa dogu nni.

¹⁰ Juda yaaba, da pa mani li laabaalo Gati nni, U Tienu n baa bu ki cuo ti yaa cuonu. Da mua mani, Yinba Beti-Leafila dogu yaaba. Bilini mani mi tama nni ki doagidi yi paboanli.

¹¹ Safili dogu yaaba, Gedi mubili leni i fe. Ti jawaandi po, Tisaanani dogu yaaba Kan go tuo ki ña. Beti-Haetiseli dogu paboanli Teni ke yi kan baa bi todima.

¹² Maloti dogu yaaba, Digibi ki jie bi miana po Kelima fala ñani Li Miali Diedo Kani ki jiidi ki pundi Hali Jelusalema buliñoana kani.

¹³ Lakisi dogu yaaba, Doali mani yi toateliti, Kelima yinba n den kpa tulini Siyono yaaba Ke bi tudi ki ŋoadi i buli. Bi den kpa laa ke Isalele yaaba tuonbiadi ye yinba yaa kane.

¹⁴ Li tie lani yaa po ke yinba Juda yaaba Kan go yaa die Moleseti-Gati dogu. Akisibi yaaba baa boandi Isalele yaaba, Ban den dugi ke bi baa baa mi todima yaaba yaa kani.

¹⁵ Yinba Madesa dogu yaaba, N baa teni nitoaba n diedi yi. Isalele yaaba leni bi kpiagidi kuli, Baa sani ki ban wuoni Adulama dogu nni.

¹⁶ Yinba Juda yaaba, kuo mani yi yula, Kelima li paboanli cuo yi, yi bibuadimu po. Kuo mani yubima nani o yobilo yeni, Kelima yi bila yeni caa ti yonbidi ki baa foagidi leni yi.»