Matie 6 - Gourmanchéma Bible

¹ Fangi mani yi yula ki da tiendi yi tuonŋama a sala nni ke bi niba n le. Yi yaa tiendi yeni yi kan baa panpaaniba kuli yi Baa yua n ye tanpoli kani.

² Lanwani, a yaa tieni mi ŋanma, ŋan da piebi kakaci nani pala lie danba n tiendi maama li *balimaama bangima diena nni leni i sani nni, ke bi niba n kpiagi ba. N waani yi i moamoani, bi baa bi panpaani n yeni.

³ Ama a yaa tieni mi ŋanma, da cedi a ganu n bandi a jienu n tiendi yaala,

⁴ ke a ŋanma n yaa tiendi ŋasiili nni. A Baa yua n nua ŋasiili nni n baa guani a la.

Jesu n yedi yaala i jaandi po

⁵ Yi yaa jaandi, yin da tie nani pala lie danba yaaba n bua ki yaa se li bali maama bangima diena nni leni a sankada nni ki jaandi, ke bi niba n le. N waani yi i moamoani, bi baa bi panpaani n yeni.

⁶ Ama fini a yaa jaandi, kua a dieli nni ki luoni a buliñoabu, ki jaandi a Baa yua n ye likani ŋasiili nni. Wani a Baa yua n nua ŋasiili nni n baa guani a la.

⁷ Yi yaa jaandi, yin da figili mi maama fanma fanma, nani bi nilanba n tiendi maama, bi tama ke U Tienu baa cengi ba kelima bi macianma po.

⁸ Da tiendi mani nani bani, kelima yi Baa U Tienu bani yin luo yaala hali ke yi daa mia o.

⁹ Diidi mani yin baa jaandi maama: Ti Baa yua n ye tanpoli,

¹⁰ A yeli n baa mi gagidima, A diema n cua, A yanbuama n tieni ki tinga nni Nani nani man tiendi maama tanpoli po.

¹¹ Pa ti dinla yaa jiema n dagidi.

¹² Tieni tipo sugili ti tudima po Nani ti moko n tieni sugili yaaba n tudi tipo maama yeni.

¹³ Da tuo tin baa mi tulinma nni. Ama ŋan ga ti o *Biado kani. [Kelima fini n die li bali, leni u paaciamu, Leni ti kpiagidi hali yaa yogunu kuli. Amina.]

¹⁴ Yi yaa puni yaa niba n tudi yipo sugili, yi Baa yua n ye tanpoli mo baa pa yi sugili.

¹⁵ Ama yi yaa puni bi niba sugili, yi Baa moko kan pa yi sugili yi yaa *tuonbiadi po.

Jesu n yedi yaala mi ñoalolima po

¹⁶ Yi yaa luo bu ñoabu yaa yogunu, da biidi mani yi nunmu nani pala lie danba, yaaba n biidi bi nunmu ki baa waani bi niba ke bi luo bu ñoabu. N waani yi i moamoani, bi baa bi panpaani n yeni.

¹⁷ Ama fini, a yaa luo bu ñoabu, ŋan fa a nunga ki sogi tulale,

¹⁸ ke bi niba n da bandi ke a luo bu ñoabu, ama a Baa yua n ye ŋasiili nni bebe n yaa bani. Wani a Baa yua n nua ŋasiili nni baa guani a la.

Tanpoli ŋalimani

¹⁹ Da biliti mani yi ŋalimani ŋanduna nni, ti lulugidi leni i tantonmoani n baa bolindi naankani, a concona n kua ki su naani,

²⁰ ama yin yaa biliti mani yi ŋalimani tanpoli po, ti lulugidi leni i tantonmoani n kan bolini naankani, a concona n kan kua ki su naankani.

²¹ Kelima yi ŋalimani n ye naankani, yi yantiana mo baa ye lankane.

Ti gbanandi yenma

²² Bu nunbu tie ti gbanandi fidisanga. Lanwani a nunbu yaa ŋani, a gbanandi kuli baa yieni bonŋanla,

²³ ama a nunbu yaa ŋani, a gbanandi kuli baa ye li *biigili nni. Yaa yenma n ye a niinni yaa tie biigili, laa biigili baa yaba boncianla.

A kan fidi ki yaa tuuni canbaanba lie po

²⁴ Oba kuli kan fidi ki yaa tuuni canbaanba lie po, kelima o yaa baa nani o canbaakpialo ki bua o canbaalielo, o nan baa taabi o bonkpialo ki fali o bonlielo wani. Yi kan fidi ki yaa taa ki tuuni U Tienu po leni ŋalimani po.

Dugi U Tienu po

²⁵ Li tie lani yaa po ke n yedi yi, da yagi mani yi yama yi miali yema po, yin baa di yaala leni yin baa ñu yaala, leni yi gbanandi po yin baa yie yaala. Yii bani ke li miali cie mi jiema, ke ti gbanandi mo cie ti tiayiekaadi?

²⁶ Diidi mani ti bonyugiditi, baa coagi, baa yendi, baa wuo ki kuodi liba a buana nni. Ama yi Baa yua n ye tanpoli n dindi ba. Yii bani ke yi pia mayuli ki cie ti bonyugiditi?

²⁷ Yi siiga ŋme yanyagidi n baa teni wan fidi ki foagidi o miali dana baa waamu?

²⁸ Lanwani be yaa po ke yi bangi li bonyiekaala po? Diidi mani mi moapuuma n ye maama. Maa tuuni, maa pia gaali,

²⁹ baa yeni, n yedi yi ke baa o bado Salomono leni o kpiagiciandi kuli, waa den pundi mi siiga nni baa yenma n bobi maama.

³⁰ U Tienu yaa bobindi yaa muadi n ye ku muagu nni dinla, ke bi baa fa ki taa ti ki cuoni mi fantama u fanu nni, laa pia kuli tama ke o baa yieni yi mo, yinba yaaba yaa *dandanli n ki fuu, bi yeni kaa?

³¹ Lanwani, yin daa yagini mani yi yama ki yaa tua: ‹Ti baa je be? Ti baa ño be? Ti baa yie be?›

³² Kelima laa bonla kuli tie bi nilanba n lingi yaala. Yi Baa yua n ye tanpoli bani ke laa bonla kuli tie yipo tiladi.

³³ Yin kpa lingi mani wani *U Tienu diema leni o yaa teginma, lani, laa bonla kuli baa yuandi ki pugini yipo.

³⁴ Lanwani, da yagi mani yi yama saala po, saala baa pia o yanyagidi o yuli po. Daali kuli pia li yaa fala ke li dagidi.