Matie 28 - Gourmanchéma Bible

¹ Mi *fuodima daali n den pendi, a danleleeda cilima daali, ku tiŋaapanpangu Magidala yaa Maliyama leni Maliyama toa den gedi ki baan le li kuli.

² Lanyogunu ki tinga den digibi boncianla. O Diedo maleki den ñani tanpoli ki jiidi, ki cua ki bindi yaa tanpabigu n den piigi li kuli buliñoabu ki kali kupo.

³ O kaani kuli den yieni nani mi tañigima yeni, o tiayiekaadi mo den pieni paipai.

⁴ Ti jawaandi den cuo yaaba n ji li kuli ke bi digibi ki baa ki bibili nani bi tinkpiba yeni.

⁵ Maleki yeni den yedi bi puoba: «Yinba wani n da jie mani, n bani ke yi lingi Jesu ban den joani yua li *dapoanpoanli po.

⁶ Waa go ye ne, kelima o fii bi tinkpiba siiga nani wan den yedi maama. Cua mani ki le wan den dua naankani,

⁷ ki gedi mani tontoni ki ban waani o ŋoadikaaba ke o fii bi tinkpiba siiga. O ga yi liiga ki caa *Galile. Yi baa le o lanpo. N waani yi.»

⁸ Baa ke ti jawaandi den pia bi puoba yeni, bi pala den mani boncianla, ke bi jaligi ki ñani li kuli kani ki sani ki baan pa o ŋoadikaaba o laabaalo.

⁹ Ban den caa yaa yogunu, Jesu den tuogi ba ki yedi: «N faandi yi.» Bi den nagini ki gbaani o nintuali ki cuo o taana, ki kpiagi o.

¹⁰ Jesu den yedi ba: «Yin da jie mani, gedi mani ki ban waani n kpiiba ke ban gedi Galile, bi baan le nni lanpo.»

Yaaba n den guudi li kuli n togidi yaala

¹¹ Bi puoba yeni n den ye u sanu nni yaa yogunu, yaaba n den ji li kuli siiga bi tianba den kua u dogu nni ki ban togidi bi kopadicianba yudanba yaala n tieni kuli.

¹² Bi yudanba den taani leni bi *nikpeliba ki juogi, ki teni a minteela i ligi boncianla,

¹³ ki yedi ba: «Yin yedi mani ke o ŋoadikaaba den cua ku ñiagu ki suni o ke yi goa.

¹⁴ Gufeneeli yaa bandi, ti baa duani o yama ki teni ke liba kan tieni yi.»

¹⁵ A minteela den ga i ligi ki ban tieni nani ban waani ba maama. Laa faama den yadi Jufinba siiga ki baa ye hali dinla.

Jesu doagidi o yuli o ŋoadikaaba po

¹⁶ Jesu ŋoadikaaba, bi piiga n niyendiba yeni, den gedi Galile, Jesu n den waani ba yaa juali po.

¹⁷ Ban den laa o, bi den labini ki kpiagi o. Ama bi tianba yama den lengidi ke baa daani li yaa tie wani.

¹⁸ Jesu den nagini ki yedi ba: «U Tienu puni nni u paalu kuli tanpoli leni ki tinga nni kuli.

¹⁹ Lanwani, yin gedi mani ki tieni i nibuoli nni kuli bi ŋoadikaaba, ki *batisi ba Baa yeli nni, Bijua yeli nni leni U Tienu Fuoma Yua yeli nni, ki bangi ba ban yaa kubi min den yedi yi yaala kuli.

²⁰ N baa yaa ye leni yi yaa yogunu kuli, hali ŋanduna juodima.»