Matie 27 - Gourmanchéma Bible

¹ Ku tiŋaapanpangu, bi kopadicianba yudanba leni Jufinba *nikpeliba kuli den taani ki juogi ke bi baa teni ban kpa Jesu.

² Bi den loli o, ki gedini o ki ban teni o Pilata yua n den tie gufeneeli.

Judasa kuuma

³ Judasa, yua n den janbi Jesu n den laa ke bi jia wani Jesu buudi ki kadi ke bi baa kpa o, o den mua ke o yaa bi janbi o, ki den taa a kujapien-piitaada ki gedini bi kopadicianba yudanba leni bi nikpeliba kani

⁴ ki yedi: «N tieni ti *tuonbiadi ki janbi yua n naa pia tagili.» Bi den goa ki yedi o: «Lani mo nan ŋua tii? Li ŋua fine.»

⁵ Judasa den luni i ligi yeni U Tienu diegu nni ki ñani ki gedi ki ban soadi o yuli.

⁶ Bi kopadicianba yudanba den gandigandi i ligi yeni ki yedi: «Laa pundi laa ligi n kua U Tienu diegu ligitiagu nni, kelima li tie mi soama yaa ligi.»

⁷ Ban den juogi, bi den taa laa ligi ki da o maado kuanu, ke u tua bi canba kupiikaanu.

⁸ Lani yaa po ke bi yi laa kuanu mi soawulima kuanu hali dinla.

⁹ Lani, o sawalipualo Jelemi n den maadi yaa maama den tieni: «Bi den taa kujapiena piitaa, Isalele yaaba n den biigi Ki sua ke o dunga pundi maama,

¹⁰ Bi den taa yi ki da o maado kuanu, Nani o Diedo n den yedi nni maama.»

Jesu sedi Pilata nintuali

¹¹ Jesu den sedi gufeneeli nintuali. Gufeneeli den buali o: «A tie Jufinba bado bi?» Jesu den goa ki yedi: «Fini n yedi yeni.»

¹² Bi kopadicianba yudanba leni bi nikpeliba den kuli o, ama waa den guani liba.

¹³ Lane Pilata den yedi o: «Ŋaa gba ban kuliti a yaala kuli po?»

¹⁴ Jesu naa den lebidi o maamaba. Li den paki gufeneeli boncianla.

Pilata jia ki kadi ke ban kpa Jesu

¹⁵ Mi *Pendima jaanma kuli, gufeneeli den maani ki yen faabi kpaadiyenli, ku niligu n mia o wan faabi yua.

¹⁶ Laa yogunu bi den pia kpaadiyenli ke bi yi o Balabasa ke bi niba kuli bani o biadima po.

¹⁷ Ku niligu n den taani, Pilata den yedi ba: «Yi bua min faabi yipo ŋme, Balabasa bi, bi Jesu ban yi yua Kilisiti?»

¹⁸ Kelima o den bani ke bi cuo Jesu ki cuani o li bujiali kani kelima li nunponbiadili po.

¹⁹ Wan da den ka o bujiakaanu mo, o pua den soani u tondu o kani ki yedi o: «Ŋan da kua o naa niteginka maama nni, kelima yaa ñiagu n pendi na, n laa fala boncianla ti dangidi nni kelima opo.»

²⁰ Bi kopadicianba yudanba leni bi nikpeliba den tundi ku niligu ke bi mia Pilata wan faabi Balabasa ki teni ban kpa Jesu.

²¹ Gufeneeli Pilata go den yedi ba: «Bani bonba lie siiga yi bua min faabi yipo ŋme?» Bi den goa ki yedi o: «Balabasa.»

²² Pilata den yedi ba: «N nan baa tieni Jesu, ban yi yua Kilisiti mo lede?» Bikuli den goa ki yedi o: «Ban joani o li *dapoanpoanli po.»

²³ Gufeneeli den yedi: «O tieni be biadime?» Bi go den tangi ke li pa ki cie: «Ban joani o li dapoanpoanli po.»

²⁴ Pilata n den laa ke o maama ki baa sedima lipo, ke ku fuugu mo pugidi, o den taa mi ñima ki nidi o nii ku niligu nintuali ki yedi: «Mii pia tagiliba o naa niteginka soawulima nni. Li ŋua yinbe.»

²⁵ Ku niligu kuli den goa ki yedi o: «O soama n baa tinba leni ti bila po.»

²⁶ Lani, Pilata den faabi bipo Balabasa. O den teni ke bi pua Jesu i baliji, ki teni o bi nuu nni ban ban joani o li dapoanpoanli po.

Loma yaaba minteela ñuadi Jesu

²⁷ Gufeneeli Pilata minteela den kuani Jesu wani gufeneeli diegu nni wan ja ti buudi naani, ki taani bi cagili kuli ki lindi o.

²⁸ Bi den landi o tiadi ki golini o bu kpalimoanbu.

²⁹ Bi den taa i konkoni ki piani nani ki badifogiliga yeni ki cibini o, ki mubini o jienu li kankagili. Bi den gbaandi o nintuali ki ñuadi o nani o tie bado yeni ki tua: «Ti fuondi a, fini Jufinba bado.»

³⁰ Bi den siini opo ti ñinsandi, ki taa li kankagili ki pua o yuli po.

³¹ Ban den ñuadiñuadi o yeni ki gbeni, bi den goliti bu kpalibu ki goa ki lani o o yaa tiadi ki ñani o ki gedini, ki baan joani o li dapoanpoanli po.

Bi joani Jesu li dapoanpoanli po

³² Ban den caa, bi den tuogi Silena dogu yua ke o yi Simono, ki tieni u paalu ke o bugi Jesu dapoanpoanli.

³³ Bi den pundi ban yi yaa kaanu Goligota, lani n bua ki yedi “Ku Yukuokuogu kaanu.”

³⁴ Bi den teni Jesu yaa duven n kali leni yaa ñoagu n to ke wan ño. Ama wan den leni o waamu, waa den ñuni.

³⁵ Ban den joani o li dapoanpoanli po bi den taa o tiayiekaadi ki toani tiatia ki boagidi ti. [Bi den tieni yeni ke o sawalipualo n den maadi maama n tieni: «Bi den boagidi n tiayiekaadi bi siiga, ki toani tiatia n liadicianli po.]»

³⁶ Lani, bi den kali ki ji o.

³⁷ Bi den kpaa ki tabini ki yini o yuli po yaa diani n waani yaala yaa po ke bi cuo o: «One n tie Jesu, Jufinba bado.»

³⁸ Bi den joani sanjiaba lie a dapoanpoana po ki taani leni o, yendo o jienu po, o yua o ganu po.

³⁹ Bi santagiba den sugidi o, ki fegini bi yula ki tua:

⁴⁰ «Fini yua n baa mudi U Tienu diegu ki goa ki maa li dana taa, ga a yuli naa. A yaa tie U Tienu Bijua, ŋan jiidi li dapoanpoanli po.»

⁴¹ Bi kopadicianba yudanba leni li *bali maama bangikaaba leni bi *nikpeliba kuli moko den ñuadi o yeni ki tua:

⁴² «O den ga nitoaba ki nan kan di fidi ki ga o yuli. O yaa tie Isalele buolu yaaba bado moamoani wan jiidi li dapoanpoanli po moala na, lanwani ti baa tuo ki daani o.

⁴³ O dugi U Tienu po, U Tienu yaa bua o moamoani, wan nan ga o moala. Kelima o den yedi: ‹N tie U Tienu Bijua yo.› »

⁴⁴ Ban den taani ki joani o leni yaa sanjiaba a dapoanpoana po moko den sugidi o.

Jesu kuuma

⁴⁵ Ki cili u yensiicocolu, li *biigili den tieni ki tinga nni kuli ki yaa caa hali li yenlebidili.

⁴⁶ Li yenlebidili po yeni, Jesu den tiani boncianla: «Eli, Eli, lama sabakitani?» Lani n tie: “N Tienu, n Tienu, be yaa po ke a ŋa nni?”

⁴⁷ Yaa niba n den ye likani bi tianba n den gbadi, bi den yedi: «O yi o sawalipualo *Elia.»

⁴⁸ Tontoni bi siiga nni yendo den sani ki ban taa u cietuogu ki pagini mi ñinmiligima nni ki fini li kankagili, ki yugidi ki teni o ke wan ño.

⁴⁹ O lieba den yedi: «Cedi mani tin le Elia yaa baa cua ki ga o.»

⁵⁰ Jesu go den tiani ke li pa, ki cabi o naano ki kpe.

⁵¹ Lanyogunu U Tienu diegu nni *kpalidoaginkaabu den padi siiga nni, ki cili tanpoli ki ban jiidi hali tinga, ki boagidi kaani lie. Ki tinga den digibi, a tana den yagidi,

⁵² A kula den yaadi, U Tienu nigagidiŋanba yaaba n den kpe siiga, boncianla den fii bi tinkpiba siiga.

⁵³ Bi den ñani a kula nni. Jesu fiima bi tinkpiba siiga puoli, bi den kua u dogagidiko nni ke bi niba boncianla laa ba.

⁵⁴ Minteela kobiga yudaano leni yaaba n den taa leni o ki ji Jesu kuli n den laa mi tindigibima leni yaala n tieni kuli, ti jawaandi den cuo ba boncianla, ke bi yedi: «Moamoani, one den tie U Tienu Bijua yo.»

⁵⁵ Bi puoba boncianla moko den ye likani ki se foagima ki diidi, Jesu n den ñani *Galile ke yaaba n ciani o ki todi o o yema po.

⁵⁶ Li den pia bi siiga Magidala yua Maliyama, leni Maliyama yua n den tie Jaka leni Josefi naa, leni Sebede bila yaa naa.

Jesu piinma

⁵⁷ Ku jofangu yogunu yaa piado n yi Josefi ki tie Alimate dogu yua den cua. O moko den tie Jesu ŋoadika.

⁵⁸ O den gedi Pilata kani ki ban mia o wan teni o Jesu o kpiemo. Pilata den yedi ban teni o.

⁵⁹ Josefi den taa o kpiemo ki bobini *len kpalipanbu,

⁶⁰ ki duani o o kupanli nni, wan den teni ke bi kpiedi yaali ku tangu nni. O den bindi ku tanpabigu ki biini li kuli ñoabu ki ban kuni.

⁶¹ Magidala yua Maliyama leni Maliyama toa den ye likani ki ka ki tiegi li kuli.

Bi guudi Jesu kuli

⁶² Lan den fii ki fa, lani tie li boginli daali fiifaama, bi kopadicianba yudanba leni *Falisieninba den taani ki gedi Pilata kani

⁶³ ki yedi o: «Ti daano, ti tiadi ke laa boandi daano n da den fo yaa yogunu, o den yedi ke dana taa yaa pendi ke o baa fii bi tinkpiba siiga.

⁶⁴ Lani yaa po ŋan teni ban yaa ji li kuli hali dana taa daali ke o ŋoadikaaba n da ti cua ki su o, ki yedi bi niba ke o fii bi tinkpiba siiga. Laa boandiyuami di baa bia ki cie li bonkpiala.»

⁶⁵ Pilata den yedi ba: «No mani yaaba n ji nne. Gedi mani ki ban jiidi li kuli yin fidi maama kuli.»

⁶⁶ Bi den gedi li kuli po ki tieni ku tanpabigu yeni po yaa maalima ke o nilo yaa biidi bi baa bandi, ki sieni bi jiidikaaba.