Matie 15 - Gourmanchéma Bible

¹ *Falisieninba leni li *bali maama bangikaaba tianba den ñani Jelusalema ki cua Jesu kani ki yedi o:

² «Be yaa po ke a ŋoadikaaba miidi ti nikpiaba bogida? Kelima bi yaa baa je kuli, bi kan nidi bi nii.»

³ Jesu den goa ki yedi ba: «Be yaa po ke yi mo miidi U Tienu *bali maama, ki bua ki kubi yi bogida?

⁴ Kelima U Tienu yedi: ‹Jigini a baa leni a naa,› ki go yedi: ‹Yua n soli o baa yaaka o naa li pundi ban kpa o.›

⁵ Ama yinba, yi yedi ke o nilo yaa yedi o baa, yaaka o naa, ke wan den baa todi ba leni yaala tie yaa paabu n gagidi U Tienu po.

⁶ Yeni yi bolini U Tienu maama ki nan kubi yi bogida.

⁷ Yinba pala lie danba na, *Esayi n den pua sawali yipo yaala na po tie moamoani:

⁸ ‹Bi naa niba jigindi nni leni bi ñoacuuna, Ama bi pala foagi leni nni.

⁹ Bi jaandi nni fanma fanma Kelima bi bangi yaa bangima, N tie bi nisaaliba yaa mabilikaama bebe.› »

Yaala n joagindi o nisaalo

¹⁰ Jesu den yini ku niligu ke ku nagini o kani ke o yedi ba:

¹¹ «Cengi mani ki gbadi. Laa tie yaala n kua bu ñoabu nni ka *joagini o nisaalo, yaala n ña bu ñoabu nni n joagini o.»

¹² Li yaa puoli o ŋoadikaaba den nagini o kani ki yedi o: «A bani ke ŋan maadi yaa maama yeni tie Falisieninba po tingbali bonla?»

¹³ O den goa ki yedi ba: «N Baa yua n ye tanpoli n kaa ŋu yaa tibu kuli, bi baa ŋabi bu.

¹⁴ Cedi ba mani, bi tie yaa juama n dia a juama. Juamo yaa dadi juamo mo, bani bilie kuli n baa baa ku buogu nni.»

¹⁵ Pieli den yedi o: «A kan bundi tipo mi kpanjama yeni?»

¹⁶ Jesu den yedi o: «Yi moko yii pia yanfuoma yoo?

¹⁷ Yii bani ke yaala n kua bu ñoabu nni kuli caa ku tugu nni ki go baa ña kaa?

¹⁸ Ama yaala n ña bu ñoabu nni tie yaala n bi ye li pali nne ki di ñani, lani n joagini o nisaalo.

¹⁹ Kelima ti yanmaalibiadi leni mi kukpama leni mi *conconma buoli kuli leni bu subu leni mi siedi faama leni ti sugidi kuli ña li pali nne.

²⁰ Lani n tie yaala n joagini o. Ama ki je kaa nidi kan joagini o nisaalo.»

Kanana buolu pua dandanli

²¹ Jesu den fii ki ñani lankani ki gedi Tili leni Sidoni tinkundogi.

²² Yaa pua n den tie likani maabiga, ki tie Kanana yua, den cua o kani ki kpaani ki tua: «O Diedo, Dafidi Bijua, gbadi npo mi niñima? Ki cicibiadiga ye n bisalo niinni ki yagini o yama hali ke li bia.»

²³ Jesu naa den goa ki yedi o liba kuli. O ŋoadikaaba den nagini o kani ki yedi o: «A kan cabi o, kelima o ŋua ki kpaani ti puoli.»

²⁴ Jesu den goa ki yedi: «Baa den soani nni nitoaba po se Isalele buolu yaaba po, bani yaaba n tie nani yaa pe n yaadi yeni po.»

²⁵ Ama o pua yeni den cua Jesu kani ki gbaani o nintuali ki yedi: «O Diedo, todi nni.»

²⁶ Jesu den goa ki yedi o: «Laa tiegi o nilo n taa a bila jiema ki lu a sangbanbila.»

²⁷ O pua den yedi: «Yeni de, n Diedo, die a sangbanbila yen di yaa jejoagidi n baali bi danba saajekaanu kani.»

²⁸ Jesu den yedi o: «Pua, a *dandanli yaba boncianla. Lan tieni apo nani ŋan bua maama.» Lanyogunu o bisalo den paagi.

Jesu paagi bi niba boncianla

²⁹ Jesu den fii ki ñani lankani ki baali *Galile ñincianma. O den doni ki kali li juali po.

³⁰ Ku niligu den cua o kani boncianla, ki kpendinni a diama leni a juama leni a muula leni a woma leni a tadima leni yiantoana boncianla. Bi den cua ki duani ba Jesu taana kani ke o paagi ba.

³¹ Ku niligu n den laa ke a muula maadi, ke a tadima paagi, ke a diama cuoni, ke a juama mo noadi, li den paki ba ke bi kpiagi Isalele yaaba Tienu.

Jesu dini niba tudanaa

³² Jesu den yini o ŋoadikaaba ki yedi: «Mi niñima cuo nni ku naa niligu po, kelima dana taa nna ke bi ye n kani, baa go pia ban baa je yaala. Mii bua ki cabi ba leni mi koma, ban da ti gbali u sanu nni.»

³³ O ŋoadikaaba den yedi o: «Ti baa tieni lede li naa fuali nni ki baa yaa jiema n baa guoni ku naa niligu kuli?»

³⁴ Jesu den yedi ba: «Yi pia dupen bonba ŋa yo?» Bi den goa ki yedi o: «Bonba lele leni janbimuba.»

³⁵ Lani o den teni ke ku niligu kakali tiipo.

³⁶ O den taa bi dupenleleediba leni i jami ki jaandi, ki cabidicabidi ki teni o ŋoadikaaba ke bi boagidi ku niligu.

³⁷ Bikuli den dini ki guo. Bi den wodi yaa boncaba n sieni, ki gbieni baabuociandi lele.

³⁸ Yaaba n den dini den pundi jaba tudanaa (4 000), kaa taani bi puoba leni a bila.

³⁹ Li yaa puoli Jesu den cabi ku niligu, ki kua ku ñinbiagu nni ki gedi Magadana tinga nni.