Matie 13 - Gourmanchéma Bible

¹ Laa daali Jesu den ñani deenni ki gedi ki ban kali mi ñincianma kunu.

² Ku niligu den taani o kani boncianla, hali ke o kua ki kali ku ñinbiagu nni. Ku niligu yeni kuli den se li wali po.

³ O den pua mi kpanjama ki waani ba bonla boncianla. O den cili ki yedi:

⁴ «O kpakpaalo den ñani ki baa pagi o bonbuoli. Wan den pagini, i tiami den baa u sankunu ke ti bonyugiditi cua ki dini yi.

⁵ I tiami mo den baa ki tancaliga po, mi tama n ki yaba naani. Yi den pudi tontoni kelima mi tama ki yaba likani.

⁶ Ama u yienu n den paagi, i den mali ki kuodi, kelima jiinmoani ki den ye.

⁷ I tiami mo den baa ti konkondi nni. Ti konkondi den fii ki dini i.

⁸ I tiami mo den baa ki tinŋanga nni. I den loni, bonbiyenbu kobiga kobiga, i tiami piiluoba luoba, i tiami mo piitaa taa.

⁹ Yua n pia a tuba ki baa gbadi, wan gbadi.»

Jesu n pua mi kpanjama yaala yaa po

¹⁰ Bi ŋoadikaaba den nagini o kani ki buali o: «Be yaa po ke a pua ba mi kpanjama?»

¹¹ O den goa ki yedi ba: «Kelima bi puni yinba yin bandi *tanpoli diema bondoaginkaala. Ama bi naa puni bani ban bandi.

¹² Bi baa pa ki pugini yua n pia, wan baa ki pugini, ama yua n ki pia wani, bi baa ga o kani baa wan pia yaala.

¹³ Lani yaa po yo ke n pua ba mi kpanjama, kelima baa ke bi nua, baa laa liba, baa ke bi cengi mo, baa bandi liba, baa gba liba mo.

¹⁴ Esayi n den pua yaa sawalo maama tieni ki dudi laa niba kani. O den yedi: ‹Yi baa gba leni yi tuba ki nan kan ga liba, Yi baa nua leni yi nuni ki nan kan le liba,

¹⁵ Kelima bi naa niba pala tua pajuaga. Bi biini bi tuba ki ŋubini bi nuni Ke ban da le leni bi nuni, Ki da gbadi leni bi tuba, Ki da ga leni bi pala, Ke ban da ti lebidi bi yama ke min paagi ba.›

¹⁶ Ama li pamanli ye leni yi kelima yi yaa nuni wani nua, yi tuba mo gba.

¹⁷ N waani yi i moamoani, bi sawalipuaba leni bi niteginkaaba boncianla den bua ki le yin nua yaala na, ki naa laa la, bi den bua ki gbadi yin gba yaala na, ki naa gbadi la.

Jesu bundi i bonbi pagima kpanjama

¹⁸ Lanwani, cengi mani o kpakpaalo kpanjama bundima.

¹⁹ O nilo yaa cengi *U Tienu diema maama, ki naa ga man bua ki yedi yaala, o *Biado cua ki ñani ban pagi yaama o pali nni. Lani n tie yua n baa yaa bonpagikaala n pagi u sankunu.

²⁰ Yi n den baa ki tancaliga nni tie nani yua n gbadi mi maama, ki ga ma tontoni leni li pamanli.

²¹ Ama waa pia jiinmoani o pali nni. O kan fidi ki juuni ki sedi. Mi yebiadima yaa cua, yaaka bi niba yaa waani o fala kelima mi maama po, tontoni se wan gbali ki baa.

²² Yi n den baa ti konkondi nni tie nani yua n gbadi mi maama, ama ŋanduna yema yanyagidi leni ŋalimani boandi kuli dini ma ki teni ke maa luoni pu.

²³ Yi n den baa ki tinŋanga nni mo tie nani yua n gbadi mi maama ki yen ga ma. O luoni li bonluonkaala, bonbiyenbu loni kobiga, bune piiluoba, bune mo piitaa.»

Ti moabiaditi kpanjama

²⁴ Jesu go den pua ba kpanjatoama ki yedi: «*Tanpoli diema baa tie nani yaa nilo n den buli yaa bonbulikaala n ŋani o kuanu nni.

²⁵ Ama bi niba n den goa yaa yogunu, o yibali den cua ki buli o bonbulikaala yeni siiga ti moabiaditi, ki lebidi ki kuni.

²⁶ *Ŋalikama n den pudi ki kpedi ki luoni, ti moabiaditi moko den kpedi.

²⁷ Bi naacenba den cua ki yedi o koadaano: ‹Canbaa, ŋaa den buli yaa bonbuoli n ŋani ka a kuanu nni yoo? Be nan tieni ke ti moabiaditi mo ye lienni?›

²⁸ O den goa ki yedi ba: ‹Yibaloba n tieni laa bonla.›

²⁹ O naacenba den yedi o: ‹A bua tin gedi ki ban ŋabi ti bi?› O den yedi ba: ‹A-a, cedi mani, ke yi yaa ŋabi ti moabiaditi, yin da ti taani ki ŋabi leni ŋalikama.

³⁰ Cedi mani likuli n yaa taa ki kpedi hali u jetaagu yogunu n pundi. Laa yogunu n baa yedi bi dipeba: Yin kpa ŋabi mani ti moabiaditi ki taani ki loli ban sia ti, ama yin taani ki kuodi ŋalikama wani n buali nni.› »

Mutaadi leni li dabinli kpanjama

³¹ Jesu go den pua ba kpanjatoama ki yedi: «Tanpoli diema tie nani yaa nilo den buli yaa kpintiigu n yi mutaadi yaa bonbibu o kuanu nni.

³² Laa bonbibu n wa ki cie i bonbi kuli, ama bu yaa pudi, bu yen kpedi ki cie ti kpintiidi kuli ki tua tibu, ke ti bonyugiditi kpendi ki tiendi bi tiana bu beni po.»

³³ O go den pua ba mi naa kpanjama: «Tanpoli diema tie nani li *dabinli ke o pua taa ki buuni yonyiemu taa, ki sieni hali likuli n pili.»

³⁴ Jesu den waani ku niligu laa bonla kuli leni mi kpanjama. Waa den maadi leni ba kaa pua kpanjama.

³⁵ O den tieni yeni ke o sawalipualo n den maadi yaa maama na n tieni: «N baa yaadi ki maadi leni ba mi kpanjama nni, N baa doagidi yaa bonla n wuo hali ŋanduna tagima yogunu.»

Jesu bundi ti moabiaditi kpanjama

³⁶ Li yaa puoli Jesu den cabi ku niligu ki kua deenni. O ŋoadikaaba den nagini o kani ki yedi o: «Bundi tipo yaa moabiaditi n ye u kuanu nni kpanjama.»

³⁷ O den goa ki yedi ba: «Yua n buli yaa bonbuoli n ŋani yeni tie o *Ja Bijua.

³⁸ U kuanu mo tie ŋanduna. Yaa bonbuoli n ŋani tie U Tienu diema bila. Ti moabiaditi tie o Biado yaa bila.

³⁹ Yibali yua n buli ti moabiaditi tie Sutaani. U jetaagu yogunu tie ŋanduna juodima. U jetaagu danba mo tie malekinba.

⁴⁰ Nani ban yen ŋabi ti moabiaditi ki sia maama, ŋanduna juodima mo li baa tua yeni.

⁴¹ O Ja Bijua baa soani o malekinba ban taani ki ñani o diema nni yaaba n tulini bi niba kuli leni yaaba n tiendi mi biadima kuli,

⁴² ki lu ba ki buaga fantama nni, a bubula leni mi ñincegima n baa ye naankani.

⁴³ Laa yogunu bi niteginkaaba baa yendi nani u yienu yeni bi Baa yaa diema nni. Yua n pia a tuba ki baa gbadi wan gbadi.

Yaa ŋalimani n wuo yaa kpanjama

⁴⁴ Tanpoli diema go tie nani yaa ŋalimano den wuo u kuanu nni yeni. O nilo den piidi o ki goa ki wuoni. Lanwani o pamanli po, o gedi ki ban kuadi wan pia yaala kuli ki da laa kuanu.

Yaa lanbima n pia dunpaaga yaa kpanjama

⁴⁵ Tanpoli diema go tie nani yaa kpendo n den lingi yaa lanbima n ŋani boncianla.

⁴⁶ Wan den laa yaa lanbima ke mi dunga yaba boncianla, o den gedi ki ban kuadi wan pia yaala kuli ki da ma.

U taalu yaa kpanjama

⁴⁷ Tanpoli diema go tie nani ban luni yaa taalu mi ñincianma nni ki co i janbuoli kuli.

⁴⁸ U yaa gbie, bi yen dadi ki ñani u li boanjaali po, ki kali ki gandi yaa jami n ŋani ki tieni ti baabuodi nni, ki lu yi n ki ŋani.

⁴⁹ Ŋanduna juodima li baa tua yeni. Malekinba baa cua ki paadi bi nibiadiba ki ñani ba bi niteginkaaba siiga,

⁵⁰ ki lu bi nibiadiba ki buaga fantama nni, a bubula leni mi ñincegima baa ye naankani.»

Li bonpanla leni li bonkpelila

⁵¹ O den buali ba: «Naani yi gbadi laa bonla kuli bonŋanla?» Bi den goa ki yedi o: «Mm.»

⁵² O den yedi ba: «Lanwani li *balimaama bangikaaba siiga yua n tuo ki ga yaala n tie tanpoli diema bonla kuli, tie nani yaa diedaano n ñandi o ŋalimano nni li bonpanla leni li bonkpelila kuli.»

Nasaleti dogu yaaba yie Jesu

⁵³ Jesu n den pua laa kpanjama kuli ki gbeni, o den fii ki ñani lankani

⁵⁴ ki guani o dandogu nni. O den kua ki bangi li *bali maama bangima dieli nni. Li den paki yaaba n den gbadi o maama kuli ke bi den tua: «One mo baa mi naa yanfuoma leni mi naa bancianma kuli le?

⁵⁵ Waa tie o kpagikpielo yaa bijua kaa? Maliyama ka tie o naa? Jaka leni Josefi leni Simono leni Juda ka tie o waamu?

⁵⁶ O naataanpola mo kuli ki ye ti siiga kaa? O ñani li naa bonla kuli mo le?»

⁵⁷ Lani o den tie bipo li tingbali bonla. Jesu den yedi ba: «Bi kan fali sawalipualo kaanto ke laa tie o dandogu nni leni o diegu nni.»

⁵⁸ Waa den tieni mi bancianma boncianla likani kelima bi dandanluoma po.