Matie 1 - Gourmanchéma Bible

Jesu yaajanba

¹ Jesu Kilisiti yaajanba yela togida ye ne. Jesu Kilisiti den tie Dafidi bijua, leni Abalahama bijua.

² Abalahama den mali Isaaka, Isaaka n maa Jakobo, Jakobo n maa Juda leni o kpeliba leni o waamu.

³ Juda den taa Tamala ki mali Peletisa leni Sela, Peletisa n maa Etisilomo, Etisilomo n maa Alama,

⁴ Alama n maa Aminadabi, Aminadabi n maa Nasona, Nasona n maa Salimono,

⁵ Salimono den taa Lahaba ki mali Boasa. Boasa den taa Luta ki mali Obedi,

⁶ Obedi n maa *Isayi, Isayi n maa o bado Dafidi. Dafidi den taa Uli pua ki mali Salomono,

⁷ Salomono n maa Loboami, Loboami n maa Abia, Abia n maa Asa,

⁸ Asa n maa Josafati, Josafati n maa Yolami, Yolami n maa Osiasi,

⁹ Osiasi n maa Yotami, Yotami n maa Akasi, Akasi n maa Esekiasi,

¹⁰ Esekiasi n maa Manase, Manase n maa Amoni, Amoni n maa Josiasi,

¹¹ Josiasi n maa Jekonia leni o waamu, Babilona yaaba n den paadi Isalele yaaba yaa yogunu, ki cuo ba ki gedini ti yonbidi bi diema nni.

¹² Isalele yaaba yonbidi Babilona diema nni n pendi, Jekonia den mali Salatieli, Salatieli n maa Solobabeli,

¹³ Solobabeli n maa Abiyudi, Abiyudi n maa Eliakimi, Eliakimi n maa Asolo,

¹⁴ Asolo n maa Sadoka, Sadoka n maa Akima, Akima n maa Eliyudi,

¹⁵ Eliyudi n maa Eleyasala, Eleyasala n maa Matana, Matana n maa Jakobo,

¹⁶ Jakobo n maa Josefi, Maliyama calo, yaa pua n den mali Jesu ke bi yi o Kilisiti.

¹⁷ A yaa coadi ki cili Abalahama ki yaa caa hali Dafidi, li pia piiga n nifiima naa. Ki cili Dafidi ki yaa caa hali Babilona cuonu mo, piiga n nifiima naa. Ki cili Isalele yaaba yonbidi Babilona diema nni ki yaa caa hali *U Tienu n Gandi Yua cuama, mo tie piiga n nifiima naa.

Jesu Kilisiti madi

¹⁸ Diidi Jesu Kilisiti madi n den tua maama. O naa Maliyama n da den tie Josefi toginaa hali ke bi daa den taani leni biyaba, Maliyama den ti sua ke o punbi kelima U Tienu Fuoma Yua paalu po.

¹⁹ O togibaa Josefi yua n den tie niteginka, naa den bua ki fiagi o a sala nni. Lani yaa po o den jagi ke o baa paadi leni o ŋasiili nni.

²⁰ Wan den maliti yeni yaa yogunu, o Diedo maleki den doagidi o kani ti dangidi nni ki yedi o: «Josefi, Dafidi bijua, ŋan da jie ki taa Maliyama wan tua a pua. Kelima wan punbi yaa biga, o punbi ga kelima U Tienu Fuoma Yua yaa paalu po.

²¹ O baa maa bonjaga, ŋan yini o Jesu, kelima wani n baa faabi o niba leni bi *tuonbiadi.»

²² Lankuli den tieni ke o Diedo n den tuodi ki teni ke o sawalipualo pua yaa sawalo n tieni:

²³ «Diidi, li *powandiali baa punbi ki maa bonjaga. Bi baa yini o Emanuweli.» Laa yeli bundima n tie “U Tienu ye leni ti.”

²⁴ Josefi n den fundi, o den tieni o Diedo maleki n waani o yaala. O den taa o pua.

²⁵ Ama waa den taani leni o hali wan ban mali o biga. Josefi den yini o Jesu.