Marki 9 - Gourmanchéma Bible

¹ O go den yedi ba: «N waani yi i moamoani, yaaba n ye nekanba siiga bi tianba kan kpe kaa laa ke *U Tienu diema cua leni u paaciamu.»

Jesu lebidi cain

² Dana luoba n den pendi, Jesu den taa Pieli leni Jaka leni Jan, bani bebe ke bi piadi ki doni yaa juali n kpedi yuli po. O den lebidi ke bi nua.

³ O tiayiekaadi den pendi paipai ki ñuliti boncianla, hali maama ke li tiaŋuudo daa ye ŋanduna nni ki baa fidi ki pendi ti yeni.

⁴ *Elia leni Musa den doagidi bikani ki maadi leni Jesu.

⁵ Pieli den yedi Jesu: «Canbaa, li ŋani tin yaa di ye ne. Tin tii suga taa, fini yenli, Musa yenli, Elia mo yenli.»

⁶ Li den tie kelima waa bani wan baa maadi yaala, ti jawaandi n den cuo ba maama po.

⁷ Ku tawaligu den libini ba, u nialu den maadi ku tawaligu nni ki yedi: «One n tie n Bibuadiga, cengi mani o.»

⁸ Lanyogunu bi ŋoadikaaba den diidi ki lindi, baa laa kuli ke toa ye leni ba se Jesu bebe.

⁹ Ban den ji li juali po, Jesu den yedi ba ke ban da waani oba kuli ban laa yaala, hali wani o *Ja Bijua n fii bi tinkpiba siiga no.

¹⁰ Bi den tieni wan yedi yaala, ama bi den nia leni biyaba bi tinkpiba fiima n tie yaala.

¹¹ Bi den buali Jesu: «Be yaa po ke li *bali maama bangikaaba tua ke li tie tiladi ke Elia n kpa cua no?»

¹² O den goa ki yedi ba: «Li tie moamoani ke Elia baa kpa cua ki ŋanbi li bonla kuli. Lanwani li nan ga lede ke li diani ke o Ja Bijua baa le fala boncianla tiladi, ban go fali o mo?

¹³ N waani yi ke Elia cua no, ama bi soani o ban bua maama, nani lan den diani opo maama.»

Jesu ñani ki cicibiadiga o jawaalo niinni

¹⁴ Ban den pundi yaa ŋoadikaaba n sieni kani, bi den laa ke yaa niligu n yaba lindi ba, ke li balimaama bangikaaba nia leni ba.

¹⁵ Ku niligu kuli n den laa Jesu, li den paki ba. Bi den tiini ki kpendi ki fuondi o.

¹⁶ O den buali o ŋoadikaaba: «Yi nia leni ba be yaa maame po yo?»

¹⁷ Ku niligu siiga yendo den goa ki yedi o: «Canbaa, n cuani n biga a kani, kelima ki cicibiadiga ye o niinni ke o tie muulo.

¹⁸ Ki yaa fii opo naankani kuli, ki yen guli o tinga po, ti ñinsanpunpudi n yaa ña o ñoabu nni, wan yaa kadi o ñina ki kuodi. N bi mia a ŋoadikaaba n deli ki ñani ga o niinni, ke baa fidi.»

¹⁹ Jesu den goa ki yedi ba: «Yinba yaa niba n ki pia *dandanli yeni, n baa yaa taa ki ye leni yi ki pundi u laa yogunu? N baa juuni leni yi ki pundi u laa yogunu yo? Cuani mani ki biga n kani na.» Bi den cuani ki biga o kani.

²⁰ Ki biga n laa Jesu yaa yogunu, ki cicibiadiga den digibi o leni u paalu, ke o baa ki bilini ke ti ñinsanpunpudi ña o ñoabu nni.

²¹ Jesu den buali ki biga baa: «Li naa bonla den cili o hali u laa yogunu yo?» O den goa ki yedi o: «Hali o biwaama nni.

²² Yogunu boncianla ki yen lu o mi fantama nni, yaaka mi ñima nni, ki bua ki bolini o. Ama a yaa baa fidi ki tieni bonlaba, ŋan gbadi tipo mi niñima, ki faabi ti.»

²³ Jesu den yedi o: «Be yaa po ke a yedi: ‹A yaa baa fidi?› Kelima li bonla kuli fidi yua n daani yaa po.»

²⁴ Lanyogunu ki biga ba den kpaani ki yedi: «N daani. Faabi nni leni n dandanluoma.»

²⁵ Jesu n den laa ke ku niligu tiini ki taagi bikani, o den funi leni ki cicibiadiga, ki yedi ga: «Fini ki cicibiadiga, yaaga n muu ki go womi na, n yedi a: ‹Ña ki biga na niinni ki da go kua hali abada.› »

²⁶ Ki cicibiadiga den tiani, ki digibi ki biga boncianla ki ñani ki niinni ki ŋa ga. Ki biga den tua nani ki kpe yeni, hali ke bi nitianba den tua ke ki kpe moko.

²⁷ Ama Jesu den cuo o nuu ki fiini o ke o sedi.

²⁸ Jesu n den ban kua li dieli nni, ke wani leni o ŋoadikaaba ye bi bebe, bi den buali o: «Be yaa po ke tinba wani naa fidi ki deli ki naa cicibiadiga?»

²⁹ O den yedi ba: «Ki naa cicibiadiga buolu kan tuo ki ña, li yaa tie leni i jaandi yaaka.»

Jesu go pua sawali ke o baa kpe ki go fii

³⁰ Bi den fii lankani ki poandi *Galile. Jesu naa den bua oba kuli n bandi bi cenli,

³¹ kelima o den bangi o ŋoadikaaba ki tua ba: «Bi niba baa janbi o Ja Bijua ki teni o bi nisaaliba nuu nni. Bi baa kpa o. Ama o kuuma dataali daali, o go baa fii bi tinkpiba siiga.»

³² Bi ŋoadikaaba naa den bandi mi maama yeni fuuli, ama bi den jie kaa buali o lipo liba.

Yua n tugi li yuli

³³ Bi go den pundi Kapenayuma dogu. Jesu n den ye li dieli nni, o den buali ba: «Yi bi nia be u sanu po?»

³⁴ Bi den ŋmini, kelima u sanu nni bi den nia leni biyaba ki bua ki bandi bi siiga yua n tugi li yuli.

³⁵ Lani, Jesu den kali ki yini bani bi piiga n niliediba yeni, ki yedi ba: «Yua n bua ki tua liiga yua, se wan kpa tua puoli yua ki go tua bi niba kuli naacemo.»

³⁶ Lani o den taa ki biwaaga ki sieni ga bi siiga, ki yuandi ki taa ga ki ŋmabi, ki yedi ba:

³⁷ «Yua n ga a bila ne siiga baa biyenga kelima n yeli po, o ga mini nba yo. Yua n ga mini yaa cangu mo, waa ga mini yaa cangu ka, ama o ga yua n soani nni yaa cangoe.»

Yua n kaa yie Jesu kuli tie ti yua

³⁸ Jan den yedi o: «Canbaa, ti den laa yaa ja n den deli mu cicibiadimu a yeli nni, ke ti yie opo kelima waa ŋua ti.»

³⁹ Jesu den goa ki yedi o: «Da go yie mani opo ke wan da tieni la, kelima niloba ki ye ki baa tieni mi bancianma n yeli nni, ki go maadi npo yaala n bia lanyogunu.

⁴⁰ Yua n naa koani leni ti kuli, taa ti yaa po yo.

⁴¹ N waani yi i moamoani, yua n puni yi mi ñima ke yi ñuni kelima n yeli po leni yi tie mini Kilisiti yaaba po, o kan luo o yaa panpaani.»

Mi tulinma n bia maama

⁴² O go den yedi: «Ama yua n baa teni yaa bonwaamu n daani nni na siiga baa yendo n tudi, li baa ŋani ki cie landaano po ban lani o li naacianli ki lu o mi ñincianma nni.

⁴³ A nuu yaa teni ke a tiendi ti *tuonbiadi, ŋan jia u. A yaa baa yaa miali n kan gbeni ki pia nuyendu, li baa ŋani apo ki cie ŋan yaa pia nii lie ban nan lu ŋa ku *fantanbuogu nni, yaa fantama n kan gbindi niinni, [

⁴⁴ yaa sidibila n lugi bi niba ki kan kpe, leni yaa fantama n kan gbindi hali abada n ye naankani.]

⁴⁵ A taali mo n yaa teni ke a tiendi ti tuonbiadi, ŋan jia li. A yaa pia yaa miali n kan gbeni ki pia taayenli, li baa ŋani apo ki cie ŋan yaa pia taana lie, ban nan lu ŋa ku fantanbuogu nni,

⁴⁶ [yaa sidibila n lugi bi niba ki kan kpe leni yaa fantama n kan gbindi hali abada n ye naankani.]

⁴⁷ A nunbu mo n yaa tie apo tingbali bonla, ŋan logidi bu. A yaa pia nunyenbu ki kua U Tienu diema nni, li baa ŋani apo ki cie ŋan yaa pia nuni lie ban nan lu ŋa ku fantanbuogu nni,

⁴⁸ yaa sidibila n lugi bi niba ki kan kpe leni yaa fantama n kan gbindi hali abada n ye naankani.

⁴⁹ Kelima mi fantama baa kua ki saali bi niba kuli nani mi yaama yeni.

⁵⁰ Mi yaama mani, ama mi yaa ti luo mi manu, yi baa taa be ki go mangi ma? Yaa ye leni yiyaba leni mi yanduanma.»