Marki 8 - Gourmanchéma Bible

¹ Laa dana nni, ku niligu n go den taani boncianla, ke baa den pia ban baa je yaala, Jesu den yini o ŋoadikaaba ki yedi ba:

² «Mi niñima cuo nni ku naa niligu po kelima dana taa nna ke bi ye n kani, baa go pia ban baa je yaala.

³ N yaa cabi ba leni mi koma ke ban kuni, bi baa gbali u sanu nni, kelima bi tianba ñani hali foagima.»

⁴ O ŋoadikaaba den goa ki yedi o: «O nilo baa fidi ki baa yaa jiema n baa dagidi bine kuli po li naa fuali nni?»

⁵ Jesu den buali ba: «Yi pia dupen ŋa yo?» Bi den goa ki yedi o: «Bonba lele.»

⁶ Jesu den teni ke ku niligu kakali tiipo, ki taa bi dupenleleediba ki tuondi U Tienu, ki cabidicabidi ki teni o ŋoadikaaba ban boagidi ku niligu, ke bi den boagidi.

⁷ Bi go den pia janbimuba moko. Jesu go den tuondi U Tienu mupo, ki teni ban boagidi muni mo.

⁸ Bikuli den dini ki guo. Bi den wodi ban dini ki sieni yaa boncaba ki gbieni baabuociandi lele.

⁹ Bi den bua ki pundi niba tudanaa (4 000). Jesu n den cabi ba yaa yogunu,

¹⁰ o den kua ku ñinbiagu nni wani leni o ŋoadikaaba, ki duodi ki gedi Dalimanuta tinbuoli nni.

Falisieninba mia mi bancianma

¹¹ *Falisieninba den cua ki nia leni Jesu ki mia o wan tieni yaala n tie sinankeeni ke o paalu ñani U Tienu kani, kelima bi den dia o ku madiagu.

¹² Jesu den fuo ki jiini ki yedi: «Be n teni ke moala na niba lingi sinankeeni yeni? N yedi yi i moamoani, bi kan tieni moala na niba po sinankeeni.»

¹³ Lani o den fii ki ŋa ba ki go kua ku ñinbiagu nni ki duodi ki gedi nepo yaa boanjaali.

Falisieninba leni Elodo kuli bangima

¹⁴ Bi ŋoadikaaba den sundi kaa taa dupen. Baa den pia jetoama ku ñinbiagu nni, kali dupen yendo bebe.

¹⁵ Jesu den tundi ba ki yedi: «Yin fangi mani yi yula bonŋanla leni Falisieninba leni *Elodo *dabinli.»

¹⁶ O ŋoadikaaba den bungi ki yedi biyaba: «Li tie kelima tin kaa pia dupen yeni yaa po yo.»

¹⁷ Jesu den bandi la ki yedi ba: «Be yaa po ke yi bungi ki tama ke n maadi yeni kelima yii pia dupen po? Yi daa kpaagi ki faami hali moala?

¹⁸ Yi yama baa pii yoo? Yi pia i nuni ki naa nua yoo? Yi go pia a tuba ki naa gba yoo? Naani yii tiani?

¹⁹ Min den taa bi dupenmuudiba ki cabidicabidi ki boagidi a nitudimuuda, yi den taani yaa boncaba n sieni baabuodi ŋa?» Bi den goa ki yedi o: «Piiga n bondi lie.»

²⁰ «Min go den taa bi dupenleleediba ki cabidi ki boagidi a nitudinaada, yi den taani yaa boncaba n sieni baabuociandi ŋa?» Bi den goa ki yedi o: «Bondi lele.»

²¹ O den yedi ba: «Yi daa kpaagi ki bandi hali moala yoo?»

Jesu noadi o juamo Betisayida dogu nni

²² Jesu leni o ŋoadikaaba n den pundi Betisayida, bi niba den cuani o juamo Jesu kani ki mia o ke wan sii o.

²³ O den cuo o juamo nuu ki dadi ki ñani o u dogu nni. O den sii o ñinsandi o juamo nuni nni ki maani opo o nii, ki buali o o yaa nua bonla.

²⁴ O den ŋubidi ki noanli ki yedi: «N nua bi niba, ama n nua ba ke bi tie nani i tiidi yeni ki cuoni.»

²⁵ Jesu go den maani o nii o nuni po, ke o juamo den nudi ki noanli ki laa li bonla kuli cain. O den paagi.

²⁶ Jesu den cabi o wan kuni o denpo, ki maadi o ki yedi: «Da go kua u dogu na niinni.»

Pieli kadi ki waani ke Jesu n tie Kilisiti

²⁷ Jesu leni o ŋoadikaaba den suagi liiga ki caa Filipi yaa Sesale yaa tinkundogi. Ban den ye u sanu nni o den buali ba: «Bi niba tua ke n tie ŋme?»

²⁸ Bi den goa ki yedi o: «Bi tianba tua ke a tie Jan Batisi, bine ke a tie *Elia, bine mo ke a tie bi sawalipuaba siiga nni yendo.»

²⁹ Ama o den buali bani biba: «Yi mo te, yi mo nan yedi ke n tie ŋme yo?» Pieli den goa ki yedi o: «A tie *U Tienu n Gandi Yua.»

³⁰ Jesu den teni ba li ñoabonli ki yedi ba ke ban da waani oba wan tie yua.

Jesu pua sawali ke o baa kpe ki go fii

³¹ Laa yogunu Jesu den bangi o ŋoadikaaba ke li tie tiladi o *Ja Bijua n le fala boncianla, ke bi nikpeliba leni bi kopadicianba yudanba leni li *balimaama bangikaaba baa yie o ki teni ban kpa o. Ama o kuuma dataali daali po, o go baa fii bi tinkpiba siiga.

³² O den kadi ki waani ba laa bonla. Pieli den piadi o, ki funi leni o.

³³ Ama Jesu den jigidi ki diidi yaa ŋoadikaaba n sieni, ki funi leni Pieli ki yedi: «Ña n puoli, Sutaani, kelima a yantiana naa tie U Tienu yaa yaa, ama bi nisaaliba yaa yantiana.»

O nilo n baa ŋoadi Jesu maama

³⁴ Lani Jesu den yini ku niligu ke ku nagini o kani ki taani leni o ŋoadikaaba ke o yedi ba: «Yua n bua ki yaa ŋua nni kuli, wan yie o yuli ki taa o *dapoanpoanli ki bugi ki nan yaa ŋua nni.

³⁵ Kelima yua n bua ki ga o miali baa biani li. Ama yua n baa pa o miali n yaa po leni o Laabaaliŋamo yaa po kuli, go baa baa li.

³⁶ O nilo yaa baa ki diedi ŋanduna kuli ke o naano nan bodi, li baa ŋanbi opo be?

³⁷ O nilo baa pa be ki lebidi o naano?

³⁸ Kelima yua n jie i fe npo leni n maama po bi naa niba, yaaba n tie *tuonbiadi danba ki go conbi yeni yaa siiga, o Ja Bijua mo baa jie laa nilo po i fe o yaa ti cua leni o Baa kpiagidi nni ki yegi leni yaa malekinba yaaba n gagidi yaa yogunu.»