Marki 4 - Gourmanchéma Bible

¹ Jesu go den ye mi ñincianma kunu, ki bangi bi niba. Ku niligu den taani o kani boncianla hali ke o kua ki kali ku ñinbiagu nni mi ñima nni. Ku niligu kuli den ye li wali po.

² O den pua mi kpanjama ki bangi ba bonla boncianla, ki yedi ba o bangima yogunu:

³ «Cengi mani. O kpakpaalo den ñani ki baa pagi o bonbuoli.

⁴ Wan den pagini, i tiami den baa u sankunu ke ti bonyugiditi den cua ki dini yi.

⁵ I tiami mo den baa a tancaga nni, mi tama n ki yaba naani. I den pudi tontoni kelima mi tama ki yaba likani.

⁶ Ama u yienu n den paagi, i den mali ki kuodi kelima jiinmoani ki den ye.

⁷ I tiami mo den baa ti konkondi nni. Ti konkondi den fii leni i ki dini i, ke yii loni.

⁸ I tiami mo den baa ki tinŋanga nni. Yi den pudi ki kpedi ki pugidi, ki loni. I tiami den loni bonbiyenbu piitaa taa, i tiami piiluoba luoba, i tiami mo kobiga kobiga.»

⁹ Lani Jesu go den yedi ba: «Yua n pia a tuba ki baa gbadi, wan gbadi.»

Jesu n pua mi kpanjama yaala yaa po

¹⁰ Jesu den foagidi leni ku niligu, yaaba n ŋua o leni bi piiga n niliediba den buali o mi kpanjama yeni bundima.

¹¹ O den yedi ba: «U Tienu puni yinba ke yin bandi yaa moamoani n duagi nitoaba po, lani n tie wani *U Tienu diema n baa tie maama. Ama yaaba n ki tie yi siiga yaaba, n baa pua ba mi kpanjama lankuli po,

¹² ke ban yaa nua leni bi nuni ki nan da le bi yama nni, ki go yaa cengi leni bi tuba ki nan da bandi liba, ke ban da lebidi bi yama ki goa U Tienu kani, ki baa bi *tuonbiadi sugili.»

Jesu bundi i bonbi pagima kpanjama

¹³ Jesu go den yedi: «Yii bandi mi naa kpanjama bundima yoo? Li yaa tie yeni, yi baa ga lede ki bandi yaa kpanjama n sieni?

¹⁴ O kpakpaalo n pagini yaala tie U Tienu maama.

¹⁵ Bi nitianba tie nani yaa bonbi n baa u sankunu yeni. Bi yaa gbadi ma yaa yogunu, Sutaani n cua ki ñani yaa maama n pagi bi pala nni.

¹⁶ Bi nitianba mo tie nani yaa bonbi n baa ki tancaliga nni yeni. Bi yaa gbadi mi maama yaa yogunu bi yen ga ma tontoni leni li pamanli,

¹⁷ ama baa pia jiinmoani bi pala nni. Bi kan juuni ki sedi. Mi yebiadima yaa cua, bi bi niba yaa waani ba fala kelima mi maama po, tontoni se ban gbali ki baa.

¹⁸ Bi nitianba mo tie nani yaa bonbi n baa ti konkondi nni yeni. Bani mo n tie yaaba n gbadi mi maama,

¹⁹ ama mi yema yanyagidi, leni mi ŋalimani boandi, leni bonbuakatoala kuli yen taani ki je mi maama, ki teni ke mi kan luoni pu.

²⁰ Bi nitianba mo tie nani yaa bonbi n baa ki tinŋanga nni yeni. Bani n tie yaaba n gba mi maama, ki ga ma ki luoni. Bi nitianba luoni bonbiyenbu piitaa taa, bi tianba piiluoba luoba, bi tianba mo kobiga kobiga.»

Ki fidisanga kpanjama

²¹ Jesu go den yedi ba: «Bi baa cuoni ki fidisanga ki taa li sancianli ki ŋoagini ga bi, bi baa sieni ga u duanu tiipo yo? Naani baa baa tuani ga u fidisantuankaanu po ka?

²² Liba kuli ki ye ki wuo ki kan wuodi. Liba kuli ki ye ki duagi ki kan doagidi.

²³ Yua n pia a tuba ki baa gbadi wan gbadi.»

²⁴ O go den yedi ba: «Fangi mani yi yula leni yin gba yaa maama na. U Tienu baa taa yin bigidi nitoaba po leni yaa *bonbiigikaala, ki biigi yi mo yaa po, ki pugini yipo moko.

²⁵ Bi baa pa ki pugini yua n pia, ama yua n ki pia, bi baa ga o kani baa wan pia yaala.»

Yaa bonbibu n pudi ki kpedi kpanjama

²⁶ Jesu go den yedi: «U Tienu diema tie nani o nilo n pagi o bonbuoli u kuanu nni yeni.

²⁷ Wan goa, bi wan nua, li yensiinu leni li ñiagu kuli, i bonbuoli baa pudi ki go kpedi ke waa bani lan ga maama.

²⁸ Ki tinga n tuuni la kani kiba. Li yen cili ti kagicandi, ki ŋoadi ti siandi, ki ŋoadi mi bima.

²⁹ Li bonluonkaala yaa beni, laa yogunu o baa kua lienni leni o moaciegu, kelima u jetaagu pundi.»

Mutaadi leni li dabinli kpanjama

³⁰ Jesu go den yedi: «Ti baa nandi U Tienu diema leni be? Ti baa pua lipo mi laa kpanjama?

³¹ Li tie nani yaa kpintiigu bonbibu n wa ki yi mutaadi bonbibu yeni. Ban buli bu u kuanu nni yaa yogunu, bu wa ki cie ŋanduna bonbi kuli.

³² Ama bu yaa buli, bu yen pudi ki kpedi ki cie ti kpintiidi kuli, ki toa i benciami, hali maama ke ti bonyugiditi baa fidi ki yaa tiendi bi tiana bu soangu nni.»

³³ O den pua kpanjatoama boncianla yaama n naani leni yaama n tie na, ki wangi bi niba o Laabaaliŋamo nani ban baa fidi ki ga maama.

³⁴ Waa den maadi leni ba kaa pua mi kpanjama. Ama wani leni o ŋoadikaaba yaa den piadi ki ye bi bebe, o yen bundi bipo mikuli.

Jesu duani ku tafaaciangu

³⁵ Laa daali yenjuogu Jesu den yedi o ŋoadikaaba: «Tin duodi mani nepo yaa boanjaali.»

³⁶ Lani bi den cabi ku niligu ki kua Jesu n ka yaa ñinbiagu nni ki baa duoni o. Ñinbiatoadi moko den yegi leni o.

³⁷ Ku faabiadigu den fii, ki figi ki fiindi a ñinguona ke a baali ku ñinbiagu nni hali ke ku bua ki gbie.

³⁸ Ama Jesu den dua ki goa ku ñinbiagu juodima ki kuli o yuli li yukuli. Bi den fundi o ki yedi o: «Canbaa, laa yia ŋa leni tin baa bodi yeni?»

³⁹ O den fundi ki maadi leni ku faagu leni li bali ki yedi: «Cedi ku fuugu,» ki go yedi mi ñincianma: «Suoni.» Ku faagu den cuo ki sedi ke likuli duani salam.

⁴⁰ Lani Jesu den buali ba: «Be n teni ke yi jie nanda? Yii daani yoo?»

⁴¹ Li fangili leni ti jawaandi den cuo ba boncianla ke bi yedi biyaba: «One wani daa, o tie ŋme ke baa ku faagu leni mi ñincianma kuli tuo ki tiendi wan yedi yaala?»