Marki 3 - Gourmanchéma Bible

¹ Jesu go den kua li *bali maama bangima dieli nni. O ja den ye likani ke o nuu faani.

² Yaaba n den ye likani den kpaagi ki baa le Jesu yaa baa paagi o ja yeni mi *fuodima daali, ke ban baa ki kuli o.

³ Jesu den yedi yua yaa nuu n faani: «Fii ki sedi siiga nni ne.»

⁴ Lani o den yedi ba: «Li *balimaama tuo tin tieni bi niba po yaala n ŋani mi fuodima daali bi, bi yaala n bia yo? Tin ga o nilo miali bi, bi tin kpa o yo?» Bi den ŋmini suo.

⁵ Jesu pali den biidi boncianla kelima bi pajuaga po, ke o diidi ki lindi ba leni li pabienli, ki yedi o ja yeni: «Tandi a nuu.» O den tandi u ke u paagi.

⁶ Lanyogunu *Falisieninba den ñani ki ban taani leni o bado *Elodo buakaaba ki juogi ban baa tieni maama ki teni ban kpa Jesu.

Ku niligu n taani Jesu kani

⁷ Jesu leni o ŋoadikaaba den piadi ki go gedi mi ñincianma po. Yaa niligu n yaba den ñani *Galile nni ki ŋua o.

⁸ Jude diema nni yaaba, leni Jelusalema dogu yaaba, leni Idume diema yaaba, leni yaa diema n ye Judana kpenu kandima yaaba, leni yaa Tili leni Sidoni dogi leni i tinkundogi kuli yaaba, yaa niligu n yaba boncianla den gbadi wan tiendi yaala kuli ki cua o kani.

⁹ O den waani o ŋoadikaaba ke ban baa opo ki ñinbiabiga, wan ti kua lienni ke ku niligu n da mabini o.

¹⁰ O den paagidi bi niba boncianla bi yiani po, ke yaaba n laadi fala kelima i yiani po kuli den taani o kani, ki tudi biyaba ki bua ki sii o.

¹¹ Mu cicibiadimu danba n den laa o yaa yogunu kuli, bi den gbaandi o nintuali ki tangi ki tua: «A tie U Tienu Bijua.»

¹² Jesu den maadi leni mu leni li bali ki yiedi mupo, mun da ban waani wan tie yua.

Bi piiga n tondiliediba

¹³ Lani n den pendi Jesu den doni li juali po, ki yini wan bua ki yini yaaba ke bi cua o kani.

¹⁴ O den gandi piiga n niba lie ke ban yaa ye leni o,

¹⁵ ke wan go yaa tuuni ba ke bi caa ki wangi U Tienu maama, ki yaa go pia u paalu ki deli ki ñandi mu cicibiadimu mun ña mun ye yaaba yaa niinni.

¹⁶ Bine n tie wan den dini yaa piiga n niliediba li bali yeni: Simono ke o mo yini o Pieli,

¹⁷ leni Sebede bijaliediba Jaka leni o waalo Jan ke o yini ba mo Boaneje (lani n tie yaa jaba n maadi nani i tatantani yeni),

¹⁸ leni Andile, leni Filipi, leni Batelemi, leni Matiyu, leni Toma, leni Alife bijua Jaka, leni Tade, leni Simono ban yi yua o Yankuadaano,

¹⁹ leni Judasa Isikalioto, yua n den yuandi ki janbi Jesu.

Jesu niba bua ki cuo o

²⁰ Lani n pendi Jesu den guani o denpo. Ku niligu go den taani boncianla hali ke wani leni o ŋoadikaaba ki den pia lenli ki baa je.

²¹ Jesu niba n den gbadi ke li tie yeni, bi den cua ki baa cuo o kelima bi den tua: «Waa go pia yama.»

Jesu n deli mu cicibiadimu yaa paalu po

²² Li *bali maama bangikaaba yaaba n den ñani Jelusalema ki cua o kani moko den tua: «Mu cicibiadimu bado *Belisebu ye o niinni ki die o. Wani n puni o u paalu ke o deli ki ñandi mu cicibiadimu mun ye yaaba yaa niinni.»

²³ Jesu den yini ba, ki pua ba mi kpanjama ki buali ba: «Mu cicibiadimu bado Sutaani baa ga lede ki deli o yuli?

²⁴ Yaa diema n boagidi ki tuogi leni mi yuli, laa diema kan fidi ki yaa ye.

²⁵ Yaa diegu n boagidi ki tuogi leni ku yuli, laa diegu kan fidi ki yaa ye.

²⁶ Lanwani Sutaani moko yaa fiini mi janjanma ki tuogi leni o yuli o baa boagidi, o diema kan go yaa ye, o bali baa gbeni.

²⁷ Niloba kan fidi ki kua o gbanmandaano dieli nni ki fagi o piama, kali o kpa paadi o ki loli o. Li yaa puole o baa kua o dieli nni ki fagi o piama.

²⁸ N waani yi i moamoani ke bi nisaaliba baa baa sugili tuonbiatoadi kuli po, leni ban sugi U Tienu yaa sugidi kuli po.

²⁹ Ama yua n sugi U Tienu Fuoma Yua wani, kan baa sugili hali abada. O tieni yaa *tuonbiadi n baa ye hali yaa yogunu kuli.»

³⁰ Jesu den maadi yeni kelima bi den tua ke ki cicibiadiga ye o niinni.

Jesu naa leni o waamu

³¹ Jesu na leni o waamu den cua ki se niinpo, ki soani ke ban yini o.

³² Ku niligu den ka ki lindi o, ke bi cua ki yedi o: «Diidi, a na leni a waamu se niinpo ki lingi a.»

³³ O den goa ki yedi ba: «Ŋme n tie n na leni n waamu?»

³⁴ Lani o den diidi yaaba n lindi o kuli ki yedi: «Diidi n na leni n waamu nna.

³⁵ Yua n tuo ki tiendi U Tienu yanbuama kuli, wani n tie n naataanjaga leni n naataanpuoga leni n naa.»