Marki 16 - Gourmanchéma Bible

¹ Mi *fuodima daali n den pendi, Magidala yua Maliyama, leni Jaka naa Maliyama, leni Salome den da yaa kpama n pia u nuulimanu ki baa gedi ki ban sogi Jesu o kpiemo.

² A danleleeda cilima daali ku tiŋaapanpangu bi den gedi li kuli po u yienu pudima yogunu.

³ Bi den maadi leni biyaba ki tua: «Ŋme n baa bindi tipo ku tanpabigu ki pigidi gu li kuli ñoabu?»

⁴ Bi den yaadi ki diidi ki sua ke ku tanpabigu yaagu n den yaba boncianla yeni bindi ki pigidi.

⁵ Bi den kua li kuli nni ki sua ke o jawaalo ka jienu po ki laa liadipiencianli. Ti jawaandi den cuo ba.

⁶ O den yedi ba: «Yin da jie mani, yi lingi Nasaleti yua Jesu, ban den joani yua li *dapoanpoanli po. Waa go ye ne, o fii bi tinkpiba siiga. Diidi mani ban den duani o naankani.

⁷ Gedi mani ki ban waani o ŋoadikaaba leni Pieli, ke o ga yi liiga ki caa *Galile. Yi baa le o lanpo nani wan den yedi yi maama.»

⁸ I jeje leni ki yanlidiga den cuo ba ke bi digibi, ki ñani li kuli nni ki sani ki ban caa. Baa den yedi oba liba kelima ti jawaandi po. [

Jesu doagidi o yuli Magidala Maliyama po

⁹ Jesu n den fii bi tinkpiba siiga a danleleeda cilima daali tiŋaapanpangu, o den kpa doagidi o yuli Magidala Maliyama po, wan den ñani yua yaa niinni cicibiadimu lele.

¹⁰ O pua yeni den gedi ki ban puni Jesu yegininlieba li laabaalo, bani yaaba n den ye leni li paboanli ki buudi yeni.

¹¹ Ban den gbadi ke Jesu go fo, ke o pua yeni laa o, baa den daani o maama.

Jesu go doagidi o yuli o ŋoadikaaba bilie po

¹² Lani yaa puoli Jesu go den doagidi o yuli nani nitoa yeni o ŋoadikaaba siiga niba lie po, ke bi ye u sanu nni ki caa i kuani po.

¹³ Bi den guani bi lieba kani ki waani ba, ama baa den daani bani moko yaa maama.

Jesu doagidi o yuli o ŋoadikaaba po

¹⁴ Lani yaa puoli Jesu go den doagidi o yuli bi piiga n niyendiba po ban di yaa yogunu. O den jaligi ba bi dandanluoma leni bi pajuaga kuli po, kelima baa daani yaaba n laa o ke o fii bi tinkpiba siiga maama.

¹⁵ Lani o den yedi ba: «Gedi mani ŋanduna nni kuli ki ban yaa wangi bi niba kuli o Laabaaliŋamo.

¹⁶ Yua n tuo ki daani ki go *batisi kuli baa tindi. Ama yua n ki daani, bi baa jia leni ti buudi ki cuo o.

¹⁷ Diidi yaa bancianma n baa ŋua yaaba n daani: N yeli nni bi baa deli mu cicibiadimu, bi baa maadi mi malanma,

¹⁸ bi baa cuo i we, bi yaa ñuni ñoagubiaduba, li kan tieni ba yaala n bia, bi baa maandi bi nii a yiama po ban yaa paagidi.»

Jesu doni tanpoli

¹⁹ O Diedo Jesu n den maadi leni o ŋoadikaaba yeni, o den doni tanpoli, ki ban kali U Tienu jienu po.

²⁰ O ŋoadikaaba den gedi ki ban wangi o Laabaaliŋamo i kaani kuli. O Diedo den tuuni leni ba ki saagi o Laabaaliŋamo po i moamoani leni yaa bancianma n den tiendi.]