Marki 13 - Gourmanchéma Bible

¹ Jesu n den ña U Tienu diegu nni yaa yogunu, o ŋoadikaaba siiga yendo den yedi o: «Canbaa, diidi ban maa leni yaa tanciama na yaa diecianŋama na!»

² Jesu den yedi o: «A laa a naa dieciama? Bi kan ti ŋa baa tanyenli kan sieni ki yaa maa li lieli po, ke a kuli naa padi ki baa.»

Yaa fala n baa ti cua mi juodima yogunu

³ Jesu den kali *Olifie Tiidi juali po ki tiegi U Tienu diegu. Pieli, Jaka, Jan leni Andile bebe n den ye leni o, ki den buali o yaa buali n tie na:

⁴ «Waani ti laa bonla n baa ti cua yaa yogunu, leni yaa sinankeeni n baa ti waani ti ke laa bonla kuli juodima yogunu pundi.»

⁵ Lane Jesu den yedi ba: «Fangi mani yi yula ke niloba n da boandi yi.

⁶ Bi niba boncianla baa ti cua n yeli nni ki yedi: ‹Mini n tie *U Tienu n Gandi Yua,› ki boandi bi niba boncianla.

⁷ Yi yaa ti gbadi ke bi maadi bu toabu maama, ki go maadi bu toabu laabaalo maama, yin da yagi mani yi yama. Laa bonla baa cua tiladi, ama li da kan tua mi juodima ka.

⁸ U nibuolu baa fii ki tuogi leni nibuoto, mi diema mo baa fii ki tuogi leni dietoama. Mi tindigibima baa tiendi i kaantiami, mi koncianma mo baa tiendi. Laa bonla kuli da tie nani u maditugukoanu cilima bebe yene.

⁹ Yin yaa faami mani yi yula po. Bi baa cuo ki gedini yi bi bujiaba kani, ki pua yi i gbiami li *bali maama bangima diena nni, yi baa sedi gufeneelinba nintuali leni bi badicianba nintuali kelima n yaa po, ki tua bipo siedi.

¹⁰ Ama hali ke mi juodima daa cua, li tie tiladi o Laabaaliŋamo n kpa pundi i nibuoli kuli nni.

¹¹ Bi yaa ti cuo ki gedini yi li bujiali kani yaa yogunu, yin da tuodi ki yagi yi yama yin baa yedi yaala po. Lanyogunu yin maadi mani yaama n baa kua yi pala nni lanyogunu, kelima laa tie yinba ka baa maadi, ama U Tienu Fuoma Yua n baa maadi.

¹² Kpelo leni waalo siiga, bi tianba baa cuo biyaba ki teni ban kpa ba. Bibaanba baa cuo bi bila ki teni ban kpa ba. A bila mo baa fii ki sedi bi danba po ki cuo ba ki teni ban kpa ba.

¹³ Bi niba kuli baa nandi yi kelima n yeli po, ama yua n baa juuni hali mi juodima baa tindi.

Ti caginbiaditi

¹⁴ Yi yaa ti laa ke yaa cagindi n wudi bi niba gbani ye tin ki bi pundi ki yaa ye naani, yua n cogi mi naa maama n kpaagi bonŋanla. Lanwani, laa yogunu yaaba n baa ye Jude nni n sani ki gedi a juana po.

¹⁵ Yua n ka o doangu yuli po n da jiidi ki kua deenni ki baa taa liba.

¹⁶ Yua n ye u kuanu po mo n da lebidi ki guani o denpo ki baan taa o tiayekaadi.

¹⁷ Fala baa ye leni yaa puoba n punbi leni yaaba n da ŋaandi laa dana nni.

¹⁸ Mia mani U Tienu ke laa nuama n da tua ku fawaagu yogunu.

¹⁹ Kelima laa dana nni fala baa ye hali maama ke li buolu daa tieni, ki cili U Tienu n den tagi ŋanduna yaa yogunu ki pundi hali moala. O buolu kan go tieni mo.

²⁰ O Diedo yaa bi wadi laa dana, nisaaloba kuli kan bi tindi, ama kelima wan gandi yaaba yaa po, o wadi laa dana.

²¹ Laa yogunu niloba yaa yedi yi: ‹Diidi, U Tienu n Gandi Yua ye ne,› yaaka: ‹O ye nepo,› yin da daani o maama.

²² Kelima yaa tuonanda n yedi ke bi tie U Tienu n gandi yaaba leni bi sawalipua-faadanba baa fii ki yaa tiendi sinankeeninba leni li bonlidikaala hali ke li yaa baa fidi, bi bi baa boandi U Tienu n gandi yaaba.

²³ Yin fangi mani yi yula, n tuodi ki waani yi li kukuli.

O Ja Bijua cuama

²⁴ Laa dana nni, fala yeni yaa pendi, u yienu baa biigi, o ŋmaalo mo kan go yendi,

²⁵ a ŋmabila baa ña tanpoli ki baali, tanpoli paaciami mo baa digibi.

²⁶ Lani bi baa le ke o *Ja Bijua ye ti tawadi nni, ki kpendi leni u paaciamu leni ti kpiagiciandi.

²⁷ Lani o baa soani o malekinba ŋanduna kuli nni, ban taani wan gandi yaaba ki cili ŋanduna bianu poyendu ki yaa caa hali u naa bianu.

Bu kankanbu kpanjama

²⁸ Yin bandi mani bu kankanbu kpanjama n bangi yaala. Bu beni yaa bundi, yi bani ke ku siagu nagidi.

²⁹ Li go tie yene, yi yaa ti laa ke laa bonla tiendi, yin bandi ke o Ja Bijua nagini ki ye bu buliñoabu kani.

³⁰ N waani yi i moamoani ke mi naa nifiima kuli kan pendi ke laa bonla kuli ki tieni.

³¹ Tanpoli leni ki tinga kuli baa pendi, ama n maama kan pendi hali abada.

U Tienu bebe n bani o Ja Bijua cuama yogunu

³² Ama oba kuli ki bani laa bonla n baa ti cua yaa daali leni yaa yogunu, baa tanpoli malekinba ki bani, baa Bijua, se Baa bebe.

³³ Yaa fangi mani yi yula ki yaa gu, [ki go jaandi ki miadi U Tienu] kelima yii bani li yogunu.

³⁴ Li baa tie nani o ja n baa caa u dogu, ki ŋa o diegu, ki guuni o naacenba o piama, ki puogi yua kuli o tuonli, ki go puogi o buliñoaguudo wan yaa gu bonŋanla yeni.

³⁵ Lani yaa po yi mo n yaa gu mani kelima yii bani o diedaano n baa kpeni yaa yogunu, ku yenjuogu, bi ku yagisiigu, bi i kootonmoe, bi ku tiŋaagu yo.

³⁶ Yeni yaa po yi mo n yaa gu mani ke wan da ti kpeni ki ludi yi, ki sua ke yi goa.

³⁷ Min yedi yi yaa maama yeni, n go yedi ma bi niba kuli: Yaa gu mani.»