Marki 11 - Gourmanchéma Bible

¹ Jesu leni o ŋoadikaaba n den nagidi Jelusalema, ki bua ki pundi Betifaje leni Betani dobila nni, ki kuu *Olifie Tiidi juali, o den soani o ŋoadikaaba siiga bilie ki yedi ba:

² «Suagi mani ki gedi yaa dobiga n ye yi liiga na. Yi yaa baa kua lienni yaa yogunu, yi baa le yaa ŋunbisaagili ke oba daa jagini li, ke li luo. Yin loti li mani ki cuani na.

³ Niloba yaa buali yi: ‹Be n teni ke yi tieni line?› Yin goa ki yedi o: ‹Ti Daano n bua o.› Tontoni o baa cedi yin cuani o n kani.»

⁴ Bi den gedi ki ban sua ke li ŋunbisaagili luo niini bu buliñoajabu kani ki kuu u sanu. Bi den loti li.

⁵ Yaa niba n ye likani bi tianba den buali ba: «Yi tiendi be? Be n teni ke yi loti li ŋunbisaagili na?»

⁶ Bi den guani ba nani Jesu n waani ba maama. Lani bi den cedi ke bi gedini li.

⁷ Bi den cuani li ŋunbisaagili Jesu kani, ki lu ki maandi lipo bi tiadi ke Jesu jagini li.

⁸ Bi niba boncianla den ladi bi tiadi u sanu nni, bi nitianba den pedi i tibensoangi i kuani nni ki moko ladi u sanu nni.

⁹ Yaaba n ye Jesu liiga leni yaaba n ŋua o puoli kuli den kpaani ki tua: «Ti pagi U Tienu! U Tienu n seligi yua n kpendi wani Li Miali Diedo yeli nni!

¹⁰ U Tienu n seligi yaa bali n baa je na, ti yaaja Dafidi n den kpa dini yaa bali yeni. U Tienu yua n ye hali tanpojoma n baa ti pagidi.»

¹¹ Jesu den pundi Jelusalema ki kua U Tienu diegu nni. O den diidi li bonla kuli. U yienu n den bua ki baa, o den yegi leni bi piiga n niliediba ki goa ki gedi Betani yaa dobiga nni.

Jesu soli bu kankanbu

¹² Lan den fii ki fa ke bi go ñani Betani, mi koma den cuo Jesu.

¹³ O den laa bu kankanbu hali foagima ke bu faadi bundi, ki jadi ki gedi ki baa le o yaa baa le bu bonluonkaala. Wan den pundi waa laa pu se ti faadi, kelima laa den tie a kankana lonma yogunu.

¹⁴ O den yedi bu: «Oba kuli n da go ŋmani a bonluonkaala hali abada.» O ŋoadikaaba den gbadi wan yedi yaala.

Jesu kua U Tienu diegu nni

¹⁵ Bi den pundi Jelusalema. Jesu den kua U Tienu diegu nni ki deli ki ñani yaaba n kuadi leni yaaba n da lienni kuli, ki tudi ki luni bi ligilebidiba kpagidi leni a kpaajekuada bonkalikaala.

¹⁶ O den yie bipo ke oba kuli n da go tugi liba ki poandi U Tienu diegu nni.

¹⁷ O go den tundi ba ki yedi: «Naani i Diani nni laa yedi: ‹Bi baa yi n diegu i jaandi diegu i nibuoli kuli po kaa?› Ama yinba wani teni ke li tua a concona wuonkaanu.»

¹⁸ Bi kopadicianba yudanba leni li *bali maama bangikaaba n den gbadi lani, bi den kpaagi ban baa tieni maama ki bolini o, ama bi den jie o, kelima o bangima den paki ku niligu kuli.

¹⁹ Ku joboandigu n den pundi, Jesu leni o ŋoadikaaba go den ñani u dogu nni.

Yaa kankanbu n kuodi n bangi yaala

²⁰ Lan den fii ki fa ke bi ye u sanu nni ki poa ki dagini bu kankanbu yeni kani, bi den laa ke bu kuodi ki taani leni bu jiini kuli.

²¹ Pieli den tiadi yaala n den tieni, ki yedi Jesu: «Canbaa, diidi ki le, ŋan den soli yaa kankanbu yeni, bu kuodi bukuli.»

²² Jesu den goa ki yedi ba: «Daani mani U Tienu!

²³ N waani yi i moamoani, yua n yedi li naa juali: ‹Fii ki ban lu a yuli mi ñincianma nni,› o yaa yedi yeni kaa maliti o pali nni li baa tieni bi li kan tieni, ama ki daani ke wan yedi yaala baa tieni, o baa baa lan tieni opo.

²⁴ Li tie lani yaa po ke n yedi yi, yin jaandi ki miadi yaala kuli, yin daani ke yi baa la, lani yi baa baa la.

²⁵ Yin se ki jaandi yaa yogunu kuli, ki tiadi ke yi pia maama leni niloba, yin pa mani o sugili, ke yi Baa yua n ye tanpoli n pa yi mo sugili yi *tuonbiadi po. [

²⁶ Ama yi yaa puuni yi lieba sugili, yi Baa yua n ye tanpoli moko kan pa yi sugili yi yaa tuonbiadi po.]»

Bi buali Jesu o bali n ñani naani

²⁷ Bi den pundi Jelusalema. Jesu n den goadi U Tienu diegu nni, bi kopadicianba yudanba leni li bali maama bangikaaba leni bi *nikpeliba den cua o kani ki yedi o:

²⁸ «Li laa bali yaa po yo ke a tiendi li naa bonla? Ŋme n puni a li bali ke a tiendi la?»

²⁹ Jesu den yedi ba: «N baa buali yi bonyenla, yin guani npo ke n moko baa waani yi yaa bali yaa po ke n tiendi laa bonla.

³⁰ Jan n den *batisi bi niba yeni, o den baa li bali tanpoli po bi, bi bi nisaaliba kane? Waani nni mani.»

³¹ Bi den juogi bi siiga ki yedi: «Ti yaa yedi ke o den baa li tanpoli po, o baa yedi: ‹Be yaa po ke yii den daani o maama?›

³² Ti yaa yedi: ‹Bi nisaaliba yaa kane,› hei...» Yeni mo bi den jie bi niba kelima bi niba kuli den nua ke Jan den tie sawalipualo i moamoani.

³³ Lani yaa po bi den goa ki yedi Jesu: «Tii bani ba.» Jesu den yedi ba: «N moko kan waani yi yaa bali yaa po ke n tiendi laa bonla.»