Marki 1 - Gourmanchéma Bible

Jan Batisi mawangima

¹ U Tienu Bijua, Jesu Kilisiti yaa Laabaaliŋamo cilima.

² Li diani o sawalipualo Esayi tili nni yaa maama n tie na: «Cengi, n soani n tondo a liiga, Ke wan bogini a sanu.

³ Li tie yua n kpaani mi fanpienma nni ki tua: ‹Yin bogini mani o Diedo sanu, Ki naadi mani o sani.› »

⁴ Lani n tie Jan yua n den cua ki *batisi bi niba mi fanpienma nni, ki wangi ba yaa maama n tie na: «Yin lebidi yi yama ki cua min batisi yi ke U Tienu n fidi ki pa yi sugili yi *tuonbiadi po.»

⁵ Jude diema yaaba leni Jelusalema dogu yaaba boncianla den kpendi Jan kani. Bi den tuodi ki doagidi bi tuonbiadi, ke Jan den batisi ba Judana kpenu nni.

⁶ Jan den laa ti yuoyuokobidi tiadi ki ñaagi ku gbanñagidigu, ki di i naaci leni ku muagu nni siadi.

⁷ O den wangi yaa maama n tie na: «Toa ŋua n puoli ki pia u paalu ki cie nni. Mii pundi baa yua n baa gbaani ki loti o cacaadi.

⁸ Mini n batisi yi leni mi ñima, ama wani n baa batisi yi leni U Tienu Fuoma Yua.»

Jan batisi Jesu

⁹ Laa yogunu Jesu den ñani Nasaleti *Galile diema nni ki cua Jan kani ke o den batisi o Judana kpenu nni.

¹⁰ Jesu n den ña mi ñima nni yaa yogunu, o den laa ke tanpoli luodi, ke U Tienu Fuoma ñani lipo ki ji nani ki kpaajiega yeni ki ti jagini opo.

¹¹ Bi den gbadi ke u nialu maadi tanpoli po ki yedi: «A tie n Bibuadiga, n pali mani apo hali boncianla.»

Sutaani tulini Jesu

¹² Lanyogunu U Tienu Fuoma den tudi ki gedini Jesu mi fanpienma nni.

¹³ O den ye lipo leni ti fuayandi ki tieni dana piinaa ke Sutaani tulini o. Malekinba den tuuni opo.

Jesu cili o tuonli Galile diema nni

¹⁴ Ban den cuo Jan ki kuani o li kpaadidieli nni ke li pende, ke Jesu den gedi Galile ki ban wangi U Tienu Laabaaliŋamo,

¹⁵ ki tua: «U yogunu pundi, *U Tienu diema yogunu nagini. Yin lebidi ki tuo o Laabaaliŋamo.»

Jesu yini jankpaanba na ke bi ŋoadi o

¹⁶ Jesu n den balini Galile ñincianma, o den laa Simono leni o waalo Andile ke bi lu i taali mi ñincianma nni. Bi den tie jankpaanba.

¹⁷ Jesu den yedi ba: «Ŋoadi mani nni, n baa teni yin yaa lingi bi niba.»

¹⁸ Lanyogunu liga bi den ŋa bi taali ki ŋoadi o.

¹⁹ Wan den suagi liiga waamu, o den laa Sebede bijaliediba, Jaka leni o waalo Jan, ke bi ye ku ñinbiagu nni ki ŋanbidi bi taali.

²⁰ Jesu n den laa ba yaa yogunu, o den yini ba, ke bi ŋa bi baa leni bi tuonsoanba ku ñinbiagu nni ki ŋoadi o.

Jesu paagi ki cicibiadiga n ye yua yaa niinni

²¹ Jesu leni o ŋoadikaaba den gedi Kapenayuma dogu nni. Mi *fuodima daali n pundi, Jesu den kua li *balimaama bangima dieli nni ki bangi yaaba n taani lienni.

²² O bangima den paki ba, kelima o den bangi leni li bali, waa den bangi nani li *bali maama bangikaaba yeni ka.

²³ Lanyogunu ki cicibiadiga n den ye yaa ja yaa niinni den kua li bali maama bangima dieli yeni niinni ki tiani:

²⁴ «Ŋain, fini Nasaleti yua Jesu, be n ye tinba leni fini siiga? A cua ki baa bolini ti. N bani ŋan tie yua. A tie U Tienu *Nigagidiŋamo.»

²⁵ Jesu den funi leni ga ki yedi: «Suoni ki ña o ja na niinni.»

²⁶ Ki cicibiadiga den guli o ja yeni ke o digibi. Lani, ki den tiani boncianla ki ñani o niinni.

²⁷ Li den paki yaaba n ye likani kuli ke bi buali biyaba: «Line tie be? Li tie bangipanma. O maadi leni li bali ki tendi ke baa mu cicibiadimu tiendi wan yedi yaala.»

²⁸ Lanyogunu o yeli den ñani Galile diema nni kuli.

Jesu paagi a yiama boncianla

²⁹ Jesu n den ñani li bali maama bangima dieli nni, o den yegi leni Jaka leni Jan ki gedi Simono leni Andile denpo.

³⁰ Li sua ke Simono cuadinaa dua kelima o den pia gbananbiendi, ke bi jaligi ki waani Jesu o maama.

³¹ O den nagini o kani ki cuo o nuu ki fiini o. Lanyogunu o gbananbiendi den kagidi opo ke o fii ki ga bi cangu.

³² Ku yenjuogu u yienu n den kua yaa yogunu, bi niba den cuani Jesu kani a yiama leni mu cicibiadimu n ye yaaba yaa niinni kuli.

³³ U dogu nni yaaba niba boncianla den taani Simono buliñoabu kani.

³⁴ O den paagi yaa niba n yaba leni ban den pia yaa yianbuoli kuli po, ki deli mu cicibiadimu boncianla ki ñani mu mun ye yaaba yaa niinni. Waa den tuo ke mu cicibiadimu n maadi, kelima mu den bani wan tie yua.

Jesu gedi kaantoe ki ban wangi o Laabaaliŋamo

³⁵ Jesu den yagidi ki fii ke li daa fa, ki ñani ki gedi naani n foagi leni bi niba n ye naani ki ban jaandi.

³⁶ Simono leni yaaba n den ye leni o den fii ki lingi o.

³⁷ Ban den laa o, bi den yedi o: «Bi niba kuli lingi a.»

³⁸ O den goa ki yedi ba: «Tin suagi mani liiga ki gedi i tinkundogi nni min ban yaa wangi o Laabaaliŋamo maama lanpo moko, kelima n den cua lani yaa po yo.»

³⁹ O den goadi Galile diema nni kuli, ki kua li bali maama bangima diena nni ki wangi U Tienu maama, ki go deli mu cicibiadimu ki ñandi mu mun ye yaaba yaa niinni.

Jesu paagi o gbaado

⁴⁰ O gbaado den cua o kani ki gbaani ki mia o ki yedi: «A yaa bua a baa fidi ki ŋanbi nni.»

⁴¹ Mi niñima den cuo Jesu opo ke o tandi o nuu ki sii o ki yedi o: «N bua, ŋanbi.»

⁴² Lanyogunu mi *gbaadima den gbeni opo ke o ŋanbi.

⁴³ Lanyogunu goga Jesu den cabi o, ki maadi leni o leni li bali

⁴⁴ ki yedi: «Fangi a yuli ki da yedi niloba liba, ama gedi o kopadiciamo kani wan ban le ŋa. Ŋan padi Musa n den bili yaa padili buolu, a ŋanbima po, lan tua bipo siedi ke a ŋanbi.»

⁴⁵ Ama o ja yeni den gedi ki ban goadi ki wangi Jesu n tieni opo yaala kuli, hali ke li teni ke Jesu ki go den fidi ki kua doguba niinni ke bi niba bani. O den se li fuali nni ke bi niba ña i kaani kuli ki kpendi o kani.