Malaki 1 - Gourmanchéma Bible

¹ Li Miali Diedo n den teni ke Malaki soagini o maama yaama Isalele yaaba po.

Li Miali Diedo gandi Isalele yo

² Li Miali Diedo yedi: «N bua yinba Isalele yaaba. Ama yi tua: ‹Be n doagidi ke a bua ti?› » Li Miali Diedo goa ki yedi: «Naani Esayu leni Jakobo ki den tie naataani kaa? Ama n den bua Jakobo leni o puoliŋuani,

³ Ki nandi Esayu leni o yaa puoliŋuani. N den bolini Esayu diema, yaama n den ye a juana nni, Ki teni ke i tanboe diedi ma, Ke mi tua fanpienma.

⁴ Edomi yaaba, bani Esayu puoliŋuani yeni yaa fii Ki yedi ke bi bolini bi dogi, Ama bi baa guani ki maa bi ci.» Li Miali Diedo, U Paaciamu Kuli Daano baa guani ki yedi: «Cedi ba mani ban goa ki maa bi ci, N didi go baa bolini i. Bi niba baa yaa yi bi diema: “Mi biadima diema,” Bani, mi niba mo, bi baa yaa yi ba: “Li Miali Diedo pali n be yaa nibuolu po yogunu kuli.”

⁵ Yi nuni baa le lani kuli, Lani yi baa yaa tua: ‹Li Miali Diedo pia u paalu baa leni Isalele diema kandima kuli po.› »

U Tienu fu leni bi kopadicianba

⁶ Li Miali Diedo, U Paaciamu Kuli Daano yedi: «Ki biga jigindi o baa, o naacemo mo kpiagidi o canbaa. N yaa tie yi Baa, Min pundi ki baa yaa jigidi ye le? N yaa tie yi Canbaa, Min pundi ki baa yaa kpiagidi ye le? Yinba bi kopadicianba n fali n yeli Ki nan tua: ‹Ti fali a lede?›

⁷ Yi kpendinni n *padibinbinli po yaa pienma n*joagini npo, Ki nan go tua: ‹Ti tudi apo lede?› Yi tudima n tie ke yii pia fangili n padibinbinli po.

⁸ Naani yin yen cuani ki yanjuanga li padili po yeni, li tiegi? Naani yin yen cuani yaa yanga n duugi yaaka yaaga n yia yeni, Naani li tiegi? Naani yi yaa taa laa yanga ki ban puni gufeneeli, O baa ga yi cangu leni nunmanga?

⁹ Lanwani, yinba bi kopadicianba, Biigi mani moala ke yi baa mia yi Tienu, Ke wan gbadi yipo mi niñima. Naani yi bontienkaala baa tuo Wan mangi o nunga yipo bi? Li Miali Diedo, U Paaciamu Kuli Daano n yedi yeni.»

¹⁰ Li Miali Diedo, U Paaciamu Kuli Daano go yedi: «Li baa yaa ŋani ki cie yinba bi kopadicianba siiga nni Yendo n luoni n diegu buliñoana, Yin da go cuondi n padibinbinli po mi fantama fanma fanma. N pali ki mani yipo baa waamu. Mii go bua ki ga yi nuu nni padiliba kuli mo.

¹¹ Ki cili hali u yienu n pudi naani, Ki ban tuoni hali wun baali naani, I nibuoli kuli kpiagidi nni. I kaani kuli bi niba padi ki siagi npo a *dugibila. Bi go padi yaa pada n ŋani ki dagidi npo, ki kpiagidi nni. I nibuoli kuli kpiagidi nni. Li Miali Diedo, U Paaciamu Kuli Daano n yedi yeni.

¹² Ama, yinba, Isalele yaaba n fali nni, Ki tua ke o Diedo padibinbinli joagini, Ki go tua ke yin padi likani yaa pada ki pia mayuli.

¹³ Yi go tua ke li padibinbinli kani tuonli Pia li coagili, yi baga ki ye mo. Li Miali Diedo, U Paaciamu Kuli Daano yedi: ‹Yi kpendinni ti yansukaadi leni yaadi n duugi leni ti yanyiandi, Yi padi npo laa pada buolu yo. Naani n baa ga laa paabu yikani?› Li Miali Diedo n yedi yeni.

¹⁴ Ti solindi n yaa ŋua yua n pia o yankulu nni ki yantonga Ki niani ke o baa padi ga o Diedo po, Ama ki nan kandi ki ŋa kani ki taa yanyianga ki padi. Kelima n tie badiciamoe. Li Miali Diedo, U Paaciamu Kuli Daano n yedi yeni. I nibuoli kuli fangi nni.»