Luki 16 - Gourmanchéma Bible

¹ Jesu go den yedi o ŋoadikaaba: «O piado den ye ki pia o ŋalimankubilo ke bi ti cua o kani ki kuli o ŋalimankubilo yeni ke o biandi o piama.

² O den yini o ki yedi o: ‹N gba ke bi maadi apo be n yeni? Doagidi ki waani nni a ŋalimankubili tuonli fuuli, kelima a kan go baa ki yaa tie n ŋalimankubilo.›

³ O ŋalimankubilo yeni den yedi o pali nni: ‹N canbaa baa ñani nni li ŋalimankubili tuonli nni. N baa tieni lede? Ki ko bu kpaabu? N kan fidi. Ki yaa miadi? Bu miabu pia npo i fe.

⁴ N bani min baa tieni maama ke o yaa ti ñani nni li ŋalimankubili tuonli nni, ke n gedi ki cani yaaba kuli, ban ga n cangu.›

⁵ Lani o den yini o canbaa pandanba kuli yendo yendo. O den yedi yua n kpa cua: ‹A pia n canbaa po i ŋa yo?›

⁶ O den goa ki yedi o: ‹Kpaboba kobiga.› O ŋalimankubilo den yedi o: ‹Ga a panli tili ki kali ki diani tontoni kpaboba piimuu.›

⁷ O den yedi toa mo: ‹A pia n canbaa po i ŋa?› O den goa ki yedi: ‹*Ŋalikama kpalipadi kobiga.› O ŋalimankubilo den yedi o: ‹Ga a panli tili ki diani kpalipadi piinii.›

⁸ O canbaa den pagi laa ŋalimankubilo yua n kaa tiegi, kelima o den tieni u fanu.» Jesu den pugini ki yedi: «Ŋanduna yaaba fani leni bi lieba ki cie yaaba n tie mi yenma yaaba.

⁹ N yedi yi ke yin taa mani ŋanduna ŋalimani yi n joagini yeni, ki baa danlinba, ke yi yaa ti pia yi ŋalimani yaa yogunu, ban n ga yi cangu naani n ki pia juodima nni.

¹⁰ Ban fidi ki dugi yua po li bonwaala po, bi go baa dugi o yaa po yo yaa bonla n yaba po. Yua n ki tiegi li bonwaala nni, o kan go yaa tiegi yaa bonla n yaba nni.

¹¹ Lanwani bi yaa fidi ki dugi yipo leni yin kubi ŋanduna ŋalimani maama yi n pia i boandi, ŋme baa piani yi o ŋalimanmoano?

¹² Bi yaa fidi ki dugi yipo leni yin kubi nitoa ŋalimano maama, ŋme baa teni yi yaa ŋalimano n tie yi yua?

¹³ Naacemoba kuli kan fidi ki yaa tuuni canbaanba lie po, kelima o yaa baa nani o canbaakpialo ki bua o canbaalielo, o nan baa taabi o bonkpialo ki fali o bonlielo wani. Yi kan fidi ki yaa taa ki tuuni U Tienu po leni ŋalimani po.»

Jesu bangima mi tianma

¹⁴ *Falisieninba yaaba n den bua i ligi ke li kandi den gbadi lankuli ki ñuadi Jesu.

¹⁵ O den yedi ba: «Yinba yi moandi ke bi niba n yaa nua ke yi tiegi, ama U Tienu wani n bani yi pala. Bi niba n nua ke yaala n pia ti kpiagidi yeni tie caginde U Tienu po.

¹⁶ Li *balimaama leni bi sawalipuaba maama den die ki pundi hali Jan Batisi yogunu. Ki cili lanyogunu bi wangi *U Tienu diema Laabaaliŋamo. Nilo kuli tiendi u paalu ki bua ki kua lienni.

¹⁷ Tanpoli leni ki tinga pendima dingi ki cie li bali maama nni baa dianfuubiyenga n bodi ki kan tieni.

¹⁸ Yua n ñani o pua ki go taa potoa kuli conbi. Yua mo n taa ban ñani yaa pua kuli, o conbi.

O piado leni Lasala maama fuuli

¹⁹ O piado den ye ki laa ti tiakpiagidi, ki mangidi o pali daali kuli leni o yeŋanma leni mi jemanma.

²⁰ O luodo moko den ye ke bi yi o Lasala. O den yen dua o piado yeni diegu buliñoajabu nni ke o gbanandi kuli tie nala.

²¹ Mi koma den kubi o hali ke o den bua ki yaa di yaa jiema n joagidi o piado yeni saajekaanu kani. Baa i sangbanli den kpendi ki liagi o nala moko.

²² To, o luodo den kpe ke malekinba taa o ki gedini Abalahama kani. O piado moko den ti kpe ke bi piini o.

²³ O den laadi fala bi tinkpiba n ye naankani. O den yaadi ki diidi hali foagima, ki ban laa Abalahama leni Lasala ke o ye Abalahama kani.

²⁴ O den tiani ki yedi: ‹N baa Abalahama, gbadi npo mi niñima ki soani Lasala wan tu mi ñima leni o nubiyuli ki cua ki kuugi npo n lanbu, kelima n laadi fala boncianla mi fantama na niinni.›

²⁵ Abalahama den goa ki yedi o: ‹N biga, tiadi ke a den baa yaala n ŋani boncianla ŋan den ye yaa yogunu, ke Lasala mo den laadi fala boncianla. Moala, o ye ne ke bi baagidi o, a mo laadi fala.

²⁶ Lani bebe ka, ku buociangu ye tinba leni yinba siiga, ki teni ke yaaba n bua ki ña ne ki gedi yipo kan fidi, yaaba n bua ki ña yi yaa po mo ki cua ti yaa kani kan fidi.›

²⁷ O piado den yedi: ‹Lanwani n nan mia ŋa, ŋan soani Lasala n baa denpo.

²⁸ Kelima n pia waamu muu. Wan gedi ki ban tuodi ki waani ba ke bani wani n da cua o naa falabiado kaanu na niinni.›

²⁹ Abalahama den goa ki yedi o: ‹A waamu pia Musa leni bi sawalipuaba kuli, ban cengi ba.›

³⁰ O piado den goa ki yedi: ‹N baa Abalahama, yeni ka, yua n kpe yaa fii bi tinkpiba siiga ki gedi bikani, bi baa lebidi bi yama.›

³¹ Abalahama den goa ki yedi o: ‹Bi yaa yie kaa baa cengi Musa leni bi sawalipuaba, baa o nilo yaa fii bi tinkpiba siiga ki gedi bikani, bi kan cengi o.› »