Levi 3 - Gourmanchéma Bible

¹ Nilo yaa bua ki padi mi yanduanma padili, o yaa baa padi nua, li yaa tie naatonli bi naasalo, o baa cuani yua n ki pia poadi ki padi Li Miali Diedo po.

² O baa maani o nuu ki padiyanga yuli po ki kodi ga u*Kadikaanu gbandieli buliñoatuogili kani. Alono bijaba bi kopadicianba mo, baa miimii mi soama li*padibinbinli kaani kuli.

³ Mi taanyenma padili yeni niinni, o baa taa ki cuani yaala n tie ne, lan tua padijuukaali Li Miali Diedo po: Yaa kpakaagu n ŋuagi ti nuadi leni yaa kpama n taabi ti kuli,

⁴ leni a cayaanlieda leni a kpama leni yaa kpama n ye a loga nni, leni mi pualanma, wan baa taani ki tabidi ki ñani yaama leni a cayaana.

⁵ Alono bijaba baa sia lani li padibinbinli po. O baa maani la yaa padijuukaali n maa yaa daadi n co yeni tanpoli likuli n buodi. Li tie yaa padili n sia ki buodi cain, ki tie yaali yaa nuulu n mani Li Miali Diedo po.

⁶ O yaa baa padi yanbiga mi taanyenma padili, ki yanga yeni yaa tie bontonga bi bonsiaga, o baa taa yua n ki pia poadi.

⁷ O yaa baa padi pia, o baa cuani o u *kaangagidiŋanmoanu nintuali.

⁸ O baa maani o nuu ki padiyanga yeni yuli po ki kodi ga u Kadikaanu gbandieli buliñoatuogili. Alono bijaba baa miimii mi soama li padibinbinli kaani kuli.

⁹ Laa taanyenma padili yaa niinni o baa taa ki cuani yaa nankpama n tie ne lan tua padijuukaali Li Miali Diedo po: li juoli ban baa jia yaali hali ku kpiegu kani leni li kpama leni yaa kpakaagu n ŋuagi ti nuadi,

¹⁰ leni a cayaanlieda leni a kpama leni yaa kpama n ye a loga nni, leni mi pualanma, wan baa taani ki tabidi ki ñani yaama leni a cayaana.

¹¹ O kopadiciamo baa sia lani li padibinbinli po. Li tie mi fantama n buoni yaa padijiema Li Miali Diedo po.

¹² Li yaa tie ŋuabo, o baa cuani o u kaangagidiŋanmoanu nintuali.

¹³ O baa maani o nuu ki padiyanga yeni yuli po ki kodi ga u Kadikaanu gbandieli buliñoatuogili. Alono bijaba baa wuli o soama li padibinbinli kaani kuli.

¹⁴ Laa padili nni o baa taa ki cuani yaala n tie ne lan tua padijuukaali U Tienu po: yaa kpakaagu n ŋuagi ti nuadi kuli,

¹⁵ leni a cayaanlieda leni a kpama, leni yaa kpama n ye a loga nni, leni mi pualanma, wan baa taani ki tabidi ki ñani yaama leni a cayaana.

¹⁶ O kopadiciamo baa sia lani li padibinbinli po. Likuli tie yaa padijiema n sia ki buodi cain ki tie yaala yaa nuulu n mani. Mi nankpama kuli tie Li Miali Diedo n die yaala.

¹⁷ Li tie yaa *balimaama n kan miidi, ki yaa caa hali yi puoliŋuani, hali yaa yogu n tu yaa yogu. Yin ban ye naankani kuli yin da ŋmani nan kpama bi soama.»