Levi 18 - Gourmanchéma Bible

¹ Li Miali Diedo den maadi leni Musa ki yedi:

² «Maadi leni Isalele yaaba ki yedi ba: N tie Li Miali Diedo yi Tienu.

³ Yin da tieni mani yaala n tiedi Ejipiti diema nni, yin den ye naani. Yin da tieni yaala n tiedi Kanana diema nni min caani yi naani. Yin da ŋoadi bi tuada.

⁴ Yin yaa tiendi mani n ñoabonbilikaana, ki yaa ŋua n*balimaama, ki faami likuli po. Mini n tie Li Miali Diedo yi Tienu.

⁵ Yin yaa kubi mani n bali maama leni n ñoabonbilikaana. Yaa nilo n kubi ki tiendi likuli baa yaa ye kelima li yaa po. N tie Li Miali Diedo.

⁶ Oba kuli n da nagini yaa pua n kpi leni o ki le o mubima. N tie Li Miali Diedo.

⁷ Ŋan da le a baa mubili bi a naa mubili kelima o tie a naa. A kan le o mubili.

⁸ A kan le a baa pua mubili. Li tie a baa yaa mubili.

⁹ A kan le a naataanpuoga yaa mubili, yua n tie a baa bisalo bi a naa bisalo, bi baa bi yaa mali o a diegu nni, bi bi yaa den mali o kaanto.

¹⁰ A kan le a bijua yaa bisalo mubili, bi a bisalo yaa bisalo yaa mubili kelima li tie fini aba yaa mubile.

¹¹ A kan le a baa bisalo yaa mubili, a baa n mali yua kelima yi kuli taa baa.

¹² A kan le a baa kpelo bi o waalo yua n tie pua yaa mubili, kelima wani leni a baa kpi bonŋanla.

¹³ A kan le a naa kpelo bi o waalo yua n tie ja yaa mubili kelima wani leni a naa kpi bonŋanla.

¹⁴ A kan le a baa kpelo yaa pua bi o waalo yaa pua yaa mubili kelima bi tie a naanba.

¹⁵ A kan le a biyuaga yaa mubili. Li tie a bijua yaa pua yo. Lani yaa po a kan le o mubili.

¹⁶ A kan le a kpelo yaa pua bi a waalo yaa pua yaa mubili. Li tie a kpelo bi a waalo yaa mubili.

¹⁷ A kan le pua leni o bisalo yaa mubili. A kan taa o bijua yaa bisalo bi o bisalo yaa bisalo ki le bi mubila. Bi kuli kpi bonŋanla. Li tie caginde.

¹⁸ A kan taa a pua waalo ki fiini o kpelo yaa nunponli. A kan le o mubili hali ke a pua da ye.

¹⁹ Ŋan da nagini yaa pua n ye o ŋmaalo nni, wan *joagini yaa yogunu ki le o mubili.

²⁰ Ŋan da gedi a nisaalilielo pua kani ki dua leni o ki taani ki joagini leni o.

²¹ Ŋan da teni a bila siiga baa yendo ban lu o mi fantama nni ki padi o, o bulo *Moloko po. Ŋan da jugi ki biidi a Tienu yeli. N tie Li Miali Diedo.

²² Ŋan da dua leni jatoa nani o ja n dua leni o pua maama. Li tie cagindi.

²³ Ŋan da dua leni ki yanga ki joagini aba leni ki yanga yeni. Pua mo n da nagini yanga ki dua leni ga. Li tie cagindi.

²⁴ Yin da joagini yiba leni laa bonla kuli baa bonyenla. Min baa deli ki pa yi bi diema yaama yeni, bi den joagini ki biidi biba leni laa bonbuoli kuli.

²⁵ Bi den joagini bi diema kuli yeni. N baa pa mi diema yeni mi biadima panpaani, mi diema baa sii ki ñani ba mi niinni.

²⁶ Yin yaa kubi mani n bali maama leni n ñoabonbilikaana kuli. Yin da tieni laa cagindi buoli baa yenma, baa u dogu maabiga, baa yaa caano n kaa yi siiga n da tieni la.

²⁷ Kelima lani n tie yaa niba n den kpa ye laa diema nni n den kpa tiendi yaa cagindi buolu, hali ke mi diema kuli mo den cagini.

²⁸ Yeni mi diema kan sii yi kelima yi joagindi po nani man baa sii ki ñani yaa nibuoli n den ye likani ke yi daa cua maama yeni.

²⁹ Yaa niba n tieni laa cagindi buoli siiga baa bonyenla, bi baa paadi ki ñani ba bi yaa niba siiga.

³⁰ Yin yaa kubi mani n bali maama. Yin da tieni laa cagindi siiga baa bonyenla, yaala n den tiendi ke yi daa cua. Yin da joagini yiba leni laa bonla. N tie Li Miali Diedo yi Tienu.»