Levi 1 - Gourmanchéma Bible

A padijuukaana

¹ Li Miali Diedo den yini Musa. O den maadi leni o u*Kadikaanu gbandieli nni ki yedi:

² «Ŋan maadi leni Isalele yaaba ki yedi: Yi siiga nilo yaa baa padi padili Li Miali Diedo po, wan ñani o padiyanga i ne yaaka ti yanbidi yaa siiga.

³ O paabu yaa tie padijuukaali ki tie nua, o baa taa yaa bontonli n ki pia poadi kuli. O baa padi o u Kadikaanu gbandieli yeni buliñoabu kani, ki baa Miali Diedo n ga opo.

⁴ O baa maani o nuu ki padiyanga yeni yuli po. Li Miali Diedo baa ga laa padili ki ñani laa nilo po o *tuonbiadi.

⁵ O baa kodi ki yanga yeni u *kaangagidiŋanmoanu nintuali. Alono bijaba, bi kopadicianba mo baa cuani mi soama ki miimii li *padibinbinli yaali n ye u Kadikaanu gbandieli yeni nintuali kaani kuli.

⁶ O baa lidi ki paadipaadi ki yanga yeni.

⁷ O kopadiciamo Alono bijaba baa cuoni mi fantama li padibinbinli po ki maani ti daadi mi fantama po.

⁸ Bi baa maani a nanjena yeni leni li yuli leni mi kpama ti daadi yeni po.

⁹ O nilo yua n cuani li padili yeni baa taa mi ñima ki ŋuudi tugu nni yaala leni a biana, o kopadiciamo mo n sia likuli li padibinbinli po. Li tie padijuukaali, mi fantama n buoni yaa padili, yaali yaa nuulu n mani Li Miali Diedo po.

¹⁰ O nilo yeni padili yaa tie padijuukaali ki tie yanbiga, li yaa tie pia bi ŋuabo, o baa padi bontonli yaali n ki pia poadi.

¹¹ O baa kodi li li padibinbinli jienu po, u kaangagidiŋanmoanu nintuali. Alono bijaba, bi kopadicianba mo baa wuli mi soama li padibinbinli po ki gaani i kaani kuli.

¹² O nilo yeni baa paadipaadi ki yanga yeni. O kopadiciamo mo n taa likuli ki taani leni li yuli leni mi kpama ki maani yaa daadi n maa li padibinbinli po ki co yeni po.

¹³ O baa taa mi ñima ki ŋuudi tugu nni yaala leni a biana. O kopadiciamo baa maani likuli li padibinbinli po ki sia. Li tie padijuukaali, mi fantama n buoni yaa padili, yaali yaa nuulu n mani Li Miali Diedo po.

¹⁴ O nilo yeni padili yaa tie padijuukaali ki tie bonyugiditi, o baa padi kpaajefanmu bi kpaajenawuundi.

¹⁵ O kopadiciamo baa padi ku bonyugidigu yeni li padibinbinli po. O baa jia o yuli leni o taajenñiagu ki sia li li padibinbinli po. O baa ŋmiani ki ñani mi soama ki miimii li padibinbinli po ki gaani i kaani kuli.

¹⁶ O baa ñani ku fiagu leni ti kobidi ki lu ki kuu leni li padibinbinli puoli po ban tiendi mi fantanpienma naani.

¹⁷ O baa toadi i fiabi ki ban ŋa lan yaa diegi. Lanwani o kopadiciamo baa maani ku bonyugidigu yeni yaa daadi n maa li padibinbinli po ki co yeni po. Li tie padijuukaali, mi fantama n buoni yaa padili, yaali yaa nuulu n mani Li Miali Diedo po.