Kolosi 1 - Gourmanchéma Bible

I fuondi

¹ Mini Polo, Jesu Kilisiti tondo kelima U Tienu yanbuama po, leni ti kpiilo Timote, n diani li tili

² yinba ti kpiiba yaaba n tie bi *nigagidiŋanba leni bi nidugikaaba Kilisiti nni ki ye Kolosa po po. Ti Baa U Tienu n pa yi li *ŋanbili leni mi yanduanma.

Polo pagi U Tienu Kolosa yaaba po

³ Ti tuondi U Tienu ti Diedo Jesu Kilisiti Baa yipo, ki go jaandi yipo yaa yogunu kuli kaa cedi.

⁴ Kelima tin gbadi ke yi pia yaa *dandanli Jesu Kilisiti po leni yaa buama bi nigagidiŋanba kuli po.

⁵ Yi baa la kelima U Tienu n bili yipo yaa suginma tanpoli po, i moamoani maama, yaama n tie o Laabaaliŋamo n den kpa cua yikani, ki bangi yi yaama.

⁶ Laa laabaaliŋamo pundi yikani ki yayadi ŋanduna nni kuli ki luoni o bonluonkaala ki yabidi ki pugidi. Li tie yeni yi siiga hali yin den gbadi o yaa daali ki bandi U Tienu ŋanbili n tie yaala moamoani.

⁷ Li tie nani ti buado leni ti tuonsoanlielo Epafasa n den bangi yi maama. O tie yipo Kilisiti naacendugika,

⁸ ki den waani ti U Tienu Fuoma n teni ke yi pia yaa buamoanma.

⁹ Li tie lani yaa po ke hali tin gbadi lankuli yaa daali, ti jaandi yipo U Tienu kaa cedi ki miadi o wan gbieni yi pala leni yaa yanfuoma leni yaa fanu n ñani wani U Tienu kani, ke yin bandi o yanbuama.

¹⁰ Yeni yi tagu n yaa tie nani lan dagidi o Diedo po maama, ke yin yaa tiendi yaala n mani opo yogunu kuli. Yin yaa tuuni a tuonŋama buoli kuli, ki kpedi ki suagi liiga U Tienu bandima nni.

¹¹ Ti go miadi o ke wan pa yi u paalu li bonla kuli po kelima o paalu yu n pia ti kpiagidi yaa po, ke yin yaa pia li toli leni li juunli yogunu kuli.

¹² Yaa tuondi mani Baa leni li pamanli, yua n teni ke yi dagidi ki baa yi biinu wani U Tienu n bili yaa ŋalimani mi yenma diema nni o nigagidiŋanba po.

¹³ O faabi ti ki ñani ti li *biigili paaciamu nni ki kuani ti o *Bijabuadiga yaa diema nni.

¹⁴ O yaa niinne ke ti pia mi *daafaabima leni ti ti *tuonbiadi sugili.

Kilisiti n tie yua leni wan tuuni yaa tuonli

¹⁵ Wani Kilisiti n tie U Tienu tin kaa fidi ki nua yua yaa nannanli, ki go tie o Bijakpiaga yua n den ye hali ke bonlaba kuli daa tagi.

¹⁶ Li bonla kuli den tagi o yaa niinni, yaala n ye tanpoli leni yaala n ye ki tinga nni kuli, tin nua yaala leni tin kaa nua yaala: yaaba n ka i bali kalikaani po leni yaaba n tie bi diediba leni bi yudanba leni yaaba n pia li bali kuli. Li bonla kuli tie o yaa tagima ki tagi o yaa po.

¹⁷ O ye hali ke bonlaba kuli daa ye. Wani n kubi li bonla kuli ke li tuugi ki se bonŋanla.

¹⁸ Wani n tie Kilisiti n yini yaaba kuli yuli, bani o gbanandi. O tie o kpialo, U Tienu Bijakpiaga, wani U Tienu n den kpa fiini yua bi tinkpiba siiga, ke wan yaa tugi li yuli li bonla kuli nni.

¹⁹ Kelima li den mani U Tienu po ke o yedagidikaama kuli n yaa ye Kilisiti niinni.

²⁰ O yanbuama po goga, o teni ke li bonla kuli, yaala n ye ŋanduna nni leni yaala n ye tanpoli po kuli, n mangi leni o kelima Kilisiti yaa po. O ñani ti yibalindi ki teni ke i mani ye kelima o soama li *dapoanpoanli po yaa po.

²¹ Yinba yaaba n den tie bi canba leni U Tienu yibalinba kelima yi yantiabiada leni yi tuonbiada po,

²² o teni ke yi mangi leni o moala kelima o Bijua n den kpe yaa kuuma o gbanandi nni yaa po. U Tienu tieni yeni ki bua ke yin sedi o nintuali ki ŋani cain ki da pia tagiliba kuli kaa pia ban baa kuli yi leni yaala.

²³ Li baa tie yeni ke yi n yaa se bonŋanla yaa tanpuuli n pa po kelima yi dandanli po, ki naa lebidi ki ŋa o Laabaaliŋamo suginma, yin den baa yaama. Bi waani ŋanduna yaaba kuli o Laabaaliŋamo yeni, mini Polo mo n tua yua yaa naacemo.

Polo tuonli Kilisiti n yini yaaba po

²⁴ N mangidi n pali moala leni min laadi yipo yaa fala. N tiendi yeni ke min gbieni n gbanandi nni yaala n poadi Kilisiti yaa fala o gbanandi nni, yaadi n tie wan n yini yaaba po.

²⁵ N tua Kilisiti n yini yaaba yaa tuonsoanlo kelima U Tienu den puogi nni ke min yaa wangi yi U Tienu maama kuli.

²⁶ Mani n tie yaa *bondoaginkaala n den wuo hali yogu yaa jamaani n pendi kuli po, ki doagidi moala o nigagidiŋanba po.

²⁷ O bua ki teni o nigagidiŋanba n yaa bani o bondoaginkaala, yaala n tie ŋalimani ki pia ti kpiagidi ki ye i nibuoli kuli po. Laa bondoaginkaala tie line, Kilisiti ye yi niinni, ki teni ke yi pia mi suginma ke yi baa taani ki baa U Tienu kpiagidi.

²⁸ Ti wangi wani yaa maame ki tuodi ki wangi nilo kuli, ki go bangi laa maama leni mi yanfuoma, ki bua ki cuani nilo kuli U Tienu kani, ke o dagidi cain Kilisiti nni.

²⁹ Li tie lani yaa po ke n tuuni, ki moa li muali leni o yaa fidu yu n tuuni n niinni leni u paaciamu.