Josue 2 - Gourmanchéma Bible

¹ Isalele yaaba n den ye Sitimi dogu nni, Nuni bijua Josue den fiini bi siiga niba lie. O den soani ba ŋasiili nni ban duodi ki ban goandi mi diema ki diidi Jeliko dogu bonŋanla. Bi den fii ki gedi ki ban pundi ki kua yaa poconconli n yi Lahaba diegu nni ki duani lankani.

² Jeliko bado den gbadi ke Isalele yaaba siiga niba cua u dogu nni ku ñiagu ki baa goandi ki bandi mi diema.

³ O den soani Lahaba kani ki yedi o: «Ŋan ñani yaa jaba n cua ki kua a diegu nni yeni, kelima bi cua ki bua ki goandi ki bandi mi diema kule.»

⁴ O pua yeni den taa bi jaliediba yeni ki wuoni ba. O den yedi o bado tonda: «Moamoane ke bi jaba cua n kani. Ama mii bi bani ban ñani naani.

⁵ Lan bi bii, bi bi ñani hali ke bi daa luoni u dogu bilinciamu buliñoabu. Mii bani ban gedi naani. Yi yaa jaligi yi baa nandi ba.»

⁶ Ama o den duoni ba o doangu po ki wuoni ba ban jia ki maani yaa baligi buolu n yi *len yaa niinni.

⁷ O bado tonda n den ñani u dogu nni yaa yogunu, u dogu bilinciamu buliñoabu den luoni. Bi den tagini yaa sanu n caa Judana duonli po ki lingi Isalele jaliediba yeni.

Josue tonda leni Lahaba niani biyaba i ñoaniani

⁸ Lahaba den doni o doangu tanpoli bi jaliediba yeni kani hali ke bi daa duani,

⁹ ki yedi ba: «N bani ke Li Miali Diedo puni yi ti diema na, ti jawaandi cuo ti boncianla kelima yipo. Mi diema niba kuli tugusoama sani ke bi jigi cie kelima yipo.

¹⁰ Kelima ti gbadi ke yin ñani Ejipiti nni, Li Miali Diedo den teni ke mi ñincianmoanma ñima ñuudi ke yin baa ki tagini. Ti go gbadi yin soani Sihoni leni Ogi yaa tuona, bani Amola yaaba yaaba n ye Judana boanduoli badiliediba. Ti gbadi yin kpa ba ki bolini bi bonpiakaala kuli maama.

¹¹ Tin gbadi lankuli, li wudi ti gbani boncianla hali ke ti papaali bodi kelima yipo, kelima Li Miali Diedo yi Tienu n tie U Tienu ki die tanpoli leni tinga kuli.

¹² Moala, n mia yi, yin taa U Tienu yeli ki poli ke yi baa ŋanbi n baadiegu po nani min ŋanbi yipo maama.

¹³ Yin pa nni mani yaa sinankeeni n baa doagidi ke yi baa cedi n baa leni n naa, leni n naataanjaba leni n naataanpola, leni bi yaa niba kuli, ke yi baa faabi ti tin da kpe.»

¹⁴ Bi jaliediba yeni den goa ki yedi Lahaba: «Li yaa tie baa kuuma, ti baa kpe kelima yipo li yaa tie yi kubi kaa doagidi tin cua yaala. U Tienu yaa puni ti mi diema, ti baa ŋanbi apo nani tin niani a maama.»

¹⁵ Nani o pua yeni diegu n den jagi u dogu bilinciamu yuli po yeni, o den jiini ba li bonli kani leni u baabu u dogu puoli po.

¹⁶ O den yedi: «Yin cubini mani a juana po ke yaaba n lingi yi n da ti kadi leni yi. Yin wuoni mani lankani hali dana taa, hali yaaba n lingi yi yeni n goa ki kpeni no, lanwani yin taa yi sanu.»

¹⁷ Bi jaba yeni den yedi o: «Ti baa kubi tin poli ki niani a yaa ñoanianu yeni.

¹⁸ Ama diidi ŋan baa tieni yaala: ti yaa kua mi diema nni, ŋan loli yaa gaalimoanu n tie na ŋan jiini ti yaa bonli kani na. Ŋan kuani a baa leni a naa leni a naataanjaba leni a naataanpola leni a baadiegu yaaba kuli a yaa diegu nni.

¹⁹ Bi siiga nni niloba yaa ñani a diegu nni, o soama baa jiidi o yaa yuli po, o tagili ki ŋua tinba. Ama ti siiga nni nilo yaa maani o nuu yua n taani ki ye leni a a diegu nni kuli po ki ku o, o soama baa yaa ye ti yaa yula po.

²⁰ De a yaa doagidi ki waani tin cua yaala, tin poli ki niani yaa ñoanianu ki go luo ti.»

²¹ O pua den goa ki yedi ba: «Lan tieni nani yin maadi maama.» Lanwani o den cabi ba ke bi gedi. O den loli u gaalimoanu li bonli kani.

²² Bi den gedi a juana po ki ban wuoni likani hali dana taa, hali yaaba n den ŋoadi ki bua ki cuo ba n ban lebidi ki kuni. Bani yaaba n den ŋoadi ki bua ki cuo ba den lingilingi ba u sanu nni ama baa den laa ba.

²³ Lanwani bi jaliediba yeni den goa ki jiidi li juali ki duodi Judana ki goa ki gedi Nuni bijua Josue kani ki togidi o yaala n den tieni ba kuli.

²⁴ Bi den yedi Josue: «Laa pia kuli tama, Li Miali Diedo puni ti mi diema kuli. Mi diema yaaba kuli tugusoama sani ke bi gbani wudi kelima tipo.»