Josue 1 - Gourmanchéma Bible

Josue ga Musa kaanu ki tugi Isalele yaaba yuli

¹ Li Miali Diedo naacemo Musa n den kpe, wani Li Miali Diedo den maadi leni Nuni bijua Josue, Musa todika, ki yedi o:

² «N naacemo Musa kpe. Moala ŋan fii ki duodi yaa kpenu n tie na, yu n yi Judana, fini leni ku niligu na kuli, ki ban kua min puni bani Isalele yaaba yaa diema nni.

³ Yi taali n baa ŋma naankani kuli, n puni yi likuli, nani min den yedi Musa maama.

⁴ Yi diema banlu, ganu po, baa yaa tie mi fanpienma. Jienu po mi baa tandi ki pundi hali yaa juana n ye Libani diema nni. Puoli po mi baa n pundi hali u kpenciamu Yufilata, lankuli tie Heta yaaba diema. Nintuali po mo mi baa tandi ki pundi hali mi ñincianma Meditelane.

⁵ Hali ŋan baa yaa ye, oba kuli kan fidi ki sedi ki pani a, kelima n baa yaa ye leni a nani min den ye leni Musa maama. N baa kubi a, n kan ŋa ŋa abada.

⁶ Paagi aba, paagi a pali, kelima fini n baa gobidi yaa nibuolu n tie na ban kua ki diedi min den niani bi yaajanba ke n baa pa ba yaa diema.

⁷ Ŋan paagi aba ki paagi a pali bebe, ki tuo ki yaa ŋua n naacemo Musa n den waani a yaa *balimaama. Ŋan da jadi ki ŋa ma baa waamu. Lanwani ŋan fii ki baa tieni yaala kuli, li baa cuoni apo bonŋanla.

⁸ Ŋan yaa tiadi yogunu kuli n balimaama tili na bangima. Ŋan yaa cogi ki kpaagi mipo u yensiinu leni ku ñiagu kuli, ke ŋan yaa tiendi man yedi yaala kuli. Yeni, ŋan baa jagi yaala kuli a baa tieni la, li baa cuoni bonŋanla mo.

⁹ Ŋan da sundi ke n teni a yaa ñoabonli n tie na: Ŋan paagi aba ki paagi a pali. Ŋan da jie liba kuli, ŋan da cedi liba n wudi a gbanu, kelima mini Li Miali Diedo a Tienu ye leni a ŋan fii ki baa tieni yaala kuli nni.»

Josue bogini Judana duodima

¹⁰ Josue den puogi Isalele yaaba yudanba

¹¹ ke ban gaani li nagili nni ki waani bi niba ke ban bogini mi jiema kelima dana taa siiga bi baa duodi Judana ki gedi ki ban diedi Li Miali Diedo bi Tienu n puni ba ke ban diedi yaa diema.

¹² Josue den yedi Lubena buolu yaaba leni Gada buolu yaaba leni Manase buolu yu n tie buolu boagidima:

¹³ «Yin tiadi mani Li Miali Diedo naacemo Musa n den teni yi yaa ñoabonli wan den yedi yi: ‹Li Miali Diedo yi Tienu puni yi yaa diema n tie na, ki puni yi mi fuodima.

¹⁴ Yi puoba leni yi bila leni yi yandi baa fidi ki yaa ye ne, Musa n boagidi ki teni yi yaa diema na niinni. Ama yinba bi jaba yaaba n pundi ki gedi bu toabu kuli, yin taa yi toatiadi ki kua yi kpiiba liiga ki duodi u kpenu ki ban todi ba,

¹⁵ hali U Tienu n baa pa bani mo n diedi wan puni ba yaa diema nani wan puni yi ke yimo diedi maama. Li yaa puoli yin goa ki diedi Musa n boagidi ki teni yi yaa diema, yaama n ye Judana puoli na.› »

¹⁶ Bi den goa ki yedi Josue: «Ti baa tieni ŋan yedi ti yaala kuli, ŋan baa soani ti naani kuli ti baa gedi.

¹⁷ Ti baa tuo ki yaa ŋua a maama kuli nani tin den tuo ki ŋua Musa yaa maama maama. Li Miali Diedo a Tienu n yaa ye leni a nani wan den ye leni Musa maama be.

¹⁸ Yua n yie a ñoabonbilikaali kaa tuo ki tieni ŋan yedi o yaala kuli, bi baa kpa o. Ŋan paagi aba ki paagi a pali bebe.»