Jonasi 4 - Gourmanchéma Bible

¹ Laa bonla den biidi Jonasa pali hali boncianla. O pali den beni,

² ke o mia Li Miali Diedo ki yedi: «Li Miali Diedo, hali min den ye n diema nni min den li jie yaala kaa nne. N den bani ke a tie yaa Tienu n juogidi, ki gba mi niñima, ki pia li juunli leni li *ŋanbili. A yen lebidi a yama ki cedi ŋan bi jagi ke a baa tieni o nilo yaala. Lani yaa po yo ke n den tiini ki caa Talisisi.

³ Moala Li Miali Diedo, taa n miali kelima n kuuma cie npo n yema.»

⁴ Li Miali Diedo den yedi o: «Ŋan bieni a pali yeni, a sua ke li ŋani bi?»

⁵ Jonasa den ñani u dogu nni ki kali u puoli po. O den tii li janli likani ki kali li soangu nni ki guu ki baa le yaala n baa tieni u dogu nni.

⁶ Li Miali Diedo U Tienu den teni ke ku tungu pudi ki kpedi ki yiini Jonasa yuli po ki tieni opo u soangu ki bua ki kuugi o pali. Li den mangi Jonasa pali boncianla.

⁷ Ama laa daali yaa fiifaama U Tienu den teni ke o sidibilo cua ki ñidi ku tungu yeni ke ku kuodi.

⁸ U yienu n den pudi ki doagidi, U Tienu go den teni ke mi fawatonma ñani puoli ki figi. U yienu den puli Jonasa yuli hali ke o bua ki pabi. O den mia mi kuuma ki yedi: «N kuuma n cie npo n yema.»

⁹ U Tienu den yedi Jonasa: «Ŋan bieni a pali ku tungu po yeni a sua ke li ŋani bi?» Jonasa den goa ki yedi: «N pia moamoani ki bieni n pali hali ki mia mi kuuma.»

¹⁰ Li Miali Diedo den yedi o: «Ŋaa soani tuonliba kuli ku tungu yeni po. Fini ka teni ke ku pudi. Ku pudi ki kpedi ñayengu, ki go bodi ñayengu. Ama baa yeni mi niñima cuo ŋa ku po.

¹¹ Mi niñima kan cuo mini wani Ninife dogu po, wuni yaa dociamu n pia ke li cie niba kobiga n tudapiilie (120 000) yaaba n ki bani bi ganu leni bi jienu paadima, ki go pia ti yandi boncianla?»