Jonasi 1 - Gourmanchéma Bible

U Tienu soani Jonasa ke o yie

¹ Li Miali Diedo den teni Amitayi bijua Jonasa o ñoabonli ki yedi:

² «Gedi u dociamu Ninife po ki ban kpaani ki fu leni u niba, kelima bi biadima pundi hali n kani.»

³ Ama Jonasa den fii ki bua ki sani ki gedi Talisisi ki foagidi leni Li Miali Diedo. O den gedi Jafa yaa dogu nni, ki baa kua ñinbiaciangu yaagu n caa Talisisi. O den pani ku panpaani ki kua ki yegi leni yaaba n caa Talisisi yeni, ki bua ki foagidi leni Li Miali Diedo.

⁴ Ama Li Miali Diedo den teni ke ku fabiadigu fii mi ñincianma nni. Ku tafaaciangu den lengidi mi ñincianma hali ke ku ñinbiaciangu yeni den bua ki mudi.

⁵ Bi ñinbiagobidiba den jie ke yua kuli den mia o yaa*bulo mi todima. Bi den luni yaa tiadi n ye ku ñinbiaciangu nni mi ñincianma nni ki yuagi ku ñinbiagu. Ama li den sua ke Jonasa jiidi ku ñinbiaciangu tugu nni ki duani ki goa hali boncianla.

⁶ Ku ñinbiaciangu yudaano den nagini o kani ki yedi o: «Be yaa po ke a goa? Fii ki mia amo yaa bulo. Daalinba o baa tiadi tipo ki teni tin da bia.»

⁷ Bi ñinbiagobidiba den yedi biyaba: «Cua mani tin bu ku baagu ki bandi yua n cuani tipo yaa fala n tie na.» Bi den buni ku baagu ke li cuo Jonasa.

⁸ Lani bi den yedi o: «Fini n cuani tipo yaa fala n tie na. A tuonli tie be? A ñani le? A tie mi laa diema yua? A tie be yaa nibuolu yo?»

⁹ O den goa ki yedi ba: «N tie Ebilu buolu. N fangi Li Miali Diedo, wani U Tienu yua n die mi ñincianma, yua n tagi tanpoli leni ki tinga kuli.»

¹⁰ Ti jawaanciandi den cuo bi jaba yeni ke bi yedi o: «Be n teni ke a tieni yeni?» Kelima li den sua ke bi jaba yeni bandi ke Jonasa tiini ki bua ki foagidi leni Li Miali Diedo kelima wani oba n den waani ba.

¹¹ Mi ñincianma n den lengidi ki pugidi, bi jaba yeni den yedi Jonasa: «Ti baa tieni a lede mi ñincianma n duani tipo?»

¹² O den yedi ba: «Se yin taa nni ki lu mi ñincianma nni, lani n tie mi ñincianma n duani yipo suo, kelima n bani ke mini yaa po n teni ke ku tafaaciangu yeni fii yipo.»

¹³ Bi jaba yeni den kudi ki bua ki pundi li boanjaali, ama baa den fidi kelima mi ñincianma den lengidi ki pugidi yogunu kuli ki yie bipo.

¹⁴ Lanwani bi den taa Li Miali Diedo yeli ki jaandi ki mia o ki yedi: «Li Miali Diedo, da bolini ti kelima o naa ja po, da tuni ti o ja yua kaa tieni ti liba na yaa tagili. Kelima fini Li Miali Diedo, ŋan bi tieni yaala yeni kuli, a tieni nani ŋan bua maama.»

¹⁵ Lanwani bi den taa Jonasa ki luni o mi ñincianma nni. Mi ñincianma lengidima den duani suo.

¹⁶ Bi jaba yeni den jie Li Miali Diedo boncianla ki padi li padili Li Miali Diedo po.