Joeli 1 - Gourmanchéma Bible

I naaci baa mi diema, u tayialu mo cua

¹ Li Miali Diedo den teni Petueli bijua Joeli maadi yaa maama n tie na:

² «Cengi mani line yinba a nikpela, Diadi mani yi tuba ki cengi yinba Juda yaaba kuli. Naani li bonbuolu kpa tieni yi yogunu Bi yi yaajanba yogunu?

³ Yin togidi la yi bila, Ke yi bila mo n togidi la bi bila, Ke bi yaa bila mo n togidi la yaa nifiima n baa ŋoadi.

⁴ A sidibila n ŋmani ki ŋa yaala, A dondoba n ŋmani ki dudi. A dondoba n ŋmani ki ŋa yaala, A tobiñaana n ŋmani ki dudi. A tobiñaana n ŋmani ki ŋa yaala, I naaci n ŋmani ki dudi.

⁵ Fundi mani yinba a dañogaada, yin mua mani boncianla. Kelima i duven tiidi bonluonkaala luoma po Yi baa luo mi dapanma.

⁶ U nibuolu baa n diema. U pia u paalu kaa pia coali mo. U ñina tie nani li yangbanjali ñina. Nani li yangbanñuali cela yeni.

⁷ U nibuolu yeni bolini ti duven tiidi, Ki jendijendi ti kankandi, Ki kpabidikpabidi i ki tudi ki luni i, Ki kogidi n duven tiidi dapoaga ki ŋa a dapiena.

⁸ Mua mani nani yaa pocaano n mua o calo kuuma yeni.

⁹ Mi pienma pada leni a ñincaba pada bodi Li Miali Diedo diegu nni. Li Miali Diedo naacenba, bi kopadicianba ye leni li paboanli.

¹⁰ I kuani jugi, Ki tinga yema ki mani, Kelima *ŋalikama biidi, O duvenpaano gbeni, Mi kpama mo gbeni.

¹¹ Bi kpakpaaba gbani wudi, I duven tiidi kpakpaaba buudi ŋalikama leni *olije po, Kelima i kuani bonluonkaala bia.

¹² Bu duven tibu kuodi, Bu kankanbu mali, *Gelenadie tilondi leni ti kpakpaliti leni pomie tiidi, Leni i kuani tiidi kuli mali. Bi nisaaliba pamanli gbeni.

Mi yanlebidima yiinu

¹³ Yinba bi kopadicianba, Laa mani li paboanli tiadi ki biidi yi pala. Yinba yaaba n tuuni li *padibinbinli kani, yin mua mani. Cua mani ku ñiagu ki duani ki laa li paboanli tiadi, Kelima mi pienma pada leni a ñincaba bodi yi Tienu diegu nni.

¹⁴ Bili mani u yogunu ki loli bu ñoabu, Taani mani taancianli. Taani mani a nikpela leni mi diema yaaba Li Miali Diedo yi Tienu diegu nni. Kpaani ki mia mani Li Miali Diedo todima!

¹⁵ Ŋain, yaa dabiadili n kpendi ne te! Li Miali Diedo pabienli daali nagini, Li kpendi leni U Paaciamu Kuli Daano n jagi yaa bolinma.

¹⁶ Mi jiema bodi ti nunbu nni, Li pamanli leni li pamankandikaali bodi ti Tienu diegu nni.

¹⁷ Li bonbulikaala kuodi ti jaabuodi nni, A senba tua bonkuoma, A buabuana baa ki mumudi kelima ŋalikama gbeni.

¹⁸ Ti yandi n buudi maama ne te! I naakuli pua yaya ki lindi, Kelima moaŋmankaadi ki go ye, Baa ti yanbidi mo ye leni falaciamo.

¹⁹ Li Miali Diedo, n jigidi ki nua fine Ki kpaani ki miadi a todima! Kelima mi fantama dini li yankpaafuali, U mupienu mo sia i kuani tiidi.

²⁰ Ti moayandi moko jigidi ki nua fine, Kelima a ñinbuona ñuudi, Mi fantama mo dini li yankpaafuali.