Jobi 35 - Gourmanchéma Bible

¹ Elihu go den yedi:

² «Naani a tama ke a se a moamoani nne? Naani a baa fidi ki yedi: ‹N *teginma ye U Tienu nii nne?›

³ Kelima a yedi: ‹Naani li pia npo mi todima? N yaa tieni ti *tuonbiadi li pia npo mi laa fuome?›

⁴ Mini n baa guani Fini leni a danlinba kuli po yenma.

⁵ Yaadi ki diidi tanpoli ki le, Ki faami a tawala n kpedi ki yiini apo maama.

⁶ A yaa tieni ti tuonbiadi, a biidi opo be? A yaa fiini opo mi yiema, li baa tieni o be?

⁷ A yaa tiegi a puuni o be? O ŋmani be yo a kani?

⁸ A biadima li baa fidi ki biidi a nisaalilielo po bebe, A teginma mo li baa fidi ki todi a nisaalilielo bebe.

⁹ Bi mua kelima bi nibiadiba yabinu po Bi miadi mi todima kelima niba boncianla n mabindi ba maama po.

¹⁰ Ama oba kuli ki tua: ‹U Tienu yua tagi nni, Ki bangi nni i yani ku ñiagu ye le?

¹¹ Wani yua n bangi ti li bonla ki cie ti fuayandi, Ki puuni ti mi yanfuoma ki cie tanpoli nuani ye le?›

¹² Lanwani bi yen kuudi ama o kan guani, Kelima yaaba n tiendi mi biadima yaa japaadi po.

¹³ Bi kuudi, ama laa pia mayuli Kelima U Tienu naa cengi, Wani U Paaciamu Kuli Daano ki faami lipo.

*

¹⁴ Baa ke a yedi ke ŋaa nua o, A buudi wani nan ye o nintuali Lanwani ŋan guudi o.

¹⁵ Moala, nani o pabienli n daa tieni liba yeni, Ke o tie nani waa faami mi yiema po yeni,

¹⁶ Joba yaadi o ñoabu fanma, Ki maadi yaa maama n doagidi ke waa bani puu.»