Jobi 34 - Gourmanchéma Bible

¹ Elihu go den yedi:

² «Yinba bi yanfodanba, cengi mani n maama! Yinba yaaba n pia mi bandima, Cengi mani min baa yedi yaala.

³ Kelima li tubili cengi ki gagidi mi maama, Nani bu lanbu n lengi ki gagidi mi jiema maama yeni.

⁴ Lanwani tinba, tin lingi ki gagidi yaala n tiegi ti yula po, Ki tuo mani ti siiga yaala n ŋani.

*

⁵ Kelima Joba yedi: ‹N tie niteginka! Ama ke U Tienu nan muni nni i moamoani.

⁶ Baa leni n moamoani kuli, O nua nni nani o tuofaadaano yeni, Ki faligidi nni ke n naa tieni *tuonbiadi.›

⁷ Joba mo tie be nibuolu nne? O faadi li ñuali nani ban ñu mi ñima maama yene.

⁸ O yegi leni yaa niba n naa tiegi, Ki cuoni leni bi nibiadiba.

⁹ Kelima o yedi: ‹Laa pia o nilo po todimaba Wan kuani o yama U Tienu nni.›

*

¹⁰ Cengi mani nni yinba yaaba n pia mi yama! U Tienu kan fidi ki tieni biadima! U Paaciamu Kuli Daano kan fidi ki tieni yaala n ki tiegi!

¹¹ O guandi o nisaalo nani o tuona n tie maama. O pa yua kuli o panpaani nani o tagu n tie maama.

¹² Abada, U Tienu wani kan tieni mi biadima, U Paaciamu Kuli Daano kan golini i moamoani.

¹³ Ŋme puogi o wan yaa gobidi ki tinga? Ŋme n taa li ŋandunli ki piani o?

¹⁴ Li yaa tie ke o bi tia o yuceli bebe yaa po, Ki bi goa ga li miali fuoma,

¹⁵ Yaala n pia miali ki fo kuli baa taani ki bodi yenma, O nisaalo mo n guani mi tama nni.

¹⁶ A yaa pia mi yanfuoma cengi mine, Ki diadi a tubili ki cengi n maama:

¹⁷ Naani yua nani mi *teginma baa fidi ki gobidi mi diema? A baa tuo ki jaligi U Paaciamu Kuli Daano yua n tiegi?

¹⁸ Wani bebe n baa fidi ki yedi o bado: ‹Ŋaa pia fuoma!› Ki yedi bi bulicinba mo: ‹Yi tie nibiadiba!›

¹⁹ Waa diidi bi badijaba nunbu, Waa tiendi gagidima o piado leni o luodo siiga. Kelima wani n tagi bikuli.

²⁰ Mi kuuma li baa ludi ki baa bikuli po yenme, Ku yagisiigu nibuoluba yen le fala ki bodi, U paalu daano mo n bodi ke laa ŋua nisaaloba.

²¹ Kelima U Tienu diidi ki kpaagi o nisaalo tuada po, Ki nua o tayaagima kuli po.

²² Laa pia yaa *biigili bi yaa kuuma jinjingu n baa fidi Ki tua kaanpaalu bi nibiadiba po o nintuali.

*

²³ Laa tie tiladi wan kpaagi o nilo ki waagi, Ki nan yuandi ki jia leni o ti buudi.

²⁴ O pua ki guli bi paatieba, ki daa kpa lingi lan baa tieni maama. O yen taa nitoaba mo ki kaani bi kaanu.

²⁵ Kelima o bani bi tuona paadima. O yen tudi ki lu ba ku ñiagu, ki midi midi ba.

²⁶ O yen waani ba fala ŋasala nni nani bi nibiadiba yeni,

²⁷ Bi den buli o ki nunga, Kaa bua ki bandi o sani.

²⁸ Bi mabindi o luodo leni bi niñinniba Ki teni ke bi bubula pundi o kani.

²⁹ U Tienu yaa puni nibuoluba bi diemaba mi yanduanma, Ŋme nan baa fidi ki jaligi o lipo? O yaa buli o nunga, ŋme n baa fidi ki diidi o?

³⁰ Lani n tie ke yaa nilo n ki bani U Tienu N da kali ti gbandi po Ki tua diagu bi niba po.

³¹ Ama o nilo yaa yedi U Tienu: ‹N tuo n tuonbiadi, n kan go tieni yaala n bia.

³² Min kaa bani yaala yaa po mo, waani nni la. Li yaa tie ke n tieni yaala n kaa dagidi, N kan go faa ki lieni la.›

³³ Naani U Tienu baa ŋoadi a yaa yanjaga yo ki pa i panpaani? N bani ke a baga ki ye, Kelima fini n jagi li bonla, mini ka. Ŋan bani yaala, yedi la.

*

³⁴ Yaa niba n pia li kpaagili leni mi yama, Ki cengi nni kuli baa yedi nni:

³⁵ ‹Joba maadi ki naa pia bandimaba O maama mo ki pia mayuli.

³⁶ Lanwani Joba n yaa baa ye leni o fala Kelima o maadi nani yaa niba n ki tiegi yene!

³⁷ O go pugini o tuonbiadi po yaa tagili n bia. O fiini mi yiema tikuli siiga, Ki maadi leni U Tienu wan bua maama.› »