Jobi 33 - Gourmanchéma Bible

¹ Lanwani moala, Joba, cengi n maama! Diadi a tuba ki cengi n maama kuli bonŋanla!

² Diidi n baa waani min pia yaa maama.

³ N maama baa doagidi n pali n tiegi maama. N li baa maadi i moamoani bebe yo.

⁴ U Tienu Fuoma n tagi nni U Paaciamu Kuli Daano fuoma n teni ke n ye.

⁵ A yaa baa fidi, ŋan guani npo, Ki bogini bonŋanla ki cua n kani.

⁶ U Tienu nintuali n tie nani fini yene Bi tagi n moko leni ku yoagu yo.

⁷ Yeni, a kan go yaa digibi n nintuali leni jawaandi, Bi ki yaa tama ke n bua ki ñii ki midi a.

*

⁸ A maadi ke n tubili gbadi Ŋan den pia yaa maama ki tua:

⁹ ‹Mii pia jaligi, mii pia *tuonbiadi N ŋani cain, mii pia tagiliba.

¹⁰ Ama U Tienu wani baa wan baa jaligi nni yaala yaa po, Ki nua nni nani o yibali yene.

¹¹ O kpaa n taana ti kpaadi Ki faami min tiendi yaala kuli po.›

¹² N baa guani a, ke lankani wani ŋaa pia moamoani, Kelima U Tienu yaba ki cie o nilo.

¹³ Be yaa po ke a bua ki yaa nia leni o? Kelima bi kan fidi ki guani o o maama kuli.

*

¹⁴ Ama yogunuba U Tienu yen maadi nanda, Ki goa ki maadi mine. Baa yeni bi niba naa faami lipo.

¹⁵ O yen maadi ti dangidi nni leni li bonlekaala nni, Bi niba n dua bi duani po ke mi goacianma cuo ba yaa yogunu.

¹⁶ Lanwani, o yen doagidi bi niba po li bonla, Ki waani ba ke ban faami bonŋanla,

¹⁷ Ki fidi ki ñani bi yula a tuongunda nni, Ki kubi bi yula leni ti japaadi.

¹⁸ Yene ke o faabidi bi miana leni li kuli, Ki ñandi ba mi kuuma cuonu nni.

*

¹⁹ Yogunuba moko U Tienu yen teni o nilo n yiagi ki duani, O gbanandi kuli n yaa ye leni fala Ke wan fidi ki kpaagi lipo.

²⁰ Baa mi jiema ki go yen mani opo, Baa li yaa tie o jebuadima.

²¹ O dondi hali yaala ke bi kan go fidi ki bandi o, Ke o kpaba bebe di bili niini.

²² Waa go foagi leni li kuli, O miali mo di ye mi kuuma nuu nne.

²³ Ama o yaa baa yaa maleki n baa tua o *candanbaalo, Yendo bebe bonba tudili siiga, Ke o baa waani o yaala tiegi,

²⁴ O baa mia opo ki yedi: ‹Faabi o wan da kua li kuli nni, N baa opo mi *daafaabima!›

*

²⁵ Lanwani o gbanandi baa goa ki pandi Wan goa ki tua nani o panma dana nni yeni.

²⁶ O baa mia U Tienu, o mo baa gbadi o miabu. O baa sedi o nintuali leni i yigini, Kelima U Tienu n baa guani o nilo po nani wan tie maama.

²⁷ O yiini bi niba nintuali ki tua: ‹N tieni ti tuonbiadi, mii tieni yaala n tiegi. Ama baa tieni nni nani lan bi pundi ban tieni nni maama.

²⁸ U Tienu faabi nni ke min da kua li kuli nni, Ke n baa ye ki nua mi yenma.›

*

²⁹ Lani n tie U Tienu n tiendi yaala o nisaalo po. Laa tie milie ka, laa tie mitaa mo ka.

³⁰ Yene ke o yen faabi bi niba leni li kuli, Ki teni li miali yenma n yendi ba.

³¹ Joba, suo ki cengi n maama! Suoni, ke mini n baa maadi!

³² A yaa pia maamaba ki bua ki maadi, ŋan guani nni, Kelima n bua ki saa apo i moamoani.

³³ Lan yaaka, cengi nni! Suoni, ke n baa bangi a mi yama n tie yaala.»