Jobi 12 - Gourmanchéma Bible

¹ Joba den guani o ki yedi:

² «Moamoani po, li naani nni ke yinba bebe n tie bi nisaaliba, Ke yi yaa ti ye yaa daali mo, mi yanfuoma baa gbeni.

³ Mini moko li pia mi yama nani yinba yene, yii cie nni ba, Ŋme wani n kan bandi li naa bonla buolu?

⁴ N tua li ñuali bonla n danlinba po. Mini yua n moandi ki baa maadi Leni U Tienu yua n den guandi nni po. O niteginka, wani o papiendaano n di tua li ñuali bonla.

⁵ Mi yemanma danba tua: ‹Ki faliga tie o niñinnilo po yo.› Bi maadi laa maama yaaba n jadibi po yo.

⁶ Bi sanjaba leni yaaba n ki ŋua U Tienu ye leni mi yanduanma bi diedi nni. Bi li dugi bi gbanmanu po ki ŋa U Tienu.

*

⁷ Ama buali ti yandi, ti baa bangi a, Tanpoli nuani mo baa doagidi apo laa bonla.

⁸ Boe leni ki tinga, ki baa bangi a. Mi ñincianma nni jami mo baa togidi a la.

⁹ Bi siiga ŋme n kaa bani Ke Li Miali Diedo yaa nuu n tieni laa bonla kuli?

¹⁰ Wani n muubi o nuu nni miali fo kuli naano. Leni nisaalimiali kuli fuoma.

¹¹ Nani ban tua maama: ‹Li tubili gba ki gagidi mi maama, Nani bu lanbu n lengi ki gagidi mi jiema maama yeni.

¹² Mi yanfuoma ye a jakpela kane Li miafoagili nni mo n pia mi yanfuoma.›

¹³ Mi yanfuoma leni u paaciamu ye U Tienu kani, I tundi leni mi yanfuoma ye o yaa kane.

*

¹⁴ O yaa biidi yaala, oba kan fidi ki ŋanbi la. O yaa luoni nilo mo, oba kan fidi ki luodi o.

¹⁵ O yaa sieni ki taaga, likuli baa kuodi. O yaa luodi ki ŋa ga mo gan biidi ki tinga.

¹⁶ U paalu leni mi banma ye o nuu nni. Yua n yaadi leni yua n teni ke o yaadi kuli ye o yaa nuu nne.

¹⁷ O caani a bandimoana ti yonbidi, Ki pua ki lengi bi bujiaba mo yaa yama.

¹⁸ O faabidi bi niba leni bi badibiadiba tugumoangu, Ki goa ki luo bi badiba yeni leni i baabi.

¹⁹ O caani bi kopadicianba ti yonbidi, Ki tudi ki lu yaa badiba n se bonŋanla.

²⁰ O yie ke yaaba n bani mi maama bonŋanla kan maadi, Ki teni ke a jakpela mo yaa yama bodi.

²¹ O teni ke bi bulicinba laa i fe Ki loti bi gbanmandanba gbanñagiditi.

²² O doagidi yaala n bi duagi li *biigili nni. O taa mi kuuma jinjingu ki cuani mi yenma nni.

²³ O teni ke i nibuoli yen pili, wan goa ki bolini ba. O yen teni ban yabidi wan yuandi ki gedini ba ti yonbidi.

²⁴ O ñani mi diema yudanba yanfuoma, Ki teni ke bi puagi mi fanpienma nni, Sanu n ki ye naani,

²⁵ Ki teni ke bi tulibi li biigili nni, Yenma n ki ye naani. O teni ke bi puagi nani yaa niba n ñuni ki gaadi yeni.