Jobi 1 - Gourmanchéma Bible

Joba falakpialo

¹ O ja den ye Utisi diema nni ke bi yi o Joba. Laa ja den tie papiendaano ki go tiegi mo. O den fangi U Tienu kaa tiendi yaala n bia.

² O den mali bonjala lele leni bonpola taa.

³ O den pia yanbidi tudalele (7 000), yuoyuodi tudataa (3 000), naakpakpaadi tudili (1 000), ŋunñoe kobimuu, o tuonsoanba den yaba hali boncianla. Lani n den teni ke Palesitina diema puoli niba kuli siiga, wani n den tie bi nicianmoano.

⁴ O bijaba den caa ki lebidi biyaba deni ki tiendi u badu ki yen soani ban yini bi naataanpotaada ban cua ki je ki go ño leni ba.

⁵ U badu dana yaa den gbeni, Joba den yen soani ban yini o bila wan gagidi ki ŋanbi ba. O yen yagidi ki fii ki padi bikuli yendo yendo po li *padijuukaali kelima Joba yen yedi o pali nni: «Daalinba n bijaba tieni ti *tuonbiadi ki tudi U Tienu po bi pala nni.» Joba den li yen tiendi yene yogunu kuli.

⁶ Dayenli, U Tienu malekinba den cua Li Miali Diedo nintuali, Sutaani ku *tuotabigu yudaano moko den cua ki sedi bi siiga.

⁷ Li Miali Diedo den buali Sutaani: «A ñani le yo?» Sutaani den goa ki yedi Li Miali Diedo: «N da li goadi n goada yo, ki gangi ki lindi ki tinga nni.»

⁸ Li Miali Diedo den yedi Sutaani: «A nan ko laa n naacemo Joba? Waa pia kuli o lie ki tinga nni. O tie papiendaano ki go tiegi mo. O fangi U Tienu waa tiendi kuli yaala n bia mo.»

⁹ Sutaani den goa ki yedi Li Miali Diedo: «Naani fanma fanma po yo ke Joba fangi fini Li Miali Diedo?

¹⁰ Naani ŋaa kubi o wani leni o diegu leni wan die yaala kuli kaa? A seligi o nii tuonli, o yankuli mo wuli ladi ki gbie mi diema nni.

¹¹ Ama tandi a nuu ki fie wan pia yaala kuli, n bani cain ke o li baa teli ki sugi a a nunbu nne.»

¹² Li Miali Diedo den yedi Sutaani: «Diidi wan die yaala kuli ye a nuu nni. Ama ŋan da sii wani oba!» Lanwani Sutaani den fuadi ki ñani Li Miali Diedo kani.

¹³ Dayenli Joba bijaba leni o bisiaba den di ki go ñu duven bi kukuli kpelo ki bonjaga deni,

¹⁴ ke o tondo den cua Joba kani ki yedi o: «I ne bi ko bu kpaabu ke i ŋunñoe baali ba ki ŋmani ti muadi,

¹⁵ ke Sabe diema yaaba cua ki baa ba, ki taa ti yandi ki ku bi naacenba leni mu jugisiemu. Mini n bebe n sani ki cia ki cua ki baa pa ŋa laabaali.»

¹⁶ Hali ke o daa den maadi ki gbeni, nitoa den cua ki yedi: «U Tienu fantama ñani tanpoli ki baa ki buoni ti yanbidi leni bi naacenba ki bolini ba. Mini bebe n sani ki cia ki cua ki baa pa ŋa laabaali.»

¹⁷ Hali ke omo daa den maadi ki gbeni, nitoa den cua ki yedi: «Kalide diema yaaba nicaga taa bi cua ki baa ti yuoyuodi po ki taa ti ki ban cuoni, ki ku bi naacenba leni ki jugisiega. Mini n bebe n sani ki cia ki cua ki baa pa ŋa laabaali.»

¹⁸ Hali ke omo daa den maadi ki gbeni, nitoa den cua ki yedi: «A bijaba leni a bisiaba bi di ki go ñu duven bi kukuli nikpelo ki bonjaga yaa diegu nni,

¹⁹ ke ku tafaaciangu ñani mi fanpienma kalu po ki pua ki guli li dieli goannaada kuli. Li dieli ŋmadi ki baa bi nipanba yeni po ke bi kpe. Mini n bebe n sani ki cia ki cua ki baa pa ŋa laabaali.»

²⁰ Lanwani Joba den fii sedi ki padi o liadicianli ki kuo o yuli. Li yaa puoli o den labini ki pugi U Tienu,

²¹ ki yedi: «N ñani n naa tugu nni mubile. N go baa guani mubile. Li Miali Diedo n puni nni, Li Miali Diedo n goa ga. Li Miali Diedo yeli n baa ti kpiagidi.»

²² Laa bonla nni kuli, Joba naa den tieni tuonbiadi, waa den maadi U Tienu po mabiadimaba kuli.