Jeremi Bubula 4 - Gourmanchéma Bible

¹ Jam, li ga lede! Wula baa fidi ki joagini? Wulamoano ñuadi kpe! Li jaandieli tana yayadi i sani nni kuli.

² Siyono dogu yaaba, yaaba n pia li mayuli boncianla, Li ga lede ke bi di nua ba nani o maado n maa yaa boba yeni?

³ Baa i tanboe tendi bi bila li biili. Ama n niba goa ki tua tugumoandanba Nani mi fanpienma nni tataagu yeni.

⁴ U ñunñuunu teni ke ki canpandiga lanbu tabi ki lanŋaandi nni. A biwaala miadi mi jiema, Ke oba mo ki puuni ba.

⁵ Yaaba n den di mi jemanma ku mi koma i sani nni. Yaa niba n fandi mi yemanma nni tungi bi nii Ku tunbengu nni ki lingi liba.

⁶ N niba diema badisalo tagili cie Sodoma dogu yaaba *tuonbiadi, Yaaba n den ŋmadi ki baa yenma Ke niloba ki pieni ki luni ba.

⁷ O gobidikaaba pala pieni ki cie a tatana Ki go pieni ki cie mi naaŋanma. Bi gbananbili den ŋani ki go ñuliti ke bi go pia u fidu mo.

⁸ Ama moala bi nunmu gbidi. Bi kan go le ba i sani nni ki fidi bandi ba. Bi gbangu sani ki tabini bi kpaba. Ki kuodi nani ku daagu yeni.

⁹ Bu toabu jugisiega n dini yaaba yaa yula n mani Ki cie mi koma n dini yaaba, Yaaba n dondi dondi kelima li bonjekaala luoma po.

¹⁰ Diidi yaa puoba n tie ne, Baa ke bi gba mi niñima, Bi taa bi bila ki ŋaani ba ki baa ŋmani, Kelima yaa yebiadima n ŋma mi diema yeni po.

¹¹ Li Miali Diedo, O Diedo teni ke o pabienli tuoni li bianu, Ke o doagidi o pabiencianli. Siyono dogu tugu nni o cuoni mi fantama, Yaama n dini u tanpuuna.

¹² Ki tinga badiba, yaa niba n ye ŋanduna nni Kan bi den daani Ke yibalinba kua Jelusalema buliñoana kani.

¹³ Laa bonla tieni kelima o sawalipuaba tuonbiadi Leni o kopadicianba tagili po, Yaaba n den wuli bi niteginkamoanba soama bi siiga yeni.

¹⁴ Bi tie juama yo ki puagi i sani nni. Mi soama *joagini ba Hali yaala ke oba kan go fidi ki sii bi tiadi.

¹⁵ Bi den kpaani ki tua: «Yaa niba n joagini yeni fuadi mani! Fuadi mani! Fuadi mani! Da sii ti mani!» Yaa yogunu ke bi tiini ki puagi i nibuoli siiga, Bi kan go fidi ki yaa ye ti siiga.

¹⁶ Li Miali Diedo wani oba n yadi ba. Waa go bua ki le ba. Bi naa kpiagi bi kopadicianba Ki buali ban miini bi yula a jakpela kani.

¹⁷ Tinba wani yaa nuni baa mua yo Ki guu yaa todima n ki kpendi. Ti den waagi ki se ki guu Yaa nibuolu n cua ki kan fidi ga ti.

¹⁸ Bi den ŋua ki kpaagi ti taayaagima kuli, Ki baa yie tipo tin da gedi tin die yaa kaani po. Ti miana juodima nagini, ti dana tuoni! Yeni de, ti kuuma nagini!

¹⁹ Ti yibalinba jaligi ki cie jiebaninba. Bi ŋua ki deli ti a juana po Ki dia ti ti diadi mi fanpienma nni.

²⁰ Yua n den tie ti miali, Li Miali Diedo tondo, Bi cuo o bi buodi nni Tin den maadi yua yaa maama ki tua Ke o baa kubi ti tin yaa ye i nibuoli siiga yeni.

²¹ Edomi diema poŋamo, suagi ki yaa mangidi a pali, Fini yua n kaa Utisi diema nni. A moko baa mubini ki tadiñokaaga Ki ño ki gaadi, Ki sedi mubili.

²² Fini Siyono dogu badisalo A tagili gbeni. O kan go gedini a ti yonbidi. Edomi diema badisalo, o baa waani a tagili fala. O baa doagidi a tuonbiadi kuli.