Jeremi Bubula 3 - Gourmanchéma Bible

¹ N tie yaa nilo n laa i fe Leni Li Miali Diedo pabienli gbiamu.

² O gobidi nni, ki teni ke n gedi li *biigili nni Laa tie yenma nni ka.

³ O fii ki sedi npo Ki pua nni daali kuli.

⁴ O teni ke n gbanandi leni n gbangu kuli mali, O mudi n kpaba.

⁵ O teni ke n ye leni li paboanli leni fala, Ki n kan fidi ki cia.

⁶ O teni ke n ye li biigili nni Nani yaaba n kpe ke li waagi boncianla yeni.

⁷ O poali nni deenni ke min da fidi ki ña Ki loli nni leni i kugaali.

⁸ N kpaani ki mia o todima, Waa cengi min jaandi ki miadi yaala.

⁹ O luoni n sanu leni a tana, Ya n tie tangbenga Ki bolini n sani.

¹⁰ O tie npo nani yaa yanbiadiga n wuo ki guu yene, Nani yaa yangbanlo n baa u kaanu ki wuoni yeni.

¹¹ O teni ke n lebidi, O cuo nni ki toatoadi Ki ŋa nni leni li paboanli.

¹² O kpali o dabanli Ki teli nni o piemu ki baa toa nni.

¹³ O toani n ciaga nni O luoli piemi kuli.

¹⁴ Mini n di kpandi ki tua n niba kuli n baa yaa laa yua. Daali kuli mini n kpandi ki tua bi yani.

¹⁵ O teni ke n ye leni li paboanli hali boncianla Ki ŋa nni leni i yanbani.

¹⁶ O kpaadi n ñina, Ki guli nni mi tama nni ki fuli nni.

¹⁷ A teni ke mii go pia yanduanma. N sundi mi yemanma mo n tie yaala.

¹⁸ N yedi: «Mii go pia suginma saala po.» Min den pia yaa suginma Li Miali Diedo po yeni gbeni.

¹⁹ Tiadi min laa yaa fe Min den puagi yaa yogunu Leni min den laa yaa paboanli kuli po.

²⁰ N baa ki tiani laa bonla kuli po bonŋanla, N gbanu mo wudi.

²¹ Diidi min bua ki bili yaala n pali nni, Min pia mi suginma yaala yaa niinni.

²² Lani n tie ke Li Miali Diedo ŋanma Ki gbeni cain, O niñingbadima mo kan tuoni mi bianu.

²³ Mi baa yaa pugidi tiŋaagu kuli. A yantugupiengu mo ki pia lie.

²⁴ N yedi: «Li Miali Diedo tie n biinu, Lani n teni ke n baa yaa dugi opo.»

²⁵ Li Miali Diedo ŋanma yaba Yua n dugi opo leni yua n lingi o kuli po.

²⁶ Li ŋani hali bonŋanla o nilo n guudi leni li juunli Li Miali Diedo *faabima.

²⁷ Li go ŋani bonŋanla Wan bangi ki juuni fala nni O panma yogunu.

²⁸ Wan kali o bebe suo ki yaa ŋmini, Kelima baa Li Miali Diedo bili opo yene.

²⁹ Wan miini o yuli Mi suginma n da ye yaa yogunu.

³⁰ Wan pegidi o kpianu yua pua o po, Ki le i fe boncianla.

³¹ Kelima Li Miali Diedo Kan lu ki diani o nisaalo yaa yogu n tu yaa yogu.

³² Ama o yaa waani ti fala, O go baa gbadi ti niñima Nani o ŋanma n yaba maama yaa po.

³³ Kelima waa yen fiagidi o nisaalo, Kelima o bua ki fiagi o ka, Bi ki waani bi niba fala fanma fanma bebe ka.

³⁴ Bi yaa ŋma ŋma Mi diema kpaada yaa yogunu,

³⁵ Bi yaa lagidi ki ŋa yaa bujiali n tiegi Tanpoli Badiciamo nintuali yaa yogunu,

³⁶ Bi yaa jia o nilo ti buudi ki janbi o yaa yogunu, Naani Li Miali Diedo ki nua laa bonla kuli?

³⁷ Ŋme n yedi li bonla n tieni, ke li tieni? Naani o Diedo ka die li bonla kuli?

³⁸ Naani tanpoli Badiciamo ka teni Ke yaala n ŋani leni yaala n bia kuli tiendi?

³⁹ Be yaa po yo ke o nisaalo yenbidi O yaa baa ye ke o *tuonbiadi kandi?

⁴⁰ Tin noanli, tin diidi mani ti sani bonŋanla, Ki guani Li Miali Diedo kani.

⁴¹ Tin yugidi mani ti nii leni ti pala kuli Ti Tienu yua n ye tanpoli po.

⁴² Tinba tiba ti tua ti tuonbiadi danba leni niyiekaaba! Amo, ŋaa tieni tipo sugili!

⁴³ Li Miali Diedo, a taa a pabienli ki goli nani bu kpalibu yeni, Ki ŋoadi ki deli ti. A den kpaani kaa gba niñima moko.

⁴⁴ A taa ku tawaligu ki goli Kaa bua ki gbadi jaandiba.

⁴⁵ A teni ke ti tua ban yie yaala, Ban sengi yaala i nibuoli siiga.

⁴⁶ Ti yibalinba kuli yaadi tipo bi ñoana.

⁴⁷ Tinba yaa po wani, ti jawaandi leni ki nunfufuuga, Mi bolinma leni fala bebe n kubi ti.

⁴⁸ N nuni ninsiidi wuliti Ki puubi nani i kpeni ñima yeni, Kelima n niba bodima po.

⁴⁹ N nuni ninsiidi wuti kaa fuodi, Ki wuti kaa se,

⁵⁰ Hali Li Miali Diedo n baa faami yaa yogunu ki diidi ki le Wani yua n ye tanpoli yeni.

⁵¹ Min nua ke yaala n tiendi n dogu nni bonpola yeni koani nni.

⁵² Bi ŋua ki deli nni nani ki nuanga yeni, Yaaba n tie n yibalinba fanma fanma yeni.

⁵³ Bi bolini n miali ku buogu nni. Bi lugidi nni a tana.

⁵⁴ Mi ñima milini n yuli. N yedi: «N bia!»

⁵⁵ Hali ku buobiadigu nni, N tiani ki yini a ki mia a todima.

⁵⁶ A gba n nialu: «Da biini a tuba N fala leni min miadi a todima yaa yogunu!»

⁵⁷ Min yini a yaa daali ki mia a todima, A yedi nni: «Da jie!»

⁵⁸ Li Miali Diedo, a maadi npo n buudi nni, Ki daa ki faabi n miali.

⁵⁹ Li Miali Diedo, a nua ban tudi npo maama, Saa npo n moamoani.

⁶⁰ A nua ban tu bi panli maama Leni ban tuu ñoabu ki pia yaa janbi.

⁶¹ O Diedo, a gba bi sugidi kuli Leni ban pia npo yaa janbi kuli.

⁶² N yibalinba yenbidi leni bi maama kuli, Pegidi ki se mini yaa po daali kuli.

⁶³ Diidi ban kaa leni ban se kuli, Bi bugini mine i yani ki ñuadi nni.

⁶⁴ Li Miali Diedo ŋan soani ban mo yeni, Ŋan guani ba nani bi tuada n tie maama.

⁶⁵ A baa teni lan paki ba. A solindi baa jiidi bi yula po.

⁶⁶ Li Miali Diedo, a baa ŋoadi ki deli ba leni li pabienli, Ki bolini ba, fini Li Miali Diedo tinfanma nni.