Jeremi Bubula 2 - Gourmanchéma Bible

¹ Jam, li ga lede ke o Diedo pabienli nni, O teni ke ti tawaboandi libini Jelusalema? O pieni ki luni tinga nni Isalele kpiagidi. Waa tiani o diegu po. O pabienli nni o sundi o taaŋmaakaanu po.

² O Diedo nali Jakobo buoli diedi kuli yenma, Ki naa gbadi bipo niñima. O pabienli nni o pua ki guli Juda dopaali kuli. O pua ki luni bikuli tiipo. O cagini mi diema leni mi badijaba.

³ O pabienli nni o pua ki guli Isalele paalu. O yie ke o kan tieni bipo liba kuli Yibali n cua yaa yogunu. O cuoni Jakobo diema nni mi fantama Yaama n di i kaani kuli.

⁴ O kpali o dabanli nani yibali yeni. O jienbuagu mo dadi ki baa toa. O ku yaala n bi pia n nuni po mi ñuadima kuli. O yadi o pabienli nani mi fantama yeni, Siyono badisalo gbandieli po.

⁵ O Diedo goa ki tua nani yibali yene, Ki nali Isalele. O nali o badidiedi kuli, Ki bolini o dopaali. O teni ke Juda badisalo yenbidi ki go ñiindi. I kaliti leni i ñiindi yabidi.

⁶ O tudi o sadinga nagili yeni Ki bolini wan den kadi leni ti naankani. Li Miali Diedo teni ke bi sundi Siyono nni Mi jaanma taana leni mi fuodima jaanma po. O pabienli nni o teni ke bi fali bi badiba leni bi kopadicianba.

⁷ Li Miali Diedo ñani o *padibinbinli maama nni Ki fali o *kaangagidiŋamu. O ŋa yibali nuu nni Jelusalema badidiegu bilini. Bi yibalinba laa ki yigini Li Miali Diedo diegu nni Nani u badu daale yeni.

⁸ Li Miali Diedo bili ke o baa bolini Jelusalema bilini. O tandi mi bolinma baabu, Waa pua biabia leni wan bolini mo. O pua ki guli U dogu bilinliedi kuli Ke likuli wudi ki baali.

⁹ O buliñoana feli ki tinga nni. O bolini ŋa, ki pua ki mudi a kpakpaana. O bado leni o koanbala kuli ye i nilanbuoli siiga. *Balimaama ki ye, Baa o sawalipualo ki go baadi bonlekaala Li Miali Diedo kani.

¹⁰ Siyono nikpela kaa tiipo, baa tua liba kuli. Bi wuli mi tama bi yula po, Ki lani lani li paboanli tiadi. Jelusalema jafanba Tibini bi yula ki diidi tiipo.

¹¹ N nuni mua ki coagi. N yama kuli paagi. Mii bani kuli min baa kua naani, Kelima n niba n ye yaa yebiadima nni po. Kelima a bila leni a biŋaanda Ŋmadi ki baali u dogu siiga.

¹² Bi den tua bi naanba: «Ti baa baa mi jiema leni mi ñima le?» Bi den ŋmadi ki baali nani yaaba n poagili u dogu siiga yeni. Bi den yen fuo ki jiindi Bi naanba biina po yo.

¹³ N go baa yedi a be? N baa sua ke ŋme n de leni a? N baa baagi a lede, Siyono *powandiali? Kelima yaa yebiadima n ŋma ŋa Yaba ki pundi mi ñincianma. Ŋme n baa fidi ki paagi a?

¹⁴ A sawalipuaba baa apo li bonlekaala, Yaa bonlekaala n ki pia ñuadiba, kaa pia fuomaba kuli mo. Baa kadi ki waani a tagili kuli cain Ki baa ñani a ti yonbidi nni. Bi baa apo yaa bonlekaala N kaa mani, ki naa go pia fuoma mo.

¹⁵ Bi santagiba kuli puogi bi nii apo Bi fuoni ki duani bi yula Ki ñuadi Jelusalema badisalo. Naani baa den li yi laa dogu ka: «Yaa ŋamu n ki pia lie, ki tinga kuli pamanli yeni?»

¹⁶ A yibalinba kuli yaadi bi ñoana apo. Bi fuoni ki kadi bi ñina. Bi yedi: «Ti nali o.» Tin den bua yaa daali n yeni Ti nandi o, ti nua o.

¹⁷ Li Miali Diedo tieni wan bi jagi yaala. O tieni wan bi yedi yaala, Wan den maadi yaa maama hali yogu. O bolini ke niñima ki pia o Ki teni ke a yibalinba laa a puoli. O pugini a yibalinba paalu.

¹⁸ Bi kuudi leni bi pala kuli o Diedo po. Siyono bisalo guonli po, Teni a ninsiidi n puubi nani u kpenu yeni. Da pa a yuli fuodimaba kuli, A nunbili mo n da fuodi baa waamu.

¹⁹ Bi fii ki mua boncianla. Ku yagu yaa cili ki yagidi yaa yogunu, Togidi Li Miali Diedo a yantugu kuli. Yugidi a nii opo ki jaandi Ki mia a bila laafialo, Mi koma n caa ki baa je yaaba i sankuni nni kuli yeni.

²⁰ Diidi, Li Miali Diedo diidi! A soani ŋme yo li naa tuonli? Naani li bi tie tilade bi puoba n ŋmani bi bimadimu, Ban bua yaa biwaala bonŋanla leni bi kopadicianba n kpe u kaangagidiŋamu nni?

²¹ Bi jawaaba leni a jakpela Bikuli bili bili tiipo i sani nni. N jafanba leni n jawaaba Bu toabu dini bikuli. A pabienli nni a ku ba ke niñima ki cuo ŋa.

²² Nani u badu daali yeni, A yini n yieninlieba min jie yaaba hali boncianla. Li Miali Diedo pabienli daali Kaa pia yua sani ki cia, Li kaa pia yua n sieni leni miali. Min den bua yaaba bonŋanla ki wubi ba yeni, N yibali buoni ba.