Jeremi 9 - Gourmanchéma Bible

¹ Bi yaa bi puni nni mi fanpienma nni Bi sancenba n baa wuoni naani, N baa sani ki ŋa n diema niba ki foagidi leni ba, Kelima bikuli tie *conconma danba. Bikuli tie janbi danba bebe.

² Bi landi coa nani a dabana yeni mi faama po, Bi yantugupiendi mo ka teni ke bi pia u paalu mi diema nni. Se biadima n tu biadima. Baa bani nni. Mini Miali Diedo n yedi yeni.

³ Yua kuli n fangi o yuli leni o danli Oba n da dugi o nikpiilo baa yendo po Kelima kpiilo kuli baa fidi ki lu i janbi Danli kuli mo pia bu tingbangbaabu.

⁴ Bi boandi biyaba Baa maadi moani Bi maani mi faama puama Bi coagini bi yula ki tiendi i tagili

⁵ Li Miali Diedo yedi: «Bi baa ña tugumoangu nni ki ban kua tugumoantoagu nni Ki ña mi naa faama nni ki ban kua mine nni, Ki yiedi ke bi kan bandi nni.»

⁶ Lani n teni ke Li Miali Diedo U Paaciamu Kuli Daano yedi: «Diidi n baa teni ban nandi ba mi fantama nni, Min biigi ba. N baa tieni n niba lede?

⁷ Bi landi tie nani yaa piemi n sondi bonŋanla yene. Bi li pia i boandi bebe. Bi baa maadi leni bi yieninlielo mi yanduanma maama, Ki nan bani bi pala nni ke bi dia o ku diagu.

⁸ Li Miali Diedo yedi daa, Naani lani yaa po n kan fii ki sedi bipo? Naani n kan tu u naa nibuolu li panli?»

I moe leni i wanli yogunu

⁹ A juana po, N baa mua ki figindi. Mi fanpienma nni, i yankpaakaani nni N baa wanli i wanli kelima bi juu ba. Oba ki poandi likani. Baa go gba yankuli lanbu, Ki cili tanpoli nuani ki ban taani leni ti yandi, Likuli bodi cain.

¹⁰ Li Miali Diedo yedi: «N baa teni Jelusalema diema n tua diegbengu, I tanboe n ye naankani. N baa teni Juda dogi n tua paboanli kaanu Niba n ki go ye naani.»

¹¹ Naani li pia yua yaa yama n fo bonŋanla Ki baa fidi ki doagidi laa bonla n tie yaala? Li yaa tie ke Li Miali Diedo n maadi leni o, Wan doagidi ki waani yaala yaa po ke mi diema bodi Leni yaala yaa po ke mi tua fanpienma Nilo n ki go poandi naankani!

¹² Li Miali Diedo yedi: «Li tie kelima bi ŋa n*balimaama, min den teni ba yaama yeni. Baa cengi n nialu, baa ŋoadi nani min den bili bipo maama.

¹³ Bi ŋoadi bi pala juagu leni *Baali *buli, bi baanba n den teni ke bi maani yaa buli.

¹⁴ Lani n teni Li Miali Diedo U Paaciamu Kuli Daano, Isalele Tienu yedi nanda: Lani yaa po n baa ñuni bi naa niba ti loabidi, ki teni ban yaa ye leni li paboanli.

¹⁵ N baa yadi ba i nibuoli nni bani leni bi baanba n kaa den bani yaa nibuoli. N baa teni bu toabu n ŋoadi ba hali ki ban bolini ba cain.»

¹⁶ Li Miali Diedo U Paaciamu Kuli Daano yedi nanda: «Kpaagi mani! Yini mani yaa puoba n mua i kumoe Yini ba mani ban cua. Ban yini mani yaa puoba n bani li tuonli Ki teni mani ban cua.

¹⁷ Ban jaligi ki mua ki wanli tipo. Ti nuni n wuli ti ninsiidi, Ti ninsiidi n wuli boncianla

¹⁸ Kelima i ñiindi ña Siyono po ki kpendi. Lede! Bi baa ti cain Ti laa i fe n yeni. Ti ñani mi diema nni tilade Ki sua ke bi pua ki mudi ti diedi!»

¹⁹ Bi puoba, cengi mani Li Miali Diedo maama Yi tuba mo n gbadi o ñoabu n yedi yaala. Bangi mani yi bisiaba ban baa yaa mua ki figindi maama. Bangi mani yiyaba i wanli n wanli maama.

²⁰ Kelima mi kuuma kua ti diebona kani. Mi kua ti dieŋama nni. Mi di a bila i sani nni, Ki di bi nipanba mu daamu nni.

²¹ Li Miali Diedo ñoabonli nne: Bi niba baa kpe ki wudi nani ti bugidi yeni i kuani nni Nani ban yendi yaa dikala Ki luni yua n yendi puoli po yeni, Oba kuli kan nuadi ba.

Mi yanfuomoanma n tie Li Miali Diedo bandima

²² Li Miali Diedo yedi nanda: «O yanfodaano n da jigini o yuli o yanfuoma po. O gbanmandaano n da jigini o yuli o gbanmanu po. O piado n da jigini o yuli o piama po.

²³ Yua n bua ki jigini o yuli, N jigini o yuli ke o pia mi yanfuoma ki bani nni. Ki bani ke n tie Li Miali Diedo. Yua n tiendi mi ŋanma, Yaa bujiali n tiegi leni yaala n tiegi ki tinga nni. Kelima min bua yaala n yeni.» Mini Li Miali Diedo n yedi yeni.

Yaaba n tama ke bi kua ku koanciagu n fangi bi yula

²⁴ Li Miali Diedo n yedi ke a dana kpendi Ke o baa fii ki sedi yaaba n ki lebidi bi pala yeni po.

²⁵ Bani n tie na: Ejipiti yaaba, Juda yaaba, Edomi yaaba, Amoni buolu yaaba, Moabi yaaba, leni yaaba n yen kugini ki kuo bi langbiadi kuli Yaaba n ye mi fanpienma nni, Kelima i nibuoli kuli pala naa lebidi Isalele yaaba kuli pala naa kua ku koanciagu.