Jeremi 8 - Gourmanchéma Bible

¹ Laa yogunu Li Miali Diedo den yedi: «Bi baa bugidi ki ñani bi kula nni Juda badiba kpaba, a koanbala kpaba, bi kopadicianba leni bi sawalipuaba kpaba leni Jelusalema niba kpaba.

² Bi baa deni laa kpaba u yienu nni, o ŋmaalo nni, leni a ŋmabila nintuali, ban den bua yaaba ki pugi ba yeni. Bi kan wodi a kpaba yeni, bi kan piini a mo. Ama a baa tua bugidi u tingbanu po.

³ Laa nibobiadu siiga yaaba n sieni yaa po bani yaaba ke n yayadi ba i kaani kuli yeni mi kuuma baa yaa tunni bipo li miali. Mini Li Miali Diedo U Paaciamu Kuli Daano n yedi yeni.»

Li ga lede ke n niba tie nanda?

⁴ Ŋan yedi ba: Li Miali Diedo yedi nanda: «Naani yua n baa ki yen fii kaa? Naani yua n jadi ki ŋa u sanu ki yen ti guani?

⁵ Be n teni ke Jelusalema niba jadi ki ŋa u sanu Kaa bani ban se naani? Bi suagi liiga leni i janbi Bi yie ke bi kan guani n kani.

⁶ N tie suo ki cengi. Bi maama ki dagidi. Oba kuli ki miadi sugili o biadima po, Oba ki tua: ‹N bii be?› Bikuli li tiini ki suagi liige Nani yaa taami n tiini bu toabu nni yeni.

⁷ Baa goliya yua ye ti tawadi nni bani o yogunu, Ki kpaajefanga, ki tancancalinga leni ku kulijaŋmaangu Kuli bani ban baa lebidi ki kpendi yaa yogunu. Ama n niba wani naa bani Li Miali Diedo n bili Li bonla n yaa cuoni maama.»

Bi tuofaayanfodanba

⁸ Yi baa tieni lede ki yedi: «Ti tie yanfodanbe, Li Miali Diedo *bali maama ye leni tinba?» Mi faama po yo ke a tidianla fii Ki baa diani leni bi tuofaa-tidianmuani.

⁹ Bi yanfodanba fiagi Bi jie hali boncianla, bi cuo ba. Diidi bi fali Li Miali Diedo maama Bi yanfuoma pia bipo mi laa fuome?

Yaaba n pua mi faama

¹⁰ Lani n teni ke n baa taa bi puoba ki teni nitoaba, Ki teni yaaba n paadi ba mo n diedi bi kuani. Kelima ki cili ki bonwaaga ki ban pundi o nikpelo, Bikuli li tiini ki lingi bi yucela ŋamu bebe. Ki cili o sawalipualo ki ban taani o kopadiciamo, Bikuli li ye i janbi po yo.

¹¹ Bi buu n niba poagilima leni u yualu. Bi kpaagi ki tua: «Mi yanduanma ye, mi yanduanma ye,» Ke yanduanma naa ye.

¹² Li bi pundi i fe n cuo ba leni ban tuuni yaa tuongunda. Ama i fe naa cuo ba, Baa go bani fe n tie yaala Lani n teni ke bi baa kpe nani biyaba yeni. Bi baa yaa tuudi ki baali min baa ti fii ki sedi bipo yaa yogunu. Li Miali Diedo n yedi yeni.

U Tienu pali biidi, bi niba moko yaa pala biidi

¹³ Li Miali Diedo yedi: «N bua ki baa min baa bili ba naani. *Duven tiidi kan luoni pu kuli. Bu kankanbu kan go yaa pia kankana Ti faadi baa mali N baa ŋa ba bi yibalinba nuu nni.»

¹⁴ Bi tua: «Be yaa po yo ke ti nan baa ki kaa? Taani taani mani Tin gedi mani i dopaali nni, Ki ban kpe, Kelima Li Miali Diedo ti Tienu teni ke ti baa kpe, O teni ke ti ñuni yaa ñima n pia ti loabidi, Kelima ti tieni opo ti *tuonbiadi.

¹⁵ Ti den kaa ki daani mi yanduanma, Ama bonŋanliba kuli naa ye. Ti den guu mi paagima yogunu Ama ti jawaandi n sani ki cua.

¹⁶ Bi gba i taami dunli Dana diema po, A tanjala dunli teni Ke ki tinga kuli digibi. Bi cua, bi ŋmani Mi diema leni yaala n ye mi niinni U dogu leni yaaba n ye u niinni.»

¹⁷ Mini Li Miali Diedo n yedi: «N soani i webiadi Ban ki pia yaaba yaa ñoagi. Bi baa ñidi yi.»

Jelemi payianu

¹⁸ N bi sugini ki paadi yaala n yia nni. N payianu yaba hali boncianla.

¹⁹ Cengi mani n niba ñiindi Yi n ña hali foagima: «Naani Li Miali Diedo ki go ye Siyono yo? Naani u dogu ki go pia bado yo? Be yaa po yo ke bi biidi n pali leni bi buli? Yaa bonyuodi n tie nibuotoe yaa bonla?»

²⁰ U jetaagu gbeni, ku siagu pendi Tinba wani daa baa *faabima.

²¹ N niba poagilima coagi nni. N pali boandi ke n ye leni li pabiidili boncianla.

²² Naani kpasogikaama ki ye Galaadi diema nni? Naani lotoli ki ye lipo? Be yaa po yo ke laafia naa go tiendi n niba po?

²³ Ŋain, n yuli yaa bi tie ñima, N nuni mo yaa bi tie ninsiidi n bundi naani N bi baa yaa mua u yensiinu leni ku ñiagu N diema niba yaaba n kpe po.