Jeremi 7 - Gourmanchéma Bible

¹ Li Miali Diedo den maadi leni Jelemi yaa maama n tie na:

² «Gedi Li Miali Diedo diegu buliñoabu kani ki maadi yaa maama n tie na ki yedi: ‹Cengi mani Li Miali Diedo maama, Yinba yaaba n tie Juda yaaba ki kua o buliñoana kani Ki baa cua ki gbaani ki pugi Li Miali Diedo.›

³ Li Miali Diedo U Paaciamu Kuli Daano, Isalele Tienu yedi: ‹Lebidi mani yi sani leni yi tuada Lani n tie min cedi yin yaa ye nekanba.›

⁴ Yin da dugi mani yi boandi po ki yedi: ‹Nekanba n tie Li Miali Diedo diegu, Li Miali Diedo diegu, Li Miali Diedo diegu nne!›

⁵ Li yaa tie ke i moamoani yi lebidi yi tagi leni yi tuada, Yi yaa tieni bi niba kuli po nani lan pundi maama,

⁶ Yi yaa mabini o caano, ki kpienbiga leni li kpepuoli, Yi yaa wuli yua n ki pia tagili soama nekanba, Yi yaa ŋoadi i *buli yii n baa cuani yipo fala,

⁷ Lanwani n baa cedi yin yaa ye nekanba, Min puni yi baanba yaa diema yaa yogu n tu yaa yogu.

⁸ Diidi mani, yi dugi i boandi po Yi n ki pia fuoma.

⁹ Yi su, ki kpaani mi kuuma, ki conbi, Ki pua mi faama ki polini, Ki padi a pada o bulo *Baali po, Ki tiini ki ŋua yin kaa pia *ŋantaado leni yaa buli.

¹⁰ Yi yen cua ki sedi n nintuali ku naa diegu nni Ban kpiagidi n yeli naankani, ki yedi: ‹Ti baa mi *faabima!› Ama ki nan yuandi ki soani a naa tuongunda kuli.

¹¹ Naani yi tama ban taagi n yeli yaa diegu nni yeni tie concona wuonkaanu yo? Mini Li Miali Diedo, mini nba n sua yeni.

¹² Gedi mani n kaanu yu n gagidi ki ŋani, Silo yeni po, Min den cedi ke n yeli ye naani Ki le min soani u kaanu yeni maama, Kelima n niba Isalele yaaba biadima po.

¹³ Mini Li Miali Diedo yedi: ‹Nani yin soani laa tuona kuli yeni, Nani min maadi leni yi u yogunu kuli ke yi naa cengi, Nani min yini yi ke yii tuo yeni,

¹⁴ Lani yaa po, yin dugi yaa diegu po ki taagi n yeli ku nii nni, Min den puni yi baanba yaa kaanu yeni, N baa soani laa kaanu nani min den soani Silo maama yene.

¹⁵ N baa deli ki foagidi yi n kani, Nani min yie yi kpiiba Efilayima puoliŋuani kuli maama yeni.› »

U Tienu n kan cengi yaa jaandi

¹⁶ Fini, amo n da jaandi bi naa niba po Ŋan da kpaani, ŋan da jaandi bipo. Da cua n kani ki mia min todi ba, Kelima n kan cengi a maama.

¹⁷ Naani ŋaa nua ban tuuni yaa tuona Juda dogi nni leni Jelusalema sani nni?

¹⁸ A bila kpaagi ti daadi Bi baanba cuondi mi fantama, Bi puoba kaaliti mi yoma, Ki baa pua ti lalaadi Tanpoli badipua po. Bi go baa cabi i buli po, Ki baa bieni n pali.

¹⁹ Li Miali Diedo yedi: «Naani bi tudi mini yaa po yo? Naani baa tudi bi yula po kaa? I fe ki tie bi yaa yi kaa?»

²⁰ Lani n teni ke n Diedo, Li Miali Diedo yedi mine: «Diidi n pabiencianli baa nandi u naa kaanu koatiidi, Li niba, li yandi, leni li tinga bonluonkaala kuli. Mi fantama baa yaa siagi la ki kan gbindi.»

Yaa nibuolu n ki cengi U Tienu maama

²¹ Li Miali Diedo U Paaciamu Kuli Daano, Isalele Tienu yedi mine: «Taa mani yi padijuukaana, ki pugini yi pada po, Ki ŋmani mani li nandi.

²² Kelima mii maadi leni yi baanba Mii den puogi ba liba kuli Min den ñani ba yaa daali Ejipiti diema nni, A padijuukaana leni a padifana po.

²³ Ama n den yedi ba yaa maama n tie na: ‹Cengi mani n maama Ke min yaa tie yi Tienu, yimo n yaa tie n niba. Yaa cuoni mani min yedi yin tagini Yaa sani kuli nni, lani n tie yi yema n yaa mani yipo.›

²⁴ Baa leni lankuli baa cengi. Baa diadi bi tuba ki cengi. Bi ŋoadi bi pajuaga yaa *joagini yaa tundi, Bi guani puoli, baa suagi liiga.

²⁵ Hali bi baanba n ñani Ejipiti diema nni yaa daali, Ki taa ki pundi hali dinla N soani yipo n naacenba bi sawalipuaba U yogunu kuli ki naa cedi.

²⁶ Ama baa cengi n maama. Baa diadi bi tuba ki cengi. Bi juagi bi pala. Bi tieni yaala n bia ki cie bi baanba.

²⁷ A yaa maadi ba mi naa maama kuli, Bi kan cengi a A yaa pegidi ki teli bipo Ki kpaani ki maadi leni ba, Bi kan guani apo.

²⁸ Lanwani ŋan yedi ba: ‹Bi naa niba n ki cengi Li Miali Diedo bi Tienu nialu. Baa bua tundi. I moamoani bodi, I ñani bi maama nni.

Li kukpali joaloangu

²⁹ Kuo ŋan den gagidi a yuli Ki bili yaa yudi yeni ki ban lu ti. Gedi a juana yula po ki wanli! Kelima Li Miali Diedo fali, O yama mo sii yaa nifiima n bieni o pali hali boncianla yeni po.›

³⁰ Mini Li Miali Diedo yedi: ‹Juda bijaba tieni npo yaala n bia. N yeli n taagi naankani yene Ke bi cuani bi cancaginbonla ki joagini n diegu.

³¹ Bi ŋanbi a pada kaani Beni-Hinomi joaloangu nni, Ki baa yaa siagi bi bijaba leni bi bisiaba, Min kaa den puni yi yaa sanu. Min kaa den baa yaa yanjagili.› »

³² Mini Li Miali Diedo yedi: «Diidi mani, lani n teni a dana kpendi, Bi kan go yedi: ‹Tofeti› bi ‹li kukpali joaloangu,› U kaanu n baa poadi maama yaa po. Bi baa yaa pii bi niba Tofeti nni.

³³ Bi naa niba tinkpiba baa tua jiema tanpoli nuani leni ki tinga yandi po Niloba kan cua ki yagi bi yama.

³⁴ N baa teni Juda dogi leni Jelusalema yaa niinni I pamandanyani n gbeni. Togibaa, leni toginaa moko yaa yani baa gbeni Kelima yaa nafanu n baa pua mi diema yeni po.»