Jeremi 6 - Gourmanchéma Bible

¹ Sani mani Benjamina buolu yaaba ki ña Jelusalema Piebi mani li naatuntunli Tekoa dogu nni Fiini ki sieni mani li *tuudicabili Beti-Akelemi dogu nni. Kelima fala leni mi yebiadima ñani nijienu po ki kpendi.

² Fini Jelusalema, Baa ke a ŋani bonŋanla, A nan baa bodi!

³ Bi niba kpendi o kani nani bi yankpaaba leni bi yangola yeni, Bi tii bi gbandiena ki gaani ki lindi o Ki baa baa o bu toabu. Yua kuli se o kaanu leni o toagola. Bi kpaa yua kuli o kaanu.

⁴ Bi tua: «Fii tin baa o mani bu toabu! Fii mani tin gedi u yensicocolu! Ti yula ki mani, li nan di bua ki biige Ku ñiagu ŋmani ke ku cua ki gbeni.

⁵ Fii mani ku ñiagu Ki gedi ki ban bolini Jelusalema dieŋama!»

⁶ Li Miali Diedo U Paaciamu Kuli Daano yedi nanda: «Pedi mani ti daadi, Ki tiini ki deni i bilini ki gaani ki cebini Jelusalema Yibalinba n do ki kua, U dogu wuni uba n baa le fala, Kelima laa dogu nni puu kuli ki ye se mabinga bebe.

⁷ Nani ku ñinbuogu nni ñima n taa maama yeni, U dogu moko yaa biadima taa yene. Lanbuba ki ye u dogu yeni niinni Kaa tie tugumoangu leni bolinma yaaka. Yogunu kuli n nua poagilima leni fala bebe.

⁸ Jelusalema dogu, ga mi bangima, Lani n tie min da sani ki ŋa ŋa. Min da teni ŋan kpandi paboanli kaanu Leni diegbengu nilo n ki ye yaa diema nni.»

⁹ Li Miali Diedo U Paaciamu Kuli Daano yedi mine: «Bi baa sobidi yaa niba n sieni Isalele yaaba siiga nani ban yen sobidi I duven tiidi po maama yeni.»

¹⁰ N baa maadi leni ŋme? N baa taa ŋme yo wan tua n siedo ban cengi nni? Diidi bi tuba biini ki gbeni Bi kan fidi ki cengi bonŋanla mo. Diidi mani U Tienu maama tie bipo fe yo. Maa go nuagi bipo.

¹¹ Li Miali Diedo pabiencianli ye leni nni N kubi li ki coagi mo. Li Miali Diedo yedi: «Wuli li yaa biga n puagi i sani nni po, Leni bi nipanba po. Kelima bi baa cuo o ja leni o pua Yaaba n kpeligi leni yaaba n podi bonŋanla kuli.»

¹² N yaa fii ki sedi mi diema yaaba po, Nitoaba baa fie bi diena, Ki taani leni bi kuani leni bi puoba kuli.

¹³ Kelima ki cili leni yua n wa ki ban tuoni yua n yaba ki cie, Bikuli lingi bi yucela ŋamu bebe Ki cili o kopadiciamo ki ban taani leni o *sawalipualo Bikuli ye i janbi po yo.

¹⁴ Bi buu n niba poagilima leni u yualu Bi kpaagi ki tua: «Mi yanduanma ye, mi yanduanma ye,» Ke yanduanma naa ye.

¹⁵ Li bi pundi i fe n cuo ba kelima bi tuongunda po. Ama i fe naa cuo ba. Baa go bani fe n tie yaala. Lani n teni n yaa fii ki sedi bipo yaa yogunu, Bi baa ŋmadi ki baa leni yaaba n baali, Bi baa yaa tuudi tuudi. Li Miali Diedo n yedi yeni.

¹⁶ Li Miali Diedo yedi nanda: «Sedi mani i sani nni ki diidi bonŋanla. Buali mani u yogu nni sani n ye naani. U sanŋamu ye le yo? Tagini mani wuni yaa niinni, Ki baa mani yi yula po mi fuodima Ama bi goa ki yedi: ‹Ti kan tagi u niinni ba!›

¹⁷ N lingi yipo yaaba n baa guu yi diema Yin yaa yen faami li naatuntunli piebima po Ama bi goa ki yedi: ‹Ti kan yaa faami lipo ba.›

¹⁸ Lani yaa po yinba mi diema yaaba, cengi mani bonŋanla! Fini li nitaanli, a mo n moandi ki bandi Yaala n tiendi bi denpo.

¹⁹ Ki tinga, cengi bonŋanla! Diidi, mini n teni ke mi yebiadima ŋma bi naa niba, Li tie bi yanjagibiada panpaani yo. Kelima baa soangi bi yama ki ga n maama, Bi fali n *balimaama mo.

²⁰ N baa tieni be leni Saba diema *dugibila, Leni yaa kpentiidi yaa nuulu n mani ki ñani hali yaa diema n ye foagima? Mii bua yi padijuukaana Yi pada mo fa npo.»

²¹ Lani n teni ke Li Miali Diedo maadi yaa maama n tie na: «Diidi n bili a *tantuudikaana u naa nibuolu nintuali, Bi baanba leni bi bijaba kuli baa yaa tuudi ki baali lankane, Ki taani leni bi yieninlieba leni bi danlinba kuli baa kpe.»

Yibali ñani nijienu po ki kpendi na

²² Li Miali Diedo yedi mine: «Diidi yaa nibuolu n tie na ñani nijienu diema po. Nibociamu ñani hali u tinbianu po ki kpendi.

²³ Bi kubi li dabanli leni li kpaanli. Bi pia ku tugumoangu leni i nunkuomi Bi niali duni nani mi ñincianma yeni. Bi jagi i taami, Ki caligi bonŋanla nani niyendo bu toabu po yeni, Ki baa koani leni Siyono badisalo.

²⁴ Ti baa laabaali Ke ti gbani wudi. Ti jawaandi cuo ti Li koani ti nani yaa pua n gbaani ki baa maa yeni.

²⁵ Da ña mani i kuani nni Da gedi mani i sani nni Kelima yibali se lipo leni o jugisiega. I yanbani mo ye i kaani kuli.

²⁶ N niba, yie mani li paboanli tiadi Bili ki lebidi mani mi fantanpienma nni Mua mani boncianla nani bijayenyendo kuuma yeni. Kelima yua n cua ki baa bolini yeni, ludi ti.

²⁷ N teni ke a tie nani yua n baa biigi n niba. Nani u wuonkaanu Ke ŋan bandi ki yaa biigidi bi sanu.

²⁸ Bikuli tie niyiekaaba, tingbangbaaba Ki juagi nani ti kumoandi bi ti kuboandi yeni Bikuli tie niyuodi.

²⁹ Ki buaga tongi Ti noabindi nandi ki bodi mi fantama nni. O maano biandi o yogunu ki duadi likuli, Ti joagindi nan kan ña.

³⁰ Bi tie ban fali yaa ŋanjilifa, Kelima Li Miali Diedo fali ba.»