Jeremi 51 - Gourmanchéma Bible

¹ Li Miali Diedo yedi yaa maama n tie na: «Diidi n fii ki sedi Babilona po Leni Lebi-Kamayi yaaba po Nani yaa tafaagu n bolindi yeni.

² N baa soani Babilona kani, yaaba n baa lendi o Ki yogidi yogidi o diema kuli. Kelima u nafanu n baa pua o yaa daali Bi baa ña i kaani kuli ki fii ki sedi opo.»

³ A dabantuada n toa u dogu po! Ban bobi ti gbankoanditi! Yin da baagi mani o jawaaba. Pua ki bolini mani o toagoli kuli.

⁴ Ban pua ki lu ba Kalide yaaba diema nni. Ki muu ki kpa ba Babilona sani nni.

⁵ Kelima Isalele leni Juda Tienu naa bodi, Bi naa luo Li Miali Diedo U Paaciamu Kuli Daano, Baa ke bi diema tudi hali boncianla, Li Miali Diedo Isalele Tienu Yua n Gagidi ki ŋani po.

⁶ Sani mani ki ña Babilona, yua kuli n faabi o miali! Da ŋmini mani suo kelima o tagili po! Kelima Li Miali Diedo n baa tu o li panli yaa yogunu yeni pundi. O baa pa o o panpaani nani lan pundi maama.

⁷ Babilona den tie Li Miali Diedo nuu nni wula yaa tadiñokaaga Yaaga n teni ki tinga niba kuli ñuni ki gaadi. I nibuoli ñuni mi daama. Lani n teni ke i nibuoli yama bodi.

⁸ Babilona li fii yenma ki baa ki mumudi. Mua mani opo, lingi mani mi funfunma kpama o nali po. Daalinba o baa paagi.

⁹ Ti bi bua ki paagi Babilona, Ama waa paagi. Cedi o mani, yua kuli n guani o diema nni. Kelima o buudi baa pundi hali tanpoli Ki kpedi ki pundi hali ti tawadi nni.

¹⁰ Li Miali Diedo, teni ti *teginma n doagidi. Cua mani Siyono nni tin togidi Li Miali Diedo ti Tienu n tieni yaala.

¹¹ Li Miali Diedo pia yanjagili. Lani n tie ke o bua ki bolini Babilona. O fiini Medi yaa badiba yo n soani li tuonli. Li tie wan baa pa i panpaani yaa yogunu, Wan baa tu li panli o diegu po yaa yogunu. Luani mani yi piemi bonŋanla. Gbieni mani yi luona!

¹² Fii ki sedi ki yie mani Babilona bilini po. Pugini mani yaaba n guu u paalu. Baa mani yaaba n baa yaa se ki diidi. Dia mani ti diadi! Kelima Li Miali Diedo pia o yanjagili. O tieni wan den bili ke o baa tieni Babilona yaaba yaala.

¹³ Fini yua n kaa mi ñincianma kani Ki pia ŋalimani boncianla, A dana bianu leni a ligibuama kuli taani ki cua yenma.

¹⁴ Li Miali Diedo U Paaciamu Kuli Daano poli wani oba yaa yeli nni ki yedi: «N baa gbieni a leni bi niba nani a dondoba yeni. Bi baa kpaani apo i pamandankpaani!»

¹⁵ O tagi ki tinga leni o paalu, Leni o yanfuoma ke o diani u tinbianu. Leni o banma yo ke o tieni ti tawadi.

¹⁶ O yaa maadi se mi ñima n dogini ti tawadi nni. O yen teni ti tawadi n fii Ki tieni mi tañigima ki taaga po. O yen ñani u tafaalu wun ye naani.

¹⁷ Nilo kuli banma yen ti teni wan tua yanpiidaano. Yaaba n duadi i *buli se ke i fe pia ba Leni ban tagi i yeni po, Kelima o buli yeni li tie boandi bebe Fuomaba kuli ki ye i niinni.

¹⁸ Laa bonla kuli tie fanma. Li tuonli ki pia mayuli. Likuli baa bodi, Bi fala yaa cua yaa yogunu.

¹⁹ Yua n tie Jakobo biinu naa tie nani bi buli yeni, Kelima wani n die likuli. Yua n tagi li ŋandunli yeni n go die Isalele. Li Miali Diedo U Paaciamu Kuli Daano n tie o yeli.

Babilona juodima

²⁰ Li Miali Diedo yedi: «A den tie npo jatiagu bu toabu po. N teni ke a nugi i nibuoli boncianla, Ki teni ke a bolini yaa diema n ki wa.

²¹ Leni fine ke n nugi o taamo leni yua jagi o. Leni fine n nugi teligu leni yua n jagi kupo.

²² N teni ke a nugi o ja leni o pua. N teni ke a nugi o jakpelo leni ki biga. N teni ke a nugi o jawaalo leni o jafaano.

²³ N teni ke a nugi o yankpaalo leni o yankulu. N teni ke a nugi o kpakpaalo leni wan ko leni yaa yandi. N teni ke a nugi gufeneelinba leni bi bujiaba.

²⁴ N baa guani Babilona leni Kalide yaaba kuli, Ban tieni Siyono yaa biadima kuli yi nunbu nni. Li Miali Diedo n yedi yeni.

²⁵ Diidi n fii ki sedi apo, fini mi bolinma juali! Li Miali Diedo n yedi yeni. Fini yua n den bolini ki tinga kuli, N baa fii ki yie apo Ki bilini bilini a a joatana yuli po, Ki teni ŋan tua yaa juali n co mi fantama.

²⁶ Bi kan ñani a kani mi logidima tana, bi tanpuukaana, Kelima a baa waagi ki tie li paboanli bonla. Li Miali Diedo n yedi yeni.

²⁷ Bili mani mi maalima bonla mi diema nni. Piebi mani li naatuntunli i nibuoli siiga! Yini mani i nibuoli kuli n taani Alalati diema!

²⁸ Taani mani i nibuoli n fii opo Leni Medi badiba, O gufeneelinba leni o bujiaba leni ban die yaa diema kuli!

²⁹ Ki tinga waagi ki jeli banbani, Li Miali Diedo n den bili ke o baa tieni Babilona diema yaala n tieni yaa yogunu. O teni ke Babilona diema tua diegbengu, Niba n ki go ye naani.

³⁰ Babilona jakoanda gbali bu toabu, Ki sani ki wuoni a toadiena nni. Bi jie ki luodi Bi kpandi ki tua puoba. Bi juu mi diema mi fantama Ki mudi mi buliñoaluoditi kpakpaana.

³¹ A tonda lebidi biyaba Ki tiini tonma Ki bua ki ban pa Babilona bado laabaali Ke bi fie u dogu kuli cain.

³² U taginkaanu ki yaa, Bi sia ban dugi yaa kaanpaali po. Bi toatieba jie ki luodi.

³³ Kelima Li Miali Diedo U Paaciamu Kuli Daano Isalele Tienu n maadi yaa maama n tie na: Bi nugi Babilona nani u jalu yene. Li kan go waagi ke u jetaagu yogunu baa pundi opo.

U Tienu wani oba n baa tu o niba po li panli

³⁴ Nebukanesa Babilona bado dini nni, O mudi nni ki teni ke n tua bobikuonli. O nali nni nani o bonfuodibiado yeni. Ki yanga yeni gbieni o fiagu Leni min den pia yaa bonmoanla kuli.

³⁵ Yaa biadima n bi baa jiidi n yuli po n jiidi Babilona po. Yua n ye Siyono n yedi yeni. O soama n jiidi Kalide yaaba po. Jelusalema dogu n yedi yeni.»

³⁶ Lani n teni ke li Miali Diedo maadi nanda: «Diidi n baa koani ki ga ŋa! N baa teni Babilona ñincianma n ñuudi. N baa teni o ñinbunli n ñuudi.

³⁷ Babilona baa kpandi diegbengu, i tanboe yekaanu, Likani n tua pakili leni laadi bonla. O kaa go pia niba mo.

³⁸ Bikuli baa taani ki duni nani a yangbanbila yeni. Bi baa duni nani bi yangbanjawaaba yeni.

³⁹ Bi yaa baa li yankuali yaa yogunu, N baa bogini bi jiema, N baa ñuni ki guoni ba Lan yaa mani ba ban guani ki kan go fundi. Li Miali Diedo n yedi yeni.

⁴⁰ N baa pigi ki gedini ba u yankodikaanu po Nani a ŋuabuana leni a petona yeni.»

I wanli Babilona po

⁴¹ Bee? Bi cuo Sesaki! Ki tinga kpiagidi kuli bodi. Babilona goa ki kpandi paboanli bonla i nibuoli siiga.

⁴² Mi ñincianma pundi o kani Leni ku fuugu boncianla. Mi ñima milini o.

⁴³ O dogi kpandi ki tua pabiidili kaanu. Likani kpandi ki tua tinkuonga Nilo n ki kaa yaa dogu nni, Nisaalimialiba mo n ki poandi naani.

⁴⁴ N baa fii ki sedi Beli po Babilona nni. N baa dadi ki lobidi o ñoabu nni wan kpibi yaala. I nibuoli kan go yaa tigibi ki caa opo. Baa Babilona bilinu ŋmadi ki baa.

⁴⁵ Ña mani bi siiga, n niba. Yua kuli n ciadi o miali Ki foagidi leni Li Miali Diedo pabienli.

⁴⁶ Yi jigi n da ti cie ki teni yaa laabaali n sandi mi diema nni yeni n puoni yi ti jawaandi kelima dunli o naa laabaalo n ye, jeli mo laabaalitoa didi. Ki mabinga baa yaa kandi mi diema nni. Paatielo baa fii ki deli paatielo.

⁴⁷ Diidi mani lani n teni ke a dana kpendi Ke n baa fii ki sedi Babilona nannana po. O diema kuli baa yaa ye i fe nni. O niba kuli baa kpe o diema nni.

⁴⁸ Lanwani i pamandanyani baa fii Ki loli tanpoli leni ki tinga nni Kelima Babilona tingbali po. Yaaba n kpendi ki baa baa ba, baa ña nijienu po. Li Miali Diedo n yedi yeni.

⁴⁹ Babilona moko baa ŋmadi ki baa Kelima Isalele tinkpiba yaa po. Nani Babilona wani oba n teni ke li ŋandunli kuli niba baa maama yeni.

⁵⁰ Yaaba n cia ki jugisiega, sani mani, da sedi mani! Yi yaa ban ti ye foagima yin tiadi Li Miali Diedo po, Ki nan da sundi Jelusalema mo yaa po!

⁵¹ Ti yaa gbadi u nisugidu yaa yogunu I fe den yen cuo ti hali boncianla. Tii yen bani tin caani ti yula naani, Bi canba n cua yaa yogunu Li Miali Diedo *kaangagidiŋamu nni.

⁵² Diidi Li Miali Diedo yedi ke a dana kpendi Ke o baa fii ki sedi ban tagi yaa nannana po. Mi diema mo kuli nni, yaaba n ku, baa yaa fuo ki duni.

⁵³ Baa Babilona yaa kpedi hali ki siigi ti tawadi, Baa bi yaa tieni maama ke bi kan fidi ki kua bi dopaali nni, N baa soani yaaba n bolindi n baa o. Li Miali Diedo n yedi yeni.

⁵⁴ Cengi mani, Babilona po yo ke i kuudi fii ki loli Leni yaa lancianbu n tiendi kelima Kalide yaaba diema mudima po.

⁵⁵ Kelima Li Miali Diedo pua Babilona nafanu. O teni ke u nialiciamu duni. Li ñingola duni boncianla Nani mi ñincianma fuugu yeni.

⁵⁶ Yeni yua n baa bolini sedi Babilona po. Bi cuo o jakoando. Bi dabana kua. Kelima Li Miali Diedo tie yaa Tienu n bani ki pa i panpaani. O pa yua kuli o panpaani nani lan pundi maama.

⁵⁷ N baa ñuni ki gaadi o koanbala, o yanfodanba, o gufeneelinba, o bujiaba leni o jakoanda. Bi baa guani yaa guama ke bi kan go fundi. Bi kan go fundi hali abada. O Bado yua yaa yeli n tie Li Miali Diedo U Paaciamu Kuli Daano n yedi yeni.

⁵⁸ Li Miali Diedo U Paaciamu Kuli Daano n go yedi mine: «Babilona bilinciami baa ŋmadi ki baa cain. Mi fantama baa juu o buliñoana ya n kpedi boncianla yeni. Bi niba baa sua ke bi soani fanma po yo. I nibuoli baa sua ke bi coagi bi yula mi fantama po.»

Ban luni yaa tondu Yufilata kpenu nni

⁵⁹ O sawalipualo n bili yaa ñoabonbilikaana Selaya leni Juda bado Sedesiasi bali binnaali yogunu. Li sua ke Selaya tie o bado guudikaaba yudaano.

⁶⁰ Jelemi den diani li tili nni yaa fala n den baa ŋma Babilona. Laa maama kuli den diani li tili nni Babilona po.

⁶¹ Jelemi den yedi Selaya: «Ŋan moandi a yaa pundi Babilona, ŋan cogi laa maama kuli.

⁶² Ŋan yedi: ‹Li Miali Diedo, fini aba n maadi u kaanu na maama ke wun kpandi ki tua diegbengu ki da go taa baanli nni, niba leni yandi n kaa ye naani. Lan tua diegbengu yaa yogu n tu yaa yogu.›

⁶³ A yaa ban cogi ki gbeni li tili na, ŋan gbini li li tanli ki lu li tanli Yufilata kpenu yaa siiga. Lani yaa pendi ŋan yedi:

⁶⁴ ‹Babilona n baa bodi cain maama n yeni. Min baa teni yaa fala n baa o yeni. O kan fidi ki fii ki sedi.› » Jelemi maama kuli n yeni.