Jeremi 50 - Gourmanchéma Bible

¹ Li Miali Diedo n den teni ke o sawalipualo Jelemi maadi yaa maama Kalide yaaba leni bi diema Babilona po:

² «Pa mani li laabaalo i nibuoli siiga. Moandi mani ban gbadi la. Caani mani li *tuudicabili. Teni mani ban gbadi li maama, da wuoni mani la. Yedi mani: ‹Bi cuo Babilona!› O *bulo Beli laa i fe boncianla. O bulo Melodaki mo jie ki luodi! Ban tagi yaa nannana laa i fe n yeni! O buli jie ki luodi!

³ Kelima nibuoluba n ñani nijienu po Ki fii ki sedi Babilona po, Ki teni ke o diema kpandi diegbengu, Niloba kuli kan go yaa ye mi niinni. Bi niba leni ti yandi kuli baa bodi.

⁴ Laa dana nni Li Miali Diedo yedi Ke Isalele yaaba leni Juda yaaba Baa taani ki yegi ki lebidi ki guani. Bi baa yaa cuoni ki mua ki lingi Li Miali Diedo bi Tienu.

⁵ Bi baa buali yaa sanu n caa Siyono po. Bi baa pegidi ki teli lanpo. Cua mani ki fini Li Miali Diedo bonŋanla Ki kuani leni o yaa *ŋantaado n ki pia sundima, Ki kan gbeni mo!

⁶ N niba den tie yaa yankulu n yaadi. Bi yankpaaba n yen biandi ba Ki pegidi ba a juana po ki caani ba potogu. Bi yen ña li naa juali ki ban puodi juali Ki sundi bi duankaanu po.

⁷ Yaaba n den kadi leni ba kuli yen ŋmani ba. Bi yibalinba yen tua: ‹Tii pia tagiliba kelima bi tieni ti *tuonbiadi Li Miali Diedo mi *teginma daano po, Wani yua tie bi baanba suginma yeni.›

⁸ ‹Sani mani ki ña Babilona Ña mani bani Kalide yaaba diema nni. Yaa tie mani nani a ŋuabuana n yen ye Ti yanbidi liiga maama yeni.

⁹ Diidi mini nba, n baa teni I nibuoli n fii nijienu diema po Ki koani leni Babilona diema ki diedi ma. Bi piemi tie nani yaa jakoando yaa nuu n nua Ki kan guani fanma maama yeni.

¹⁰ Bi baa gedi ki fagi Kalide diema. Yaaba n baa gedi ki fagi ma kuli baa guo.› » Li Miali Diedo n yedi yeni.

¹¹ Mangi mani yi pala, mangi mani yi pala Yinba yaaba n pua mi diema nafanu yeni! Yugi ki ci mani nani yaa naasalo yaa gbanu n saagi, Duni mani nani yaa taami n pia u paalu yeni.

¹² Yi naa ye leni i feciami. I fe cuo yua mali yi. Diidi mani i nibuoli nni kuli siiga O yaa buolu n tie yu n juodi. Likani tie fanpienma, tinkuonga leni paboanli kaanu.

¹³ Li Miali Diedo pabienli po nilo kan go yaa ye mi diema nni. Mi kukuli baa kpandi paboanli kaanu. Yua poandi Babilona kani kuli li baa lidini o Ki go paki o wan fuoni kelima lan gundi maama po.

¹⁴ Bogini mani ki sedi mi janjanma po. Gaani mani ki lindi Babilona. Yinba yaaba n kpali yi dabana, toa o mani. Yin da sieni mani baa penyendu Kelima o tudi Li Miali Diedo po.

¹⁵ Fii mani opo leni bu toabu kuudi i kaani kuli. O tuo o tadingu. O tanpuuna kuli wudi ki baa O bilini mo kuli wudi ki gbeni, Kelima li tie Li Miali Diedo pantuuli Tu o mani yi panli. Tieni mani o nani wan tieni toaba maama yeni!

¹⁶ Ñani mani Babilona nni yua buu ti jaadi Leni yua n pia ku moaciegu u jetaagu yogunu. Bu toabu biadima nni, Yua kuli n pegidi ki noanli o buolu. Yua kuli n sani ki teli o diema nni.

¹⁷ Isalele tie nani i yangbanli n deli yaa pia ke o bodi yeni. Asili bado n kpa dini o. Nebukanesa Babilona bado mo n mudi o kpaba ki juodi.

¹⁸ Lani n teni ke Li Miali Diedo U Paaciamu Kuli Daano Isalele Tienu yedi nanda: «N baa fii ki sedi Babilona bado leni o diema kuli po.

¹⁹ N baa teni Isalele n lebidi ki guani o yanloli nni. O baa yaa pia u yankpaakaanu Kalimeli leni Basana po. O baa je ki guo Efilayima leni Galaadi juana po.»

²⁰ Laa dana nni, Li Miali Diedo yedi: «Bi baa lingi Isalele tagili, Ama bi kan go le i. Juda tuonbiadi mo, bi kan le ti, Kelima min sieni yaaba, n baa tieni bipo sugili.

²¹ Fii ki sedi Melatayima diema leni Pokodi yaaba po! Bolini o puoliŋuani kuli, Li Miali Diedo n yedi yeni. Tieni min yedi a yaala kuli.

²² Ti gba bu toabu fuugu mi diema nni, Leni li paboancianli.

²³ Li ga lede ke Babilona yua n bi tie Li ŋandunli kuli tuatuaga mudi ki cabidi cabidi? Babilona pua nafanu cain i nibuoli kuli siiga!

²⁴ Babilona, n dia ŋa ku diagu ke gu cuo ŋa mo. Kelima a den fii ki koani leni Li Miali Diedo.»

²⁵ Li Miali Diedo fii leni o jatiadi O taa o pabienli jatiadi Kelima li tie tuonle Li Miali Diedo U Paaciamu Kuli Daano. po Kalide yaaba diema nni.

²⁶ Ña mani hali i tinbiani ki cua o kani. Luodi mani o buabuana. Ñani mani yaala n ye lienni ki dogini dogini, Ki yuandi ki sia u dogu ki da sieni liba kuli.

²⁷ Kpa mani o naatona kuli Gedini ba mani u yankodikaanu kani. Fala baa ba kelima bi yogunu pundi Bi buudi fala yogunu pundi.

²⁸ Li tie yaaba n tiini ki ña Babilona po yaa kuudi yo, Ki wangi Siyono dogu nni Ke Li Miali Diedo tu o panli. O tu li panli o diegu po.

²⁹ Yini mani a dabantuada n cua ki baa Babilona. Yaaba n bani li dabanli kuli, Gaani ki lindi mani u dogu Niloba kuli n da cia. Pa o mani nani o tuona n tie maama. Guani o mani wan tieni yaala kuli. Kelima o tieni mi kafaama Li Miali Diedo Isalele Tienu Yua n Gagidi ki ŋani po.

³⁰ Lani n teni ke o toatieba baa kpe mu daamu nni. Li Miali Diedo n yedi yeni.

³¹ Diidi: n pali beni apo fini o kafaadaano yeni! Li Miali Diedo U Paaciamu Kuli Daano n yedi Ke a daali, a fala daali yeni pundi.

³² Ti japaadi daano tuudi ki baa. Oba mo ki ye yua n baa fiini o. N baa sia o dogi mi fantama, Man je yaala n gaani ki lindi yi.

³³ Li Miali Diedo U Paaciamu Kuli Daano n yedi yaala nne: «Bi taani ki mabini Isalele yaaba leni Juda yaaba. Yaaba n gedini ba ti yonbidi kubi ba leni u paalu Ki yie ke bi kan ŋa ba.

³⁴ Ama bi todika pia u paaciamu Wani yua n yi Li Miali Diedo U Paaciamu Kuli Daano yeni. O baa koani ki ga ba. Lani n tie u dogu n baa mi yanduanma. Ama n nan baa coagi Babilona yaaba wani.

U Tienu o Diedo n jagi ki baa tieni Babilona yaala

³⁵ Bu toabu Kalide yaaba po! Li Miali Diedo n yedi yeni. Fii ki sedi Babilona yaaba po, O koanbala leni o yanfodanba kuli po.

³⁶ Bu toabu, fii ki sedi yaaba n kpiagidi bi yula po, Teni ban tua gaada! Bu toabu, fii ki sedi bi jakoandimoanba po. Teni i jeje n cuo ba!

³⁷ Bu toabu, fii ki sedi o taami leni o teliti po! Fii ki sedi yaa nibuoli n taani Ki ye u dogu tugu nni kuli po. Teni ban kpandi ki tua puoba. Bu toabu, fii ki sedi bi ŋalimani po Ki teni ban fagi ba likuli!

³⁸ U tayialu baa o ñinsani! Mi ñima yeni kuli n ñuudi cain! Mi diema kuli gbie leni i buli Yi n lebidi bi yula.

³⁹ Lani n teni ke mi fanpienma nni yaaba Baa yaa taa ki ye leni ti fuayandi Ti tataadi moko baa cua ki yaa ye likani. Nifiima n tu nifiima, oba kan go kali laa tinbuoli nni.

⁴⁰ N baa soani i nani Sodoma leni *Gomola Leni yaa dogi n gaani ki lindi i U Tienu n pua ki paagi yi yaa yama yeni. Li Miali Diedo n yedi yeni. Oba kan kali likani, Oba kuli kan kali lienni.

⁴¹ Diidi u nibuolu ñani nijienu po. Nibociamu leni yaa badiba n pia u paalu N fii hali i tinbiani po.

⁴² Bi kpali li dabanli, ki yugidi li kpaanli. Bi pia ku tugumoangu, kaa gba niñima. Bi niali dune nani mi ñincianma yeni. Bi jagi i taami po ki taani ki caligi Nani niyendo yeni bu toabu po, Ki baa koani leni Babilona yaaba.

⁴³ Babilona bado ga laabaali ke o jigi cie. Li paboanli cuo o. Li koani o nani yaa pua n baa maa yeni.»

⁴⁴ Li Miali Diedo yedi: «Nani o yangbanlo yeni, A ñingola fii ki duodi Judana ki sani Ki kua ku muagu nni. Bi baa jieni Babilona yaaba ban sani Ki ŋa bi tinga, Ki teni min gandi yua yeni n kua ki kali. Ŋme n naani leni nni? Ŋme n baa waani nni min baa tiendi yaala? O laa gobidika mo n baa tuo ki niagi leni nni?

⁴⁵ Diidi mani Li Miali Diedo n ñani Yaa ñoabonli Babilona yaaba po Leni wan jagi ke o baa tieni Kalide yaaba yaala. Bi baa yaa dia ba nani ti yanbidi yeni. Bi baa biidi bipo boncianla.

⁴⁶ Laabaali n ñani ke bi fie Babilona, Ki tinga kuli digibi. I nibuoli bubula fii ki loli.»