Jeremi 5 - Gourmanchéma Bible

¹ Gaani mani Jelusalema sani nni. Diidi mani, Buali mani ki ga laabaali Lingi mani bi niba n yaba naani Ki le yi yaa baa le baa niyendo Yua n tiendi yaala n tiegi Yua n bua i moamoani. Lani, n baa tieni Jelusalema po sugili.

² Baa bi yaa yedi: «Li Miali Diedo fo!» Bi polini faama bebe.

³ Li Miali Diedo, ŋan bua yaala ki tie i moamoani kaa? A pua ba, laa koani ba mo. A nugi ba bonŋanla Bi yie baa ga a bangima, Bi juagi bi pala ki cie ku tangu. Bi yie ke bi kan lebidi bi yama.

⁴ N den yedi: «Bi yama ka, Bi tuuni gaadi tuonle Kelima baa bani Li Miali Diedo sanu Baa bani bi Tienu *bali maama.

⁵ N baa gedi a nigbenga po Ki ban maadi leni ba nba. Kelima ban wani bani Li Miali Diedo sanu Bi bani bi Tienu balimaama. Bi bani bi Tienu n bua yaala.» Ama bikuli tie yenme Bi miidi li balimaama Ki fidi bani leni U Tienu *ŋantaado.

⁶ Lani n teni ke li fuali nni yangbanlo baa kpa ba, O fuasangbanlo baa ŋmani ki toatoadi ba O naamunpieno se bi dogu buliñoana kani ki guu ba Yaaba n baa ña kuli o baa toatoadi ba Kelima bi yiema yaba hali boncianla Bi yaadima mo yaba ki kandi.

⁷ Naani lani n baa teni min pa ŋa sugili? A bijaba ŋa nni Bi polini leni yaala n ki tie U Tienu N den puni ba li jeeguoli ke bi fii ki conbidi. Bi tiini ki taagi li poconconli dieli nni.

⁸ Bi tie yaa fuatanjala n dini ki guo, Yua kuli ŋua ki coa o yieninlielo pua puoli.

⁹ Mini Li Miali Diedo yedi: «Naani n kan fii ki yie laa bonla po? Naani n kan fii ki tu laa nibuolu li panli?»

¹⁰ Do mani u dogu bilini po, Ki pua ki mumudi i. Ama da bolini i mani cain. Ñani mani i beni kelima Li Miali Diedo ki die yi.

¹¹ Isalele leni Juda yaaba kuli Janbidi nni cain. Mini Li Miali Diedo n yedi yeni.

Mi yiema n baa cuani yaala

¹² Bi pia i boandi Li Miali Diedo po Bi tua Li Miali Diedo ki ye. Fala mo kan baa ti Koma kan baa ti ki buali toabu.

¹³ Bi sawalipuaba li wolini bebe yo. Baa pia mamoanma ki baa maadi. Ban tua ke yaala n kpendi yeni n cua bi yula po.

¹⁴ Lani n teni ke Li Miali Diedo U Paaciamu Kuli Daano yedi: «Nani yin maadi laa maama yeni, mini nna. N kuani mi naa maama a ñoabu nni nani mi fantama yeni Bi naa niba baa tua nani mi fantama n baa buoni yaa daadi yeni.

¹⁵ Diidi mani yinba Isalele yaaba, Mini Li Miali Diedo n yedi yi: N teni ke u nibuolu ñani foagima Ki pia u paalu ki cua ki baa koani leni yi. Laa nibuolu ye hali yaa yogu kuli. Yii gba laa nibuolu maama, Yi kan bandi ban maadi yaala.

¹⁶ Bi piemi ku a miana boncianla Bikuli tie jakoanda yo.

¹⁷ Bi baa je yi kpaandi leni yi jiema Bi baa je yi bijaba leni yi bisiaba Yi yangbenga leni yi yanbidi kuli Yi duven tiidi kuani leni yi kankandi Bu toabu baa bolini yi dopaali Yin tama naani ke puu kan nandi yi yeni.

¹⁸ Ama baa laa dana nni moko N kan bolini yi kuli cain.» Mini Li Miali Diedo n yedi yeni.

¹⁹ Li yaa tie ke yi yedi: «Be yaa po yo ke Li Miali Diedo ti Tienu tiendi ti line kuli?» Ŋan goa ki yedi ba: «Yaala n teni ke yi ŋa nni ki soani i *buli po yi docele nni yeni, Lani n teni ke yi baa soani bi canba po Yaa dogi n ki tie yi docele nni.»

Bi niba yaa go tuo U Tienu gobidima yaa yogunu

²⁰ Waani mani Isalele yaaba yaa maama n tie na: Teni mani Juda diema yaaba moko n ga laabaali.

²¹ Cengi mani line, yinba yaa niba n ki pia yama, Kaa pia kpaagili mo. Yinba yaaba n pia yi nuni, ki naa nua Ki pia a tuba, ki naa gba liba.

²² Mini Li Miali Diedo yedi: Naani yi kan yaa fangi nni? Naani yi kan yaa digibi n nintuali? Mini yua n teni ke mi tanbiima n tie mi ñincianma banlu, Yaa banlu ke mi kan fidi ki kandi hali abada Mi ñingola lengidi, ama ŋaa pia paalu. Mi duni, ama mi kan fidi ki kandi.

²³ Ama bi naa niba pia yaa pala n juagi ki go pa. Bi piadi ki sedi ki sani ki foagidi.

²⁴ Baa tua bi pala nni: «Tin fangi mani Li Miali Diedo ti Tienu, Yua n puuni ki taaga ki yogunu Ki takpiaga leni ki tayuankaaga Ki puuni ti dana lele u jetaagu po.»

²⁵ Yi tagili n biidi likuli Yi *tuonbiadi n muni yi laa baali buoli kuli.

²⁶ Kelima n niba siiga pia bi nibiadiba. Bi cuodi nani bi dia i nuani yeni, Bi bili bi diadi ki bua ki cuo bi niba.

²⁷ Nani i nuani n gbie ku cibiligu nni maama yeni, Bani moko yaa diena gbie leni i janbi yene. Bi tiendi yene ki baadi ŋalimani ki kpandi paatieba.

²⁸ Bi noadi bonŋanla ke bi gbani ñuliti Bi tuongunda ki pia bianu. Baa koani ki baa ga ki kpienbiga, Bi bonla kuli cuoni bipo bonŋanla. Bi baga ki ye leni a luoda.

²⁹ Naani n kan fii ki sedi laa niba po? Naani n kan fii ki tu u naa nibuolu li panli? Mini Li Miali Diedo n yedi yeni.

³⁰ Li pabiidili leni yaala n gundi tieni mi diema nni. Lani n tie:

³¹ Bi sawalipuaba pua mi sawali-faama Bi kopadicianba lingi bi yucela ŋamu bebe, N niba mo sua ke lani n dagidi bipo. Yi baa tieni lede saala po?