Jeremi 49 - Gourmanchéma Bible

¹ Yaa maama n ye Amoni yaaba po Li Miali Diedo yedi nanda: «Naani Isalele ki pia bijaba yo? Waa pia yua n baa je o faali yo? Be yaa po yo ke Amoni yaaba bado die Gada Ke o niba mo ye Gada dogi nni?»

² Li tie lani yaa po ke Li Miali Diedo yedi: «A dana kpendi ke n baa teni bu toabu bubula n fii ki loli Amoni yaaba dociamu nni. Labati baa tua paboanli kaanu. Mi fantama baa je likani n die yaa tinbuona kuli. Isalele yaaba baa goa ki ga ban den die yaala.

³ Hesiboni, buudi kelima Ayi pua nafanu! Laba yaaba kuudi mani! Yie mani li paboanli tiadi! Mua mani mi kuuma i bilini kunkuni Kelima bi baa gedini bi bado ti yonbidi, Wani, o kopadicianba leni o koanbala kuli.

⁴ Be yaa po yo ke a pagi a yuli kelima a gbanmanu po? A gbanmanu gbeni n yeni! A bia n yeni, fini yua n den dugi a ŋalimani po ki den tua: ‹Ŋme n baa tuo ki cua ki baa nni bu toabu?› »

⁵ Li Miali Diedo U Paaciamu Kuli Daano yedi: «N baa teni i jeje n cuo ŋa Ki gaani ki cebini a i kaani kuli. Bi baa deli yikuli, yua kuli n teli o nintuali, Oba kuli kan fidi ki yini ki taani yaaba n tiini.

⁶ Ama li yaa puoli n baa teni Amoni yaaba yonbi n goa ki kpeni.» Li Miali Diedo n yedi yeni.

Yaa sawalo n ye Edomi po

⁷ Yaa maama n ye Edomi po. Li Miali Diedo U Paaciamu Kuli Daano maadi yaa maama n tie na: «Naani yanfodanba ki go ye Temana diema nni? Naani i tundi bodi o bijaba kani? Naani bi yanfuoma kuli ki go pia mayuli yo?

⁸ Yinba Dedana diema yaaba lebidi mani ki sani Ki ban wuoni mani ti tanlondi nni ki yaa ye! Kelima n teni ke o falabiado baa nandi Esayu. O fala daali yogunu n pundi.

⁹ Yaaba n ñandi duven tiidi bonluonkaala Yaa cua a kani yaa daali bi kan ŋa liba kuli. A concona yaa cua ku ñiagu, Bi baa pua ban fidi yaala kuli nafanu.

¹⁰ Kelima n baa kpabidi Esayu. N baa doagidi o wuonkaani kuli. O kan go fidi ki wuoni. Bi baa bolini o puoliŋuani, O kpiiba, o yieninlieba kuli kaa go ye.

¹¹ Mini n baa teni wan ŋa yaa kpienbila yeni n yaa ye, Ki teni a kpepuona mo n yaa dugi npo.»

¹² Li Miali Diedo yedi nanda: «Diidi ti buudi n ki bi ye yaaba yaa po yeni baa ño ki tadiñokaaga tiladi. Fini kan yaa pia tagili? A kan luo tagili. A moko baa ño.

¹³ N poli mini nba yaa yeli nni, Botisila baa tua fe bonla, li baa yaa bia opo, o dogi mo kuli baa tua diegbendi yaa yogu n tu yaa yogu. Mini Li Miali Diedo n yedi yeni.»

¹⁴ N gbadi Li Miali Diedo kani laabaali. Bi soani o tondo i nibuoli siiga ke wan yedi: «Fii mani ki bogini bu toabu po Ki gedi ki ban tuogi Edomi.

¹⁵ Diidi n teni ke a wa i nibuoli siiga, Bi niba fali a boncianla.

¹⁶ Ŋan jigini a yuli maama leni a kafaama boandi a. Fini yua n ye ti tanlondi nni leni mu joabimu tanpoli, Diidi, a yaa tieni a tiali ke li kpedi nani jiebani yeni, N baa tudi ki jiini a tiipo.» Li Miali Diedo n yedi yeni.

¹⁷ Edomi baa tua diegbena. Yaaba n poandi likani kuli baa diidi lan paki ba, ban fuoni kelima wan laa yaa fala kuli po.

¹⁸ Nani Sodoma leni *Gomola leni yaa dogi n pugidi n baa ti yanyagidi maama yeni, Li Miali Diedo n yedi ke oba kuli kan go kali lankani. Nisaalimiali kuli kan go kali likani.

¹⁹ Li Miali Diedo yedi: «N tie nani yaa yangbanlo n ñani Judana fuali nni ki caa li ñinbunli po yeni. N li baa yedi bugibu yenma ki teni Sodoma n sani, Min kaani min gandi yua. Kelima ŋme naani leni nni? Ŋme n baa waani nni min baa tieni yaala? O laa gobidika n baa niagi leni nni?»

²⁰ Lanwani, cengi mani Li Miali Diedo n taa Yaa *bali maama Edomi po, Leni wan pia yaa yanjaga Temana yaaba po: Laa pia kuli tama ke bi baa yaa dia ba Nani ti yanbidi bila yeni. Bi baa pua ban ye naani nafanu.

²¹ Bi tingbali moe teni ke ki tinga digibi. O moe ban pundi hali i kpenkagi ñincianma.

²² O tie nani jiebani n fii ki yugi, Ki fidi o fiabi maama yeni. Botisila po Edomi jakoanda tugusoama sani Nani yaa pua n bua ki maa tugusoama n sani maama yeni.

Yaa sawalo n ye Damasa po

²³ Yaa maama n ye Damasa po. Hamati leni Alipadi ye leni i fe, Kelima bi ga laabaalibiado. Bi yama lengidi nani mi ñincianma yeni. Bi ye leni i yanbani ki kan fidi ki sedi suo.

²⁴ Damasa tadigi. O pegidi ki baa sani. Mi digibima cuo o. Li paboanli leni mi loma cuo o Nani yaa pua n baa maa yeni.

²⁵ Li tieni lede ke bi ŋa Damasa dogu Yu yaa yeli n den ñani Ki tie n pamanli yeni?

²⁶ Laa daali bi baa kpa o nipanba o dogu sani nni. O jakoanda mo kuli baa bodi. Li Miali Diedo U Paaciamu Kuli Daano n yedi yeni.

²⁷ N baa sia Damasa bilinu mi fantama. Mi baa sia Beni-Adadi badidiegu.

Alabi yaaba buoli

²⁸ Yaa maama n ye Kedala Alabi yaaba leni Hasoli diema Babilona bado Nebukanesa n paadi yaaba po. Li Miali Diedo maadi yaa maama n tie na: «Fii mani ki sedi Kedala po Ki waani mani, puoli yaaba bijaba diema yeni fala.

²⁹ Fie mani bi gbandiena leni bi yangola, Bi tiadi, bi yuoyuodi leni bi diema kuli, Ban tiani bipo ki yedi: ‹I jeje ye i kaani kuli!›

³⁰ Sani mani, jaligi ki sani mani, Gbi mani ti buodi ki wuoni lienni yinba Hasoli yaaba. Kelima Babilona bado Nebukanesa jagi li jagili, Ki baa fii ki sedi yipo.

³¹ O yedi: ‹Fii mani ki ban koani leni yaa nibuolu yaa niba N kaa leni mi yanduanma, kaa bangi liba kuli po. Li Miali Diedo n yedi yeni. Bi dogu naa pia buliñoabu ki buali sendabiga. U li ye u bebe yo.›

³² Bi baa fagi bi yuoyuodi, Ki tugi bi yankuli mo kuli. N baa lendi ba leni ku faagu N baa teni fala n ña i kaani kuli ki baa Yaaba n kuoni bi langbiana kunkuni kuli. Li Miali Diedo n yedi yeni.

³³ Hasoli baa tua i tanboe yekaanu, Leni li paboanli kaanu yaa yogunu kuli po. Oba kuli kan go yaa ye likani. Nisaalimialiba kuli kan go kali likani.»

Yaa sawalo n ye Elami po

³⁴ Li Miali Diedo n den maadi yaa maama o sawalipualo Jelemi Elami po Juda bado Sedesiasi bali cilima yogunu.

³⁵ Li Miali Diedo U Paaciamu Kuli Daano n maadi yaa maama n tie na: «Diidi mani n baa kua Elami dabanli, Lini yaali n tie o fidu yeni.

³⁶ N baa soani Elami kani tafaali naa. I baa ña nijienu, niganu, puoli leni nintuali kuli. N baa lendi ba i tafaali yeni niinni. Li kan yaa pia ki tinga nibuoli siiga Elami yaaba N kan yadi ki pundi naani.

³⁷ N baa teni Elami yaaba n jeli, Ki digibi banbani yibalinba leni yaaba n bua Ki ñani bi miana kuli nintuali. N baa teni fala n baa ba n pabienli nni, N baa teni bu toabu n ŋoadi ba Hali min bolini ba cain.

³⁸ N baa bili n bali kalikaanu Elami, Ki teni o bado leni o koanbala kuli n bodi. Li Miali Diedo n yedi yeni.

³⁹ Ama u yogunu kpendi ke n baa teni Elami po yonbi n guani. Mini Li Miali Diedo n yedi yeni.»