Jeremi 48 - Gourmanchéma Bible

¹ Li Miali Diedo Isalele Tienu U Paaciamu Kuli Daano yedi nanda: «Fala nandi Nebo yaaba kelima o dogi bodi. Kilijatayima dogu ye leni i fe kelima bi fie u. Misigaba dogu ye leni i fe leni i yanbani.

² Moabi diema kpiagidi gbeni. Hesiboni po bi jagi mipo yaala n bia ki yedi: ‹Tin ñani ma mani i nibuoli siiga Fini Madimeni, a moko li gbeni apo n yeni. Kelima bu toabu ŋua ki deli a.›

³ A bubula fii ki loli Odonayima po. Bi bolindi ki pua ki mudi li bonla kuli.

⁴ Moabi pua nafanu n yeni! Cengi mani o niba n buudi yeni.

⁵ Yaaba n ciadi do ki caa Luhiti leni a bubula. Odonayima jiidima bi gba bi niba buudi Li paboanli moe ki tua:

⁶ ‹Yua tadi yua pa! Sani mani, sani mani ki ña ne Ki yaa ban ye mani mi fanpienma nni Nani i fuaŋunbi yeni.›

⁷ Nani ŋan dugi a tuona leni a ŋalimani po yeni, Bi baa cuo fini moko. Bi baa gedini a bulo Kemosi ti yonbidi, Wani, a koanbala leni a kopadicianba kuli.

⁸ O bolindo baa kua dogu kuli nni, Doguba kuli kan cia. Ku joaloangu baa bodi. U tialu mo baa bodi. Li Miali Diedo n yedi yeni.

⁹ Pa mani Moabi i fiabi wan yugi ki foagidi. O dogi baa yaa ye leni li paboanli, Yi kan go yaa pia niba.

¹⁰ Ti solindi n yaa jagi yua n tuuni Li Miali Diedo tuonli leni mi gbefema Ki muni o jugisiega mo mi soama.»

¹¹ Li Miali Diedo yedi: «Moabi den ye leni mi yanduanma hali o panma nni. Bi naa gedini o yonbidi dietoama nni. Waa den yagini o yama bonliba kuli po, Nani yaa daama n baani yeni. Bi naa taa ma ki kuodi ki lebidi tiatoagu nni Maa lebidi, mi li baa tie yenma. Baa mi nuulu moko naa lebidi.

¹² Lani n teni ke Li Miali Diedo yedi ke a dana kpendi ke o baa soani bi niba n kuodi ki lebidi ma. Bi baa baadi man ye yaa boba kuli yaa niinni ki mudi ŋa.

¹³ I fe baa cuo Moabi yaaba bi bulo Kemosi po, nani yin den cuo Isalele yaaba bi bulo yua n den ye Betela po, ban den dugi wani yua yaa po yeni.

¹⁴ Yi baa tieni lede yin yedi ke yi tie jakoanda, Yaa toatieba n bogini bu toabu po yeni?

¹⁵ Moabi diema pua nafanu Mi dogi muñii fii ki loli Bi caani ki baa n kodi mi nipanba liiga yaaba. Yaa bado n yi Li Miali Diedo U Paaciamu Kuli Daano n yedi yeni.

¹⁶ Yaa nafanu n baa pua Moabi yeni cua ki gbeni. Mi yebiadima tiini ki kpendi ne.

¹⁷ Yinba yaa nibuoli n gaani ki lindi Moabi diema Ki bani ma bonŋanla yeni, Gedi mani ki faandi Moabi niba i kufaandi ki yedi: ‹Li tieni lede ke u naa paaciamu yu n pia ti kpiagidi kuli gbeni?›

¹⁸ Fii mani yi kpiagidi kalikaanu Yinba Diboni dogu yaaba. Kali mani tiipo leni u ñunñuunu kelima yua fii Ki baa bolini Moabi yeni fii ki sedi yi mo yaa po! O bolini yi kaanpaali.

¹⁹ Fii mani ki sedi u sanu nni ki guudi Yinba Aloyeli dogu yaaba. Buali mani yaaba n tiini leni yaaba n cia Yaala n tieni?

²⁰ Moabi ye leni i fe ki go digibi. Kuudi ki mua mani! Waani mani Alinoni kpenjaali yaaba ke Moabi pua nafanu!

²¹ Ti buudi cua u tialu diema po Leni yaa dogi n tie ne po: Holono, Yatisa, Mefati,

²² Diboni, Nebo, Beti-Dibilatayima,

²³ Kilijatayima, Beti-Gamuli, Beti-Meyoni,

²⁴ Kelioti leni Botisila. O nandi Moabi diema dogi yi n kuu Leni yi n foagi kuli.

²⁵ Moabi paalu gbeni, mi fidu mo gbeni! Li Miali Diedo n yedi yeni.»

²⁶ Li Miali Diedo yedi: «Ñuni o mani wan gaadi kelima o fii ki sedi Li Miali Diedo po. Moabi n yaa faligidi o siindi nni, wan guudi ki ga i fe.

²⁷ Moabi diema, ŋan tiadi ŋan den ñuadi Isalele diema maama. A den nua ma nani li conconli yeni, ki maadi mi maama ki digini a boacaba.

²⁸ Ña mani i dogi nni ki ban yaa ye a juana nni Yinba Moabi yaaba. Tua mani nani yaa kpaajiega n tiendi o tiali Mi joayidima po yeni.

²⁹ Ti gba ke bi maadi Moabi japaadi maama, O kafaama, wan jigini o yuli maama Leni wan faadi o yuli ke li duodi maama.

³⁰ N bani o pabienli po, ama lii pia mayuli. Li Miali Diedo n yedi yeni. O japaadi leni o tuada kuli ki pia mayuli.

³¹ Lani n teni ke n kaliti Moabi po, N kpaani Moabi kuli po. Bi yenbidi Kili-Elesi yaaba po.

³² N mua Sibima duven tiidi kuanu po, Ki cie min mua Yaeseli yaaba po maama. A beni den tandi ki pendi mi Ñincianyaama, Ki ban pundi Yaeseli ñincianma. O bolindo gedi ki baa a kpaandi leni a duven tiidi bonluonkaala.

³³ Li pamankandikaali gbeni u kuanu leni Moabi diema nni kuli. N teni ke mi daama gbeni a boba nni. Niba ki go ye yaaba n baa tuoni duven tiidi bonluonkaala leni i pamandankuudi.

³⁴ Hesiboni bubula pundi hali Eleale, Ki ban tuodi hali Yahatisi, Ki ña Tisoala ki caa hali Holonayima leni Egilati-Selisiya. Kelima Nimilima moko yaa ñima ñuudi.

³⁵ N baa bolini Moabi yaa niba n caa ki padi a pada bi*buli kani a juana *padibinbina kani. Li Miali Diedo n yedi yeni.

³⁶ N mua n pali nni Moabi leni Kili-Elesi niba po nani ki kuyeliga n piebi maama yeni, kelima ban baa yaa ñuadi kuli bia fanma.

³⁷ Li paboanli teni ke bi niba kuo bi yula kuli, ki kuo bi langbiadi kuli, ki be bi nii kuli i be. Bi niba kuli laa ti paboantiadi.

³⁸ Moabi diema diedi yula kuli po leni mu daamu nni kuli, bi muandi mi kuuma kelima n mudi Moabi nani ban kaa go bua yaa bobili yeni. Li Miali Diedo n yedi yeni.

³⁹ Diidi mani wan jie ki luodi maama, mua mani! Moabi buli o nunga kelima i fe po. Moabi kpandi ti laadi leni i jeje bonla yaaba n gaani ki lindi o kuli po.»

⁴⁰ Li Miali Diedo yedi nanda: «Diidi o bolindo yugi nani jiebani yeni Ki fidi o fiabi Moabi po.

⁴¹ Yibali fie i dogi leni i kaanpaali kuli. Laa daali mo Moabi jakoanda tugusoama tiini Nani yaa pua n baa maa yaa tugusoama n tiini maama yeni.

⁴² Moabi baa bodi, o kaa go tie nibuolu Kelima o fii ki sedi Li Miali Diedo po.

⁴³ Ti jawaandi, ku buogu leni i taali ye yinba Moabi yaaba yaa po yo. Li Miali Diedo n yedi yeni.

⁴⁴ Ti jawaandi n deli yua baa baa ku buogu nni. Yua n fidi ki ñani ku buogu nni mo Baa baa i taali nni, Kelima n baa teni o falaciamo binli n cua Moabi po. Li Miali Diedo n yedi yeni.

⁴⁵ Hesiboni soangu nni Yaaba n sani ki coagi Cua ki wuoni Hesiboni dogu nni. Ama mi fantama ña Hesiboni kani, Mi fantama ñani Siyono dogu niinni. Mi juu Moabi kali kuli Leni bi tugumoandanba yukuokuodi kuli.

⁴⁶ Fala n baa ŋa, fini Moabi! Fini o bulo Kemosi niba mo bia n yeni! Kelima a bijaba gedi ti yonbidi A bisiaba mo kuli mani!

⁴⁷ Ama li daali kpendi ke Moabi baa goa ki ŋanbi. Li Miali Diedo n yedi yeni.» Moabi buudi gbenma n yeni.