Jeremi 47 - Gourmanchéma Bible

¹ Diidi Li Miali Diedo n maadi o sawalipualo Jelemi yaa maama Filisiti yaaba po, hali ke *Falono daa pua Gasa dogu.

² Li Miali Diedo yedi nanda: «Diidi a ñingola fii nijienu po, A ñingola yeni fii nani mi ñinpuubikaama, Yaama n baa kali yeni, Mi milini mi diema leni yaala n ye mi niinni, I dogi leni yaaba n ye i niinni. Bi niba kuudi, mi diema niba kuli buudi ki yalini.

³ Kelima yaa taami n pia u paalu taana n mua maama po, Teliti dunli po leni bi taana moe po, Bibaanba ki gbegidi ki diidi bi bijaba, Kelima bi nii n tadigi boncianla maama po.

⁴ Filisiti diema yaaba bodima daali pundi, Li daali pundi baa hali maama Ke niloba ki ye ki baa todi Tili leni Sidoni dogi. Li Miali Diedo baa bolini Filisiti diema yaaba kuli Ki taani leni yaaba n sieni ki ye Kafitodi kpendegili po.

⁵ Gasa yaaba kuo bi yula kelima li paboanli po. Sagimuba ki go sagidi Asikaloni dogu nni. Yinba ti jaciandi yaadi n sieni yeni, Yi baa yaa baa badi yiba i be hali u laa yogunu yo?

⁶ Ŋain! Li Miali Diedo jugisiega, a kan jii fuodi! Goa ki kua a tuagu nni, ki yaa tie suo, ki da go yedi liba.

⁷ A baa fuodi lede? Li Miali Diedo yedi ke se ki gedi Asikaloni leni mi ñincianma po. O pegidi ki caani ki jugisiega yeni lanpo yo.»