Jeremi 44 - Gourmanchéma Bible

¹ Jelemi n den baa yaa maama yaa Jufinba n den ye Ejipiti diema nni kuli ki kaa Migidoli, Tapanesi, Memifisi leni Patilosi diema nni po nne:

² Li Miali Diedo U Paaciamu Kuli Daano, Isalele Tienu yedi nanda: «Yi laa min teni yaa fala n baa Jelusalema dogu leni Juda. Dinla laa dogi kuli tie diegbendi. Niba ki ye i niinni.

³ Kelima ban tieni yaa biadima ki baa biidi n pali ki padi a*dugibila ki go gedi ki ban gbaani ki pugi bani leni bi baanba n kaa den bani yaa *buli.

⁴ N tuuni yi kani n naacenba bi sawalipuaba u yogunu kuli ki naa cedi ke ban yedi yi: ‹Yin da tieni min nani yaa cancagintuona n tie na.›

⁵ Ama yi naa cengi, yi naa diadi yi tuba ki baa cengi, yi naa cedi ban den tieni nni yaa bonbiadila, yi naa ŋa dugibila padili i bulami po.

⁶ N den jiini n pabienli leni n mutuoli kuli Juda diema dogi po leni Jelusalema sani nni ke likuli kpandi diegbendi leni pabiidili kaani nani tin nua dinla maama yeni.»

⁷ Jelemi den suagi ki yedi: «Moala Li Miali Diedo U Paaciamu Kuli Daano, Isalele Tienu buali yi i naa buali: ‹Be yaa po yo ke yi tiendi yi yula yaala n bia nanda? Naani yi bua ki teni Juda n luo bi jaba, bi puoba, a bila leni a canpanda yo? Naani yi bua liba kuli n da go sieni yikani yo?

⁸ Yi biidi n pali leni yi bontienkaala kelima yi juugi a dugibila Ejipiti diema buli po, yin cua ki wuoni naankani. Naani yi bua ban bolini yi, yin tua ti solindi leni fe bonla ki tinga nibuoli kuli siiga yo?

⁹ Naani yi sundi yi baanba, Juda badiba, bi puoba, yinba leni yi puoba kuli n den tieni yaa tuongunda kuli Juda diema nni leni Jelusalema sani nni?

¹⁰ Hali ki ban tuoni dinla, yi naa biidi yi pala, yi naa baa fangiliba, yi naa ŋoadi min den teni yinba leni yi baanba yaa *balimaama leni yaa ñoabonbilikaana.› »

¹¹ Lani yaa po yo ke Li Miali Diedo U Paaciamu Kuli Daano Isalele Tienu yedi yaa maama n tie na: «Diidi n jagi ke n baa tieni yaala n bia. N baa bolini Juda diema niba kuli.

¹² N baa taa Juda niba yaaba n sieni, bani yaaba n bili ke bi baa gedi Ejipiti diema nni ki ban kali yeni. N baa bolini bikuli Ejipiti diema nni. Bu toabu leni mi koma n baa bolini li bila leni li nikpela kuli. Yeni de, bi baa kpe laa kuume, ki tua ti solindi, li paboanli, ki faliga leni u yualu bonla.

¹³ N baa fii ki sedi yaaba n ye Ejipiti diema nni po leni bu toabu, mi koma leni u yianbiadipuodiko nani min sedi Jelusalema yaaba po maama yeni.

¹⁴ Oba kan cia, oba kuli kan ŋmadi yaaba n ñani Juda ki baa cua ki wuoni Ejipiti diema nni yeni siiga. Oba kuli kan go ti guani Juda diema nni, bi yama n baa ye ban guani ki ban kali naanpo yeni, li yaa tie niyendo yendo yaaba n sani ki cia yaaka.»

Ban padi yaa padili tanpoli badipua po

¹⁵ Yaa jaba n den bani ke bi puoba padi a dugibila yeni kuli leni yaa puoba n den ye li taanli nni kuli ki padi a dugibila i buli po leni yaa niba n den ye Patilosi Ejipiti diema nni kuli den goa ki yedi Jelemi:

¹⁶ «Tii bua ki cengi yaa maama ke a yedi ti Li Miali Diedo yeli nni yeni.

¹⁷ Ti bua ki ŋoadi ti pali nni maama yaama n ñani ti ñoana nni ki padi tanpoli badipua po a dugibila padili, ki cabi opo nani ti baanba, ti badiba leni ti koanbala n den tiendi maama Juda dogi nni leni Jelusalema sani nni. Li yogunu ti den pia mi jiema ke li dagidi, ti yema den mani ke falaba ki ye.

¹⁸ Ama hali tin cedi ki naa go padi ki naa go cabini tanpoli badipua po ti luo likuli, bu toabu leni mi koma kuli bolini ti.

¹⁹ Ti yaa padi tanpoli badipua po a pada daa, naani tinba leni ti ciaba ka yen taani ki juogi? Bi bani ke ti pua opo yaa maada n naani leni o ki go cabini opo duven daama.»

²⁰ Jelemi den yedi li nitaanli kuli, li jaba, li puoba, leni yaa niba n den maadi ki guani o yeni kuli:

²¹ «Yin juu yaa dugibila Juda dogi nni leni Jelusalema sani nni, yinba, yi baanba, yi badiba, yi koanbala, leni mi diema nni niba yeni daa, naani Li Miali Diedo ki tiani lipo ki kubi la o pali nni te?

²² Yi tuongunda leni yi tuonyuodi teni ke Li Miali Diedo kan go bi fidi ki juuni leni yi. Li teni ke yi dogu kpandi diegbendi, paboanli bonla, leni ki faliga bonla, nilo n ki ye naani, nani yin nua maama dinla.

²³ Li tie kelima yi juu a dugibila ki tieni ti*tuonbiadi Li Miali Diedo po yo kaa cengi Li Miali Diedo maama kaa cuoni nani li balimaama n bili maama. Lani n teni ke o naa fala ŋma yi dinla.»

²⁴ Jelemi go den maadi leni laa niba kuli bi jaba leni bi puoba ki yedi: «Yikuli n cengi li Miali Diedo maama yinba Juda yaaba, yaaba n ye Ejipiti diema nni.

²⁵ Li Miali Diedo U Paaciamu Kuli Daano, Isalele Tienu yedi mine: ‹Yinba leni yi puoba maadi leni yi ñoana ki tieni leni yi nii yin yedi yaala, ti bua ki kuani tin bili yaa ñoanianu, ki padi a dugibila tanpoli badipua po ki go cabi opo. Lanwani yi baa kubi ki go tieni yin niani o yaala.›

²⁶ Lani yaa po yinba Juda yaaba, yaaba n kaa Ejipiti diema nni cengi mani mini Li Miali Diedo maama! Diidi n poli n yeli yaali n yaba nni, ki bili ke Juda yaaba siiga oba kuli kan go poli Ejipiti diema nni ki yedi: ‹O Diedo, Li Miali Diedo fo!›

²⁷ Diidi n baa faami bipo ki teni fala n baa ba. N kan pa ba yemanma. Juda yaaba, yaaba n kaa Ejipiti diema nni kuli, bu toabu leni mi koma n baa je bikuli cain.

²⁸ Bi niba waamu, bu toabu n ki nandi yaaba baa ña Ejipiti diema nni ki guani Juda diema nni. Ama Juda niba yaaba n sieni ki den cua Ejipiti nni ki wuoni yeni kuli baa bandi n yaa maama bi bi yaa maama n yaa baa tieni.

²⁹ Mini Li Miali Diedo, n baa fii ki sedi yipo u naa kaanu. N baa tieni yipo sinankeeni. Lani n tie yin bandi ke min yedi ke yaa yebiadima n baa ŋma yi yeni baa cua. Laa sinankeeni n tie o ne:

³⁰ Diidi n baa ŋa Ejipiti bado *Falono Hofida, yaaba n bua ki ñani o miali nuu nni nani min den ŋa Juda bado Sedesiasi, Nebukanesa Babilona bado yua den bua ki kpa o nuu nni maama yeni. Mini Li Miali Diedo n yedi yeni.»