Jeremi 43 - Gourmanchéma Bible

¹ Jelemi n den maadi bi niba kuli Li Miali Diedo bi Tienu n den puogi o wan waani ba yaa maama kuli,

² Hosaya bijua Asalia, Kalea bijua Yohanana leni bi japaadanba yeni kuli den yedi Jelemi: «Ŋan yedi yaala yeni kuli tie faama. Li Miali Diedo ti Tienu ki soani a ŋan yedi: ‹Da gedi mani ki ban wuoni Ejipiti diema nni.›

³ Ama li tie Neliya bijua Baluki n sedi tipo ki tudi a ki bua ki teni tin kali Babilona yaaba siiga ban kpa ti, bi ban gedini ti ti yonbidi Babilona diema nni.»

⁴ Kalea bijua Yohanana, bi toatieba yudanba kuli leni bi niba kuli naa den cengi Li Miali Diedo wani yua n den yedi ban cedi ki yaa ye Juda diema nni maama.

⁵ Lanwani Kalea bijua Yohanana leni bi toatieba yudanba kuli den taa yaa niba n sieni Juda diema nni leni yaaba n den sani ki kua buolitoe nni ki go den guani ki baa kali Juda diema nni kuli.

⁶ Lan den tie li jaba leni li puoba, li bila, o bado bisiaba leni Nebusaladani, badidiegu guudo n den ŋa yaa niba kuli leni Ahikami bijua Gedalia, Safani yaabili. Bi den taa o sawalipualo Jelemi leni Neliya bijua Baluki moko.

⁷ Bi den gedi Ejipiti diema nni kelima baa den cengi Li Miali Diedo maama, ki den pundi Tapanesi dogu nni.

Jelemi waani ke bi baa cua ki baa Ejipiti diema

⁸ Li Miali Diedo den maadi leni Jelemi Tapanesi dogu nni ki yedi:

⁹ «Taa a tankudigbenga ki bugini a o bado *Falono diegu buliñoatuogili yoagu binbinli nni.» O den tieni la Juda yaaba nintuali Tapanesi dogu nni.

¹⁰ Ŋan yedi ba: «Li Miali Diedo U Paaciamu Kuli Daano Isalele Tienu yedi mine: ‹Diidi n soani ban yini Babilona bado Nebukanesa n naacemo. N baa bili o bali kalikaanu min wuoni yaa tana yeni po ki ladi bu kpalibu.

¹¹ O baa cua ki pua Ejipiti diema. Mi kuuma baa taa bine, bine n gedi ti yonbidi, ki jugisiega mo baa je bine.

¹² N baa juu Ejipiti buli diedi. Nebukanesa baa juu ti ki taa bi buli ki gedini i buli yeni ti yonbidi. O baa fagi Ejipiti diema nani o yankpaalo n yen ñani o tiadi gani maama yeni. O baa ña likani leni mi yanduanma.

¹³ O baa pua ki mudi yaa butana n ye Eliopolisi dogu nni Ejipiti diema nni, ki juu mi fantama Ejipiti diema nni buli diedi kuli.› »