Jeremi 42 - Gourmanchéma Bible

¹ Bi toatieba yudanba kuli, Kalea bijua Yohanana, Hosaya bijua Yesania, leni bi niba kuli, ki cili yua wa ki cie, ki ban tuoni yua n yaba ki cie, bikuli den cua,

² o sawalipualo Jelemi kani ki yedi o: «Gbadi tipo ti miabu: Jaandi Li Miali Diedo a Tienu tinba yaaba n sieni nne kuli po! Ti den yaba boncianla, ama moala nani ŋan nua maama, tii go fuu.

³ Li Miali Diedo a Tienu n doagidi tipo tin baa tagini yaa sanu leni tin baa tieni maama.»

⁴ O sawalipualo Jelemi den yedi ba: «N gbadi. Diidi n baa jaandi Li Miali Diedo yi Tienu, nani yin yedi maama, n baa doagidi yipo, n kan wuoni yi liba kuli Li Miali Diedo n baa yaa pia yipo yaa maama.»

⁵ Bi den yedi Jelemi: «Li Miali Diedo yua n tie o moamoandaano n tua tipo siedi. O ñoabu n cuo ti ti yaa tieni wan baa puogi a ŋan yedi ti yaala.

⁶ Lan ŋani bi lan bia, ti baa tuo ki ŋoadi Li Miali Diedo ti Tienu tinba tiba tin soani a yua yaa kani. Yeni ti pala baa yaa mani kelima ti tuo Li Miali Diedo ti Tienu mayedikaama.»

⁷ Dana piiga n den pendi Li Miali Diedo den maadi leni Jelemi.

⁸ Jelemi den yini Kalea bijua Yohanana leni yaa toatieba yudanba n den ye leni o leni bi niba kuli, li bila leni li nikpela kuli.

⁹ O den yedi ba: «Li Miali Diedo Isalele Tienu yin soani nni min mia yua bu miabu yeni maadi nanda:

¹⁰ ‹Yi yaa guani mi diema nni, N baa pugini yi paalu, N kan bolini yi. N baa ŋuu yi, n kan ŋabi yi, Kelima n pali ki go mangi Min tieni yi yaa biadima po.

¹¹ Da go jie mani Babilona bado yin se yua yaa nintuali leni ti jawaandi. Da go jie o mani. Li Miali Diedo n yedi yeni. Kelima n ye leni yi ki baa tindi yi ki faabi yi o nuu nni.

¹² N baa doagidi n buama yipo, O baa gbadi yipo mi niñima Ki teni yin guani yi tinga nni.›

¹³ Ama yi yaa yedi: ‹Ti kan yaa ye mi naa diema nni!› Yi yaa cengi Li Miali Diedo yi Tienu nialu

¹⁴ ki yedi: ‹Ti baa gedi Ejipiti diema nni tin kan baa toabu naankani, tin kan gbadi naatuntunli piebima naankani, tin kan luo jiema naankani, ti baan yaa ye lanpo yo.›

¹⁵ Juda yaaba, yaaba n sieni, cengi mani Li Miali Diedo maama. Li Miali Diedo U Paaciamu Kuli Daano, Isalele Tienu yedi: ‹Yi yaa yedi ke yi baa gedi Ejipiti diema nni Ki ban kali lipo,

¹⁶ Yin jie yaa toabu yeni Baa ŋoadi ki ban nandi yi Ejipiti diema nni, Yin jie yaa koma yeni baa ŋoadi yi lipo. Lanpo yo ke yi baa kpe.

¹⁷ Yaaba n bili ke bi baa gedi Ejipiti Ki ban yaa ye kuli, Bu toabu, mi koma bi u yianbiadipuodiko n baa kpa ba. Bi kan baa yua n baa cia. Oba kan ŋmadi min baa teni yaa fala n cua bipo yeni yaa yogunu.›

¹⁸ Kelima Li Miali Diedo U Paaciamu Kuli Daano, Isalele Tienu yedi nanda: ‹Nani n pali n beni Jelusalema yaaba po maama yeni, yeni moko n pali baa be yipo yi yaa gedi Ejipiti diema nni. Yi baa tua ti solindi leni li pabiidili bonla ki faliga leni u yualu bonla. Yi kan go le u naa kaanu mo abada.› »

¹⁹ Jelemi den yedi: «Juda yaaba yaaba n sieni, da gedi mani Ejipiti ke n maadi yi i moamoane.

²⁰ Yi boandi yi yula kelima yi soani nni Li Miali Diedo yi Tienu po ki yedi: ‹Jaandi tipo Li Miali Diedo ti Tienu, Li Miali Diedo ti Tienu yaa yedi yaala kuli, ti baa tieni la.›

²¹ N doagidi yipo laa bonla, ama yi naa cengi Li Miali Diedo yi Tienu maama, ki buali wan puogi nni min yedi yi yaala kuli.

²² Bandi mani line bonŋanla: bu toabu, mi koma, bi u yianbiadipuodiko n baa kpa yi yin bua gedi ki ban kali yaa diema nni.»